Be Mí Tindo Nuhudo Mẹssia lọ Tọn Ya?

HIẸ sọgan kàn kanbiọ lọ sè po whẹjijọ po dọ, “Be mí tindo nuhudo Mẹssia lọ tọn ya?” Mọwẹ, lẹnpọn dagbenu wẹ e yin nado kanse vlavo eyin Mẹssia lọ na gando gbẹzan towe go to aliho depope mẹ.

Mẹhe hiẹ sọgan nọ na sisi delẹ na hẹn we tindo nujikudo dọ gblọndo lọ họnwun hezeheze dọ: Hiẹ tindo nuhudo Mẹssia lọ tọn dandan, kẹdẹdile mẹhe pò lẹpo wà do. Dawe he yọ́n osẹ́n Ju lẹ tọn ganji de wlan gando Mẹssia lọ go to owhe kanweko tintan whenu dọmọ: “Opagbe Jiwheyẹwhe tọn lẹpo to ewọ mẹ Mọwẹ wẹ yé.” Gbọnmọ dali, e zinnudo adà titengbe he Mẹssia lọ nọ yiwà to lẹndai Mẹdatọ mítọn tọn mẹ ji nado dona akọta aigba tọn lẹpo. (2 Kọlintinu lẹ 1:20) Azọngban Mẹssia lọ tọn yin nujọnu sọmọ bọ wiwá etọn po gbẹzan etọn to aigba ji po yin ahọnkan dọdai Biblu tọn tọn. Whenuho-kàntọ Biblu tọn Henry, H. Halley zinnudeji to alọnuwe he omẹ livi susu yizan to nuhe hugan owhe 70 he wayi lẹ gblamẹ mẹ dọmọ: “Alẹnu Hoho lọ yin kinkàn nado fọ́n nukundido de dote gando [Mẹssia lọ] go, podọ nado jla aliho do na Wiwá [etọn].” Ṣigba be dandannu wẹ e yin dọ e ni wá ya? Naegbọn whẹho enẹ dona duahunmẹna we?

Na taun tọn, “Mẹssia” zẹẹmẹdo “Mẹyiamisisadode Lọ” bosọ yin hogbe devo na “Klisti” he mẹsusu jẹakọ hẹ ganji. Omẹ ehe, he otanwe Encyclopædia Britannica, Vọkan 1970 tọn, ylọ dọ “mẹfligọtọ daho hugan lọ,” dona wá aigba ji na nuyiwa mẹmasi mẹjitọ mítọn tintan lẹ, Adam po Evi po tọn wutu. Yé yin didá to pipé mẹ, po nukundido gigonọ lọ po nado nọgbẹ̀ kakadoi to Paladisi mẹ, ṣigba yé hẹn nukundido enẹ bu. Angẹli atẹṣitọ he wá yin yinyọnẹn taidi Satani Lẹgba, dọna yé dọ Mẹdatọ yetọn yin hẹngogonọ zẹjlẹgo, podọ dọ gbẹzan yetọn na pọnte hugan eyin yé basi nudide dagbe po oylan po tọn na yede.—Gẹnẹsisi 3:1-5.

Evi yin kiklọ bo yí lalo enẹ sè. Adam, he kunnudenu dohia dọ gbẹdido asi etọn tọn họakuẹ na ẹn hú nugbonọ-yinyin hlan Jiwheyẹwhe, nọgodona atẹṣiṣi he Lẹgba fọndote enẹ. (Gẹnẹsisi 3:6; 1 Timoti 2:14) Gbọn nuyiwa yetọn lẹ dali, e ma yin nukundido yetọn nado nọgbẹ̀ kakadoi to lẹdo paladisi tọn lẹ mẹ kẹdẹ wẹ yé hẹnbu gba. Yé sọ jo ogú ylando po kọdetọn etọn he yin okú po tọn do na ovivi yetọn he ma ko yin jiji lẹ ga.—Lomunu lẹ 5:12.

Mẹdatọ mítọn, Jehovah, magbe to afọdopolọji nado de nugandomẹgo ylankan nujijọ debọdo-dego he atẹṣiṣi lọ hẹnwa aimẹ lẹ tọn sẹ. E na basi wadotana ehe tọn gbọn nuhe na wá lẹzun nunọwhinnusẹ́n he sọgbe de to Osẹ́n Mose tọn mẹ dali—yèdọ ogbẹ̀ na ogbẹ̀. (Deutelonomi 19:21; 1 Johanu 3:8) Nunọwhinnusẹ́n he sọgbe ehe dona yin hihodo eyin depope to ovivi ylandonọ Adam po Evi po tọn lẹ mẹ na mọ ogbẹ̀ mavọmavọ yí janwẹ to aigba paladisi tọn de ji, sọgbe hẹ lẹndai he Mẹdatọ lọ tindo na whẹndo gbẹtọvi tọn. Ehe wẹ plan mí jẹ wiwá Mẹssia lọ tọn kọ̀n.

To whenuena Jehovah Jiwheyẹwhe to whẹdana Lẹgba, e dọ to dọdai tintan Biblu tọn mẹ dọmọ: “Yẹn nasọ yí okẹ̀n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.” (Gẹnẹsisi 3:15) Wesetọ Biblu tọn de dọ dọ “otàn opagbe Mẹssia lọ tọn lẹ tọn dile e yin didọ to Owe-wiwe mẹ do bẹjẹeji po hodidọ [ehe] po.” Wesetọ devo dọ dọ Mẹssia lọ wẹ yin azọ́nwanu Jiwheyẹwhe tọn he “na de nugbajẹmẹji he ylando [mẹjitọ mítọn tintan lẹ tọn] hẹnwa lẹpo sẹ,” bo nasọ hẹn dona lẹ wá na gbẹtọvi lẹ.—Heblu lẹ 2:14, 15.

Ṣigba, hiẹ sọgan doayi e go dọ gbẹtọvi lẹ ma to vivi dona ehe tọn dù to aliho depope mẹ todin. Kakatimọ, akọ̀ gbẹtọvi tọn tin to ninọmẹ todido matindo tọn mẹ. Nuhe zọ́n niyẹn bọ otanwe The World Book Encyclopedia dọ dọ “Ju susu gbẹ́ to nukundo Mẹssia lọ nado wá” nado “basi vọjlado na nuhe jẹdò lẹ bo gbawhàn kẹntọ gbẹtọ lẹ tọn lẹ.” Ṣigba, Biblu dọ dọ Mẹssia lọ ko wá. Be whẹwhinwhẹ́n tin nado yí nuhe Biblu dọ sè ya? Hosọ he bọdego na na gblọndo.