“E Vọ̀”

TO 2002, Kunnudetọ Jehovah tọn lẹ basi plidopọ agbegbe tọn de to tòdaho Mbandaka tọn mẹ to agewaji-whèyihọ République démocratique du Congo tọn. To whenuena Les Écritures grecques chrétiennes—Traduction du monde nouveau to Lingala-gbè mẹ yin didetọ́n to plidopọ lọ ji, mẹplidopọ lọ lẹ lọ́n na ayajẹ, bọ dasin wayi do mẹdelẹ. To nukọnmẹ, gbẹtọ lẹ wọ̀ wá oplò lọ ji nado pọ́n Biblu yọyọ lọ tlintlin, bo to awhado dọmọ: “Basuki, Basambwe,” ehe zẹẹmẹdo: “E vọ̀! Yé duwinyan!”

Naegbọn homẹ mẹplidopọ lẹ tọn do hùn sọmọ, podọ etẹ dọ wẹ yé te gbọn hogbe enẹlẹ dali? To awà delẹ ji to Mbandaka, Kunnudetọ Jehovah tọn lẹ ma nọ penugo nado mọ Biblu to Lingala-gbè mẹ. Etẹwutu? Na ṣọṣi lẹ gbẹ́ nado sà yé na Kunnudetọ Jehovah tọn lẹ wutu. Kunnudetọ lẹ dona gbọ̀n mẹdevo lẹ ji whẹpo do mọ vọkan lẹ yí. Homẹ yetọn hùn tlala todin na ṣọṣi lẹ masọ sọgan glọnalina yé nado tindo Biblu ba.

Gbọnvona Kunnudetọ Jehovah tọn lẹ, gbẹtọ lẹ to paa mẹ na mọaleyi sọn lẹdogbedevomẹ yọyọ ehe mẹ. Dawe de he sọgan sè tito-to-whinnu lọ to owhé etọn gbè gbọn nuyizan gbèzeyiaga tọn lẹ dali sọn nọtẹn plidopọ lọ tọn wlan hlan wekantẹn alahọ Kunnudetọ Jehovah tọn lẹ tọn dọmọ: “Homẹ ṣie hùn tlala na didetọ́n Biblu ehe tọn. E na gọalọna mí nado mọnukunnujẹ nususu mẹ. Yẹn ma yin dopo to Kunnudetọ Jehovah tọn lẹ mẹ, ṣigba n’to jejeji nado hia Biblu yọyọ he mì ṣẹṣẹ detọ́n ehe.”

Les Saintes Écritures—Traduction du monde nouveau tin-to-aimẹ todin to blebu mẹ to ogbè 33 mẹ, podọ Les Écritures grecques chrétiennes tin to ogbè 19 devo lẹ mẹ, he bẹ Lingala-gbè hẹn ga. Naegbọn hiẹ ma na kanse dopo to Kunnudetọ Jehovah tọn lẹ mẹ lehe hiẹ sọgan mọ vọkan lẹdogbedevomẹ dagbe ehe tọn dopo yí gbọn?