Dodonu Tẹ Ji Wẹ Hiẹ Ze Ogbẹ̀ Towe Sinai Do?

JÌDIDỌ ohọ̀ de tọn nọ sinai titengbe do lehe dodonu etọn lodo sọ ji. Biblu nọ yí nunọwhinnusẹ́n ehe zan to whedelẹnu to yẹhiadonu-liho.

Di apajlẹ, yẹwhegán Isaia, dlẹnalọdo Jehovah Jiwheyẹwhe taidi mẹhe “yí dòdó aigba tọn hẹnai.” (Isaia 51:13) Dòdó kavi dodonu ehe nọtena osẹ́n Jiwheyẹwhe tọn he ma nọ diọ lẹ he nọ deanana lilẹpe aigba tọn bo nọ hẹn ẹn do otẹn etọn mẹ. (Psalm 104:5) Ohó Jiwheyẹwhe tọn, Biblu, sọ dọho gando “dodonu” he ji ogbẹ́ gbẹtọvi tọn sinai do lẹ go. Enẹlẹ wẹ whẹdida dodo, osẹ́n, po titojininọ po. Eyin yé “gble” kavi yin kàndepòna gbọn whẹdida mawadodo, nugbomadọ, po danuwiwa po dali, ogbẹ́ gbẹtọvi tọn nọ biọ bẹwlu mẹ.—Psalm 11:2-6; Howhinwhẹn lẹ 29:4.

Nunọwhinnusẹ́n ehe sọ gando mẹdopodopo go. To tadidona Yẹwhehodidọ Osó ji tọn etọn he diyin lọ mẹ, Jesu Klisti dọmọ: “Mẹdepope he sè ohó ṣie helẹ, bosọ basi yé, yè na jlẹ ẹ do gbẹtọ nuyọnẹntọ de go, he gbá ohọ̀ etọn do osé ji. Whenuena jikun ja, bọ asisa lẹ fọ́n, bọ jẹhọn lẹ yìn, bo hò jẹ ohọ̀ lọ ji: e ma jai: na yè do e do osé ji wutu. Mẹdepope he sọ sè ohó ṣie helẹ, bo masọ basi yé, yè na jlẹ ẹ do gbẹtọ nulunọ de go, he gbá ohọ̀ etọn do tọkẹ́n ji. Whenuena jikun ja, bọ asisa lẹ gọ́, bọ jẹhọn lẹ yìn, bo hò jẹ ohọ̀ lọ ji, e họ́: hihọ̀ etọn sọ sù tlala.”—Matiu 7:24-27.

Dodonu tẹ ji wẹ hiẹ ze ogbẹ̀ towe sinai do? Be tọkẹ́n tata tamẹnuplọnmẹ gbẹtọvi he ma dibusi Jiwheyẹwhe lẹ tọn he na dekọtọn do gbakija mẹ lẹ ji wẹ ya? Kavi a to ogbẹ̀ towe ze sinai do osé sinsinyẹn he nọtena tonusisena nuhe Jesu Klisti dọ lẹ ji, ehe na gọalọna we nado lùn yujẹhọn yẹhiadonu gbẹ̀mẹ tọn lẹ tọ́n?