Mẹnu Wẹ Na Na Núdùdù Aihọn?

SỌGBE hẹ sọha-yina-nú Tito Núdùdù Aihọn Tọn (Programme alimentaire mondial) he yin titobasinanu Plidopọ Akọta lẹ tọn he nọ hoavùn sọta huvẹ, gbẹtọ livi donu 800, he suhugan yetọn yin yọpọvu lẹ, wẹ huvẹ na sayana to madẹnmẹ. To agọe, titobasinanu enẹ dọ dọ nutindo podọ ayidonugo he otò he hunnukun lẹ sọgan ko yí do penukundo ninọmẹ ehe go wẹ nọ yin yiyizan na nuhahun devo lẹ, taidi nuyiwa nukunbianamẹ tọn. Gbigbayipe azọ̀n he nọ bẹplamẹ lẹ tọn ko hẹn nuhahun lọ sinyẹn dogọ. Linlinwe titobasinanu lọ tọn he yin Global School Feeding Report dọ gando otò Aflika tọn he mẹ SIDA gbayipe te lẹ go dọmọ: “Mẹjitọ susu wẹ [SIDA] to kúnsúdona. Ovi he yé nọ jo dai lẹ nọ saba yin jijodo nado penukundo nuhudo yedelẹ tọn go, bọ suhugan yetọn ma nọ tindo oyọnẹn dodonu glelilẹ po gbẹninọ egbesọegbesọ tọn po he to paa mẹ nọ yin pinplọn to whẹndo mẹ.”

Tito Núdùdù Aihọn tọn to godonọna tito de he tindo yanwle lọ nado má e whè gbau núdùdù dopo to gbèdopo to wehọmẹ lẹ. Linlẹn lọ ma yin nado de huvẹ pò poun gba ṣigba nado na huhlọn tito devo lẹ he yin awuwlena nado glọnalina SIDA to jọja lẹ ṣẹnṣẹn gbọn nupinplọn gbesisọmẹ tọn dali ga.

To fie tito ehe ko bẹjẹeji te lẹ, yọpọvu lẹ nọ mọ núdùdù, azọ́nplọnmẹ gando wiwejininọ mẹdetiti tọn go, po alọgọ devo lẹ po yí. E ko yin ayidego ga dọ to fie gbẹtọ lẹ diọ walọyizan yetọn te lẹ, mẹhe nọ bẹ SIDA lẹ depò.

E blawu dọ, vivẹnudido gbẹtọvi tọn lẹ nọ saba tindo dogbó bo ma nọ hẹn kọdetọn dagbe mlẹnmlẹn wá gba. Ṣigba Biblu dó opagbe homẹmiọnnamẹ tọn de gando pọngbọ tẹgbẹ tọn na nuhahun huvẹ tọn go. “Gbado susugege na tin [to aigba ji],” wẹ Psalm 72:16 dọ. To Ahọluduta Jiwheyẹwhe tọn glọ, gbẹtọ lẹ na penugo nado dọ gando Jehovah Jiwheyẹwhe go dọmọ: “Hiẹ dla aigba pọ́n, bosọ húsin in . . . Hiẹ wleawu gbado tọn na yé, whenuena hiẹ ko wleawu aigba tọn domọ.”—Psalm 65:9.

[Asisa Yẹdide tọn to weda 32]

WFP/Y. Yuge