‘Mì Dín Mẹhe Jẹ lẹ Mọ’

OTÒ adọkunnọ de wẹ Damasku yin to owhe kanweko tintan whenu. Na ogle atin-sinsẹ́n tọn lẹ wẹ lẹdo e wutu, e taidi bẹtẹn awumiọnnamẹ tọn de na ajọwatọ he nọ wá sọn otò whèzẹtẹn-waji tọn lẹ mẹ. To madẹnmẹ to okú Jesu Klisti tọn godo, agun Klistiani tọn de yin didoai to Damasku. Delẹ to hagbẹ agun enẹ tọn lẹ mẹ yin Ju he sọgan ko lẹzun hodotọ Jesu tọn lẹ to Hùnwhẹ Pẹntikọsti tọn whenu to Jelusalẹm to owhe 33 W.M. (Owalọ lẹ 2:5, 41) Devi devo lẹ sọgan ko sẹtẹn sọn Jude wá Damasku to whenuena homẹkẹn fọndote bọdo okú Stefani tọn go.—Owalọ lẹ 8:1.

Vlavo to owhe 34 W.M. wẹ Klistiani Damasku tọn de he nọ yin Anania, mọ azọ́ndenamẹ jiawu de yí. Oklunọ dọna ẹn dọmọ: “Tite, bo yì alihogbó he yè nọ ylọ Jijlọ ji, bo kàn mẹde biọ to owhé Juda tọn gbè, he yè nọ ylọ Saulu, Talsutọ: na, pọ́n, e to dẹ̀ho.”—Owalọ lẹ 9:11.

Aliho he nọ yin yiylọdọ Jijlọ lọ dite na nudi kilomẹtlu dopo daa bo jugbọn ṣẹnṣẹn Damasku tọn. Yẹdide he tin to weda ehe ji sọgan gọalọna mí nado yọ́n awusọhia hohowhenu aliho lọ tọn jẹ obá de mẹ. Lehe aliho lọ yin bibasi gbọn na ko zọ́n bọ Anania sọgan nọma yawu mọ owhé Juda tọn. Ṣigba Anania mọ owhé lọ bọ to dlapọn etọn godo, Saulu lẹzun apọsteli Paulu, yèdọ wẹndagbe jlatọ zohunhunnọ de.—Owalọ lẹ 9:12-19.

Jesu ko do devi etọn lẹ hlan bo dọ na yé dọ yé ni ‘dín mẹhe jẹ’ na wẹndagbe lẹ mọ. (Matiu 10:11) E họnwun dọ Anania dín Saulu mọ na nugbo tọn. Taidi Anania, Kunnudetọ Jehovah tọn lẹ nọ yí ayajẹ do nọ dín mẹhe jẹ lẹ mọ podọ homẹ yetọn nọ hùn to whenuena gbẹtọ lẹ kẹalọyi wẹndagbe Ahọluduta lọ tọn. Vivẹnu he nọ yin dido lẹpo nọ tindo ale to whenuena omẹ enẹlẹ yin mimọ.—1 Kọlintinu lẹ 15:58.

[Yẹdide to weda 32]

“Alihogbó he yè nọ ylọ Jijlọ” to egbehe

[Asisa Yẹdide tọn to weda 32]

From the book La Tierra Santa, Volume II, 1830