Be Hiẹ Taidi Atin Lagani Auna de Ya?

TO GBÉTATÒ de mẹ to lẹdo Port Moresby tọn mẹ, to Papouasie-Nouvelle-Guinée, lizọnyizọnwatọ awe lẹkọja whé sọn lizọnyizọn yẹwhehodidọ tọn mẹ. Dile yé to yìyì, yé mọ atin whanpẹnọ de. “Pọ́n, lagani auna de!” wẹ mẹhomẹ lọ dọ. To lilẹ́ pannukọn jọja lọ godo, e zindonukọn dọmọ: “Oyín enẹ zẹẹmẹdo ‘atin whemẹwhemẹ tọn.’ To vogbingbọn mẹ na atin devo lẹ to otò yozò tọn lẹ mẹ, amà etọn lẹpo nọ ja to whemẹwhemẹ bọ e nọ taidi atin kúkú nkọtọn. Ṣigba, to whenuena jikun bẹ, e nọ vọ́ amà jọ, bo nọ de vounvoun lẹ tọ́n, bosọ nọ yọnwhanpẹ whladopo dogọ.”

Nude sọgan yin pinplọn sọn atin lagani auna dè. Sọgbe hẹ dodinnanutọ delẹ, atin ehe yin dopo to atin atọ́n he nọ tọ́n vounvoun he yọnwhanpẹ hugan to aihọn mẹ lẹ mẹ. Dile etlẹ yindọ vounvoun po amà etọn lẹ po nọ ja to akú whenu, atin lọ nọ dọ̀n osin susu do sẹdotẹnmẹ. Adọ̀ etọn lẹ nọ lodo taun bo sọgan vùn lẹdo osé he yì aigba glọ sisosiso lẹ. Gbọnmọ dali, e nọ hẹn ede lodo gbanun-gbanun sọta jẹhọn sinsinyẹn lẹ. Do glido, e nọ nọgbẹ̀ dẹn gbọn adadidiọ sọgbe hẹ ninọmẹ sinsinyẹn lẹ dali.

Mí sọgan mọ mídelẹ to ninọmẹ he nọ whlé dolilo yise mítọn tọn pọ́n lẹ mẹ. Etẹwẹ na gọalọna mí nado doakọnnanu? Kẹdẹdi atin lagani auna, mí sọgan nù osin gbẹnamẹ tọn he yin Ohó Jiwheyẹwhe tọn lọ bosọ whlá apadewhe etọn do sẹdotẹnmẹ. Mí sọ dona tẹdo ‘osé mítọn,’ Jehovah, po titobasinanu etọn po go gligli. (2 Samuẹli 22:3) Na nugbo tọn, atin lagani auna yin nuflinmẹ dagbe de dọ etlẹ yin to lẹdo sinsinyẹn de mẹ, mí sọgan hẹn huhlọn po whanpẹ gbigbọmẹ tọn mítọn po go eyin mí nọ yí awuwledainanu he Jehovah hẹn tin-to-aimẹ na mí lẹ zan ganji. Gbọn mọwiwà dali, mí na “dugu opagbe” he ewọ ko dó na mí lẹ tọn, kakajẹ opagbe ogbẹ̀ madopodo tọn lọ ji.—Heblu lẹ 6:12; Osọhia 21:4.