‘E Sọ Vẹ̀ Mí Nado Yigbe’

JOHẸMẸ nọ yin didohia taun to otò Whèzẹtẹn-waji tọn lẹ mẹ. Di apajlẹ, to Inde, whẹndo de tlẹ sọgan nọ huvẹ do hẹjó jonọ madonukun de. To Iran, onọ̀ de nọ saba tindo núdùdù to aimẹ nado sọgan hẹjó jonọ madonukun lẹ.

Gbẹtọ susu he yin nùdego to Biblu mẹ tindo gbigbọ nunamẹ alọtútlú tọn mọnkọtọn. Apajlẹ ayidego tọn dopo wẹ Lidia, vlavo mẹdiọzun Ju de he nọ nọ̀ Filippi, tòdaho nukundeji de to agbegbe Makedonia tọn mẹ. To gbọjẹzangbe de, apọsteli Paulu po mẹhe to gbejizọnlinzin hẹ ẹ lẹ po mọ Lidia po yọnnu devo lẹ po to otọ̀ de tó to gbonu Filippi tọn. Jehovah hùn ahun Lidia tọn dile Paulu to hodọna yé. Taidi kọdetọn de, ewọ yin bibaptizi po whédo etọn po. Enẹgodo, e basi oylọna gbejizọnlin-basitọ lọ lẹ dọmọ: “Eyin mì yọ́n mi yin nugbonọ hlan [Jehovah], mì bo wá owhé ṣie gbè, na mì ni nọ nọ̀ finẹ.” Luku, gbẹdohẹmẹtọ Paulu tọn dọmọ: ‘E sọ vẹ̀ mí nado yigbe.’—Owalọ lẹ 16:11-15.

Taidi Lidia, Klistiani lẹ nọ hẹjó yisenọ hatọ yetọn lẹ, taidi nugopọntọ tomẹyitọ lẹ po asi yetọn lẹ pọ to egbehe. Jonọyitọ lọ lẹ nọ ‘vẹ̀ yé nado kẹalọyi’ oylọ-basinamẹ yetọn. Taidi kọdetọn de, johẹmẹtọ lọ lẹ nọ duvivi hodọdopọ mẹjlọdote tọn po gbẹdido gbigbọmẹ tọn po. Dile etlẹ yindọ suhugan Kunnudetọ Jehovah tọn lẹ tọn ma tindo nususu to agbasa-liho, yé nọ ‘jo yede hlan johẹmẹ.’ (Lomunu lẹ 12:13; Heblu lẹ 13:2) Gbigbọ nunamẹ tọn yetọn nọ hẹn ayajẹ wá na yé. Na nugbo tọn, owhẹ̀ Jesu tọn whẹ́n to whenuena e dọmọ: “Nado namẹ do dona [kavi ayajẹ] hú nado mọyi.”—Owalọ lẹ 20:35.