“Naegbọn Mí Do Tin Tofi?”

ELIE WIESEL, he mọ Nunina Mẹpipa tọn yí bosọ lùn Nuvasudo pligidi Nazi tọn tọ́n ylọ ẹ dọ “kanbiọ titengbe hugan he mẹde sọgan kanse ede.” Kanbiọ tẹwẹ? “Naegbọn mí do tin tofi?”

Be hiẹ ko lẹnnupọndo kanbiọ ehe ji pọ́n ya? Mẹsusu ko wàmọ, ṣigba yé ma mọ gblọndo lọ. To vivẹnudido etọn nado dín zẹẹmẹ ogbẹ̀ tọn mẹ, whenuho-kàntọ Glẹnsinu lọ Arnold Toynbee wlan dọmọ: “Yanwle tangan gbẹtọ lẹ tọn wẹ nado pagigona Jiwheyẹwhe bo mọ ayajẹ tẹgbẹ tọn yí sọn E dè.”

Ojlofọndotenamẹnu wẹ e yin dọ hugan owhe fọtọ́n atọ̀n die wayi, dawe devo he yin yinyọnẹn taidi mẹhe nọ yí sọwhiwhe do doayi ogbẹ̀ go, ko mọ gblọndo tangan lọ na kanbiọ ehe. Ahọlu Sọlọmọni nuyọnẹntọ dọmọ: “Gbọ mí ni sè opodo ohó lẹpo pete tọn: Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn pete.”—Yẹwhehodọtọ 12:13.

Nunọwhinnusẹ́n titengbe ehe yin godonọna gbọn Ovi Jiwheyẹwhe tọn, Jesu Klisti dali. To whenuena Jesu tin to aigba ji, e dovivẹnu lẹpo nado pagigona Otọ́ olọnmẹ tọn etọn. Sinsẹ̀n-bibasi hlan Jiwheyẹwhe hẹn gbẹzan Jesu tọn pọnte. E hẹn ẹn dogbẹ̀ sọmọ bọ e yin whinwhàn nado dọmọ: “Núdùdù ṣie wẹ nado wà ojlo mẹhe do mi hlan tọn.”—Johanu 4:34.

Enẹwutu naegbọn mí do tin tofi? Taidi Jesu, Sọlọmọni, po devizọnwatọ Jiwheyẹwhe tọn susu devo lẹ po, mí sọgan mọ zẹẹmẹ nugbo ogbẹ̀ tọn po ayajẹ dẹn-to-aimẹ po gbọn ojlo Jiwheyẹwhe tọn wiwà dali. Be hiẹ na jlo nado yọ́n nususu dogọ dogbọn lehe Jiwheyẹwhe nọ yin sinsẹ̀n “to gbigbọ mẹ podọ to nugbo mẹ” do dali ya? (Johanu 4:24) Kunnudetọ Jehovah tọn he tin to lẹdo towe mẹ lẹ na hùnhomẹ nado gọalọna we nado mọ gblọndo na kanbiọ lọ, “Naegbọn mí do tin tofi?”