Kanbiọ lẹ sọn Wehiatọ lẹ Dè

Naegbọn sunnu Islaeli tọn lẹ yin dotẹnmẹna nado wlealọ hẹ yọnnu kosi mẹglọnọ lẹ, to whenuena e yindọ Osẹ́n Mose tọn ko degbè dọ kanṣiṣa alọwle tọn depope ma dona yin bibasi hẹ kosi delẹ?—Deutelonomi 7:1-3; 21:10, 11.

Ninọmẹ vonọtaun delẹ wẹ zọ́n bọ dotẹnmẹ ehe do yin nina. Jehovah ko degbè na Islaelivi lẹ nado và tòdaho akọta ṣinawe tọn po tòmẹnu yetọn lẹ po sudo mlẹnmlẹn to aigba Kenani tọn ji. (Deutelonomi 20:15-18) To whẹho akọta devo lẹ tọn mẹ, yọnnu alọji heyin wiwle lẹ kẹdẹ wẹ sọgan luntọ́n to mẹhe ko whẹ́n mẹho lẹ mẹ. (Osọha lẹ 31:17, 18; Deutelonomi 20:14) Islaelivi sunnu de sọgan wlealọ hẹ dopo to yọnnu enẹlẹ mẹ kiki to whenuena e ze afọdide tangan delẹ.

Gando afọdide he yọnnu enẹ dona ze lẹ go, Biblu dọmọ: “Ewọ bo na lùn oda etọn bo pà ofẹ̀n etọn lẹ; e bo na klọ́n avọ̀ mẹmẹglọ etọn tọn lọ sẹ̀ sọn ogo, bo na nọ nọ̀ ohọ̀ towe mẹ bo ví otọ́ etọn po onọ̀ etọn po osun dopo gigọ́: to enẹgodo hiẹ na yì họmẹ jẹ e dè, bo yin asu etọn, ewọ bo nasọ yin asi towe.”—Deutelonomi 21:12, 13.

Yọnnu alọji mẹglọnọ de dona lùn oda etọn eyin Islaelivi de jlo nado wlealọ hẹ ẹ. Oda lùnlùn yin dohia awubla po aluẹmẹninọ po tọn. (Isaia 3:24) Di apajlẹ, to whenuena Job hẹn ovi etọn lẹ po nutindo etọn lẹ po bú to pọmẹ, e lùn oda etọn nado do awubla etọn hia. (Job 1:20) Yọnnu kosi lọ dona pà ofẹ̀n etọn lẹ ga bọ eyin e tlẹ sanu do yé, alọ etọn lẹ ma na yọnwhanpẹ. Etẹwẹ yin “avọ̀ mẹmẹglọ etọn tọn lọ” he yọnnu mẹglọnọ lọ dona klọ́n sẹ̀? Aṣa yọnnu Kenaninu lẹ tọn wẹ e yin nado nọ doaṣọ ganji to whenuena awhàn jlo na gbà otò yetọn. Yé nọ wàmọ to todido mẹ nado mọ nukundagbe mẹhe jlo na wle yé lẹ tọn. Yọnnu mẹglọnọ he tin to aluẹmẹ de dona sẹ̀ aṣọ́donu enẹlẹ do.

Whẹpo yọnnu mẹglọnọ de nado lẹzun asi Islaelivi de tọn, e dona ví mẹvivẹ etọn he kú lẹ na osun dopo. Tòdaho Kenani tọn lẹ dona yin vivasudo mlẹnmlẹn jẹ obá lọ mẹ bọ whẹndo he mẹ yọnnu lọ wá sọn po họntọn etọn hoho tọn depope po ma nasọ tin ba. Na awhànfuntọ Islaeli tọn lẹ na ko và boṣiọ he nọtena yẹwhe etọn lẹpo sudo wutu, numẹsẹ̀n etọn lẹpo na ko busẹ. Osun awubla tọn lọ sọ yin ojlẹ klọwé tọn de ga, yèdọ ojlẹ he mẹ yọnnu mẹglọnọ lọ dona doalọtena nuhe sọgan kọ̀n ẹn dopọ hẹ sinsẹ̀n-bibasi etọn hoho lọ lẹpo te.

Ṣigba na nuhe dù yọnnu kosi lẹ to paa mẹ, ninọmẹ lọ gbọnvo. To pọndohlan mẹ na ehe, Jehovah degbè dọmọ: “Hiẹ ma na basi alọwle lẹ po yé po gba; hiẹ ma na yí viyọnnu towe na hlan visunnu etọn gba, kavi na yí viyọnnu etọn hlan visunnu towe gba.” (Deutelonomi 7:3) Naegbọn alọhẹndotenamẹ enẹ do tin? Deutelonomi 7:4 dọmọ: “Na ewọ na gọ̀ visunnu towe sẹ̀ sọn hihodo mi mẹ, na yé nido nọ sẹ̀n yẹwhe devo lẹ.” Ehe dohia dọ alọhẹndotenamẹ lọ yin zizedai nado basi hihọ́ na Islaelivi lẹ na sinsẹ̀n-bibasi yetọn nikaa yin hinhẹnflu. Ṣigba, yọnnu kosi de he tin to ninọmẹ heyin zẹẹmẹ basina to Deutelonomi 21:10-13 mẹ ma tindo owù mọnkọtọn gba. Hẹnnumẹ etọn lẹpo ko kú, bọ boṣiọ he nọtena yẹwhe he e nọ sẹ̀n lẹpo ko yin vivasudo. E ma sọ tindo kanṣiṣa depope hẹ sinsẹ̀n lalo basitọ lẹ ba. Islaelivi de sọgan wlealọ hẹ kosi de he tin to ninọmẹ enẹlẹ mẹ.