Nuhọakuẹ-Yinyin “Núzinzan Madogánnọ” de Tọn

“MÌ ASU lẹ ga, ni nọ yí nuyọnẹn do nọhẹ [asi mìtọn lẹ], mì nọ wleyẹyi hlan yọnnu lẹ, di hlan núzinzan madogánnọ,” wẹ apọsteli Pita wlan. (1 Pita 3:7) Be alọdlẹndonu Owe-wiwe tọn ehe hlan yọnnu de taidi “núzinzan madogánnọ,” de yọnnu lẹ pò to aliho de mẹ wẹ ya? Mì gbọ mí ni pọ́n linlẹn he wekantọ gbọdo lọ to tintẹnpọn nado detọ́n to dowhenu.

Hogbe Glẹki tọn he yin lilẹdo “wleyẹyi hlan” zẹẹmẹdo “nukun nujọnu tọn yíyí do pọ́n, yinyọ́n nuhọakuẹ-yinyin . . . sisi didohia.” Enẹwutu, asu Klistiani de dona yinuwa hẹ asi etọn po walọmimiọn po, bo nọ do mẹtọnhopọn he jẹ hia ẹ taidi núzinzan họakuẹ he ma sinyẹn sọmọ de. Ehe ma yin mẹdèpo to aliho depope mẹ gba. Di apajlẹ, lẹnnupọndo miyọ́ngbán whanpẹnọ anazọ́nwatọ Tiffany tọn he nọ yin asọ́dona taidi yẹdide atin lotusi tọn lọ ji. Na nugbo tọn, miyọ́ngbán dagbedagbe ehe sọgan yin pinpọnhlan taidi nuhe ma sinyẹn sọmọ de. Be madogánnọ-yinyin miyọ́ngbán lọ tọn de nuhọakuẹ-yinyin etọn pò wẹ ya? Paali! To 1997 miyọ́ngbán Tiffany tọn jọnun lọ yin sisà yin akuẹ dọla Amelika tọn livi 2,8 [hugan liva dopo daa CFA]! Dile etlẹ yindọ e ma sinyẹn sọmọ, ehe ma de e pò gba, kakatimọ e yidogọna nuhọakuẹ-yinyin etọn wẹ.

Mọdopolọ, yẹyi didogona yọnnu de taidi núzinzan madogánnọ de ma nọ de nuhọakuẹ-yinyin etọn pò gba. ‘Yíyí nuyọnẹn’ do nọhẹ asi etọn zẹẹmẹdo dọ asu de nọ ze huhlọn po dogbó etọn lẹ po, nuhe e yiwanna po dehe e gbẹwanna lẹ po, pọndohlan po numọtolanmẹ etọn lẹ po do lẹnpọn mẹ. Asu mẹtọnhopọntọ de nọ yọnẹn dọ vogbingbọn tin to aliho he mẹ ewọ yin didá te po lehe asi etọn yin didá te po ṣẹnṣẹn bosọ nọ ze ehe do lẹnpọn mẹ to nuyiwa etọn hẹ ẹ mẹ. E nọ do mẹtọnhopọn he jẹ hia asi etọn “na odẹ̀ [etọn] ma nado pòali.” (1 Pita 3:7) Asu he nọ gboawupo nado na sisi jẹhẹnu yọnnu tọn he asi etọn tindo lẹ to haṣinṣan etọn hẹ Jiwheyẹwhe zedo owù mẹ. E họnwun dọ, Ohó Jiwheyẹwhe tọn ma nọ de yọnnu lẹ pò gba. Kakatimọ, e nọ doyẹyigona yé bo nọ gbògbéna yé.

[Asisa Yẹdide tọn to weda 32]

© Christie’s Images Limited 1997