‘Mì to Alihọ́’

TO HOHOWHENU, họ̀njinọtọ lẹ nọ wadevizọn to họngbo tòdaho po tẹmpli po tọn lẹ ji podọ, to ninọmẹ delẹ mẹ, to họntonu owhé mẹdetiti tọn lẹ. Gbọnvona dọ họ̀njinọtọ lẹ nọ hẹn ẹn diun dọ họngbo lẹ yin súsú to zánmẹ, yé sọ nọ wazọ́n taidi nuhọ́tọ lẹ. Azọngban titengbe de wẹ ehe yin, na eyin tòdaho lọ na nọ̀ blẹo mẹ nuhọ́tọ lẹ dona nọ dawhá jẹgbonu nado na avase tòmẹnu lọ lẹ gando owù depope he to unklẹn go.

Jesu Klisti jẹakọhẹ azọ́n họ̀njinọtọ, he sọ nọ yin yiylọdọ alihọ́tọ lẹ tọn. To gbèdopo, e yí devi etọn lẹ jlẹdo alihọ́tọ lẹ go bo na yé tuli nado to alihọ́ gando vivọnu titonu Juvi lẹ tọn go. E dọmọ: “Mì payi, na mì nisọ nọ họ́ mìde, . . . na mì ma yọ́n whenuena ojlẹ lọ yin. Na e tin taidi whenuena dawe de jẹ gbejizọnlin ji jei otò dindẹn de mẹ, bo jo owhé etọn dai, bosọ . . . na osẹ́n alihọ́tọ nado to alihọ́. Enẹwutu mì ni to alihọ́; na mì ma yọ́n whenuena owhénọ lọ na wá.”—Malku 13:33-35.

Mọdopolọ, na nuhe hugan owhe 125 todin, linlinnamẹwe ehe, Atọ̀họ̀-Nuhihọ́ Lọ Tọn, ko lá tulinamẹ Jesu tọn nado “to alihọ́.” Gbọnna? Dile e yin didọ to weda 2tọ linlinnamẹwe ehe tọn ji do, “E nọ doayi nujijọ aihọn mẹ tọn lẹ go dile yé to dọdai Biblu tọn lẹ hẹndi. E nọ miọnhomẹna gbẹtọ lẹpo po wẹndagbe lọ po dọ to madẹnmẹ, Ahọluduta Jiwheyẹwhe tọn na và mẹhe nọ bianukunna hatọ yetọn lẹ sudo bo na lilẹ́ aigba lọ zun paladisi de.” Po vọkan etọn hugan 26 000 000 he nọ yin mimá lẹdo aihọn pé to ogbè 150 mẹ po, Atọ̀họ̀-Nuhihọ́ Lọ Tọn wẹ yin linlinnamẹwe sinsẹ̀n tọn he nọ yin mimá pé hugan to aihọn mẹ. Gbọn dali etọn, Kunnudetọ Jehovah tọn lẹ, taidi họ̀njinọtọ hohowhenu tọn lẹ, to tudohomẹna gbẹtọ lẹ to filẹpo nado ‘nọ họ́ yede,’ kavi gbọṣi nukle to gbigbọ-liho na Owhénọ lọ, Jesu Klisti, na lẹkọwa to madẹnmẹ nado hẹn whẹdida ṣẹ do aihọn ylankan ehe ji.—Malku 13:26, 37.