‘Sinsẹ́n Didetọn to Yọnhowhe Mẹ’
SUSU mẹhe nọ nọ̀ otò Méditerranée tọn mẹ lẹ wẹ nọ dó odétin wunmẹ de he nọ yin (palmier dattier ) lẹ do whégbè. Atin ehelẹ nọ yọnwhanpẹ bosọ nọ de sinsẹ́n he vivi lẹ tọ́n. Humọ, yé nọ to sinsẹ́n detọ́n na nuhe lán to owhe kanweko ji.
Ahọlu Sọlọmọni Islaeli hohowhenu tọn yí hogbe milomilo lẹ do basi zẹẹmẹ awusọhia teninọ awhli whanpẹnọ Shulamite-nu de tọn bo yí ì jlẹdo odétin de go. (Ohàn Sọlọmọni Tọn 7:7) Owe lọ Plants of the Bible dọmọ: “Hogbe Heblu tọn na palmier dattier wẹ ‘tàmâr.’ . . . Hogbe yẹhiadonu jijọdagbe po whanpẹ po tọn wẹ e yin na Ju lẹ podọ yọnnu lẹ wẹ yé nọ saba do yinkọ enẹ na.” Di apajlẹ, nọviyọnnu-daa whanpẹnọ Sọlọmọni tọn yin yiylọdọ Tamali. (2 Samuẹli 13:1) Mẹjitọ delẹ gbẹsọ nọ do oyín enẹ na viyọnnu yetọn lẹ.
E ma yin yọnnu whanpẹnọ lẹ kẹdẹ wẹ nọ yin yiyijlẹdo odétin go gba. Psalm-kàntọ jihàn dọmọ: “Dodonọ na tọ́nkun taidi odétin: bosọ whẹ́n taidi kedali Lẹbanọni tọn. Yé mẹhe yin didó to ohọ̀ OKLUNỌ tọn mẹ lẹ na tọ́nkun to opá Jiwheyẹwhe mítọn tọn mẹ. Yé na to sinsẹ́n hẹn jẹgbonu wá to yọnho mẹ; yé na dósin bosọ kọ́.”—Psalm 92:12-14.
To yẹhiadonu-liho, mẹhe to Jiwheyẹwhe sẹ̀n po nugbonọ-yinyin po to yọnhowhe yetọn mẹ lẹ yin yiyijlẹdo odétin whanpẹnọ de go. “Jẹgbakun gigo tọn wẹ ota owhànọ, eyin yè mọ ẹn to aliho dodo tọn ji,” wẹ Biblu dọ. (Howhinwhẹn lẹ 16:31) Dile etlẹ yindọ huhlọn mẹhomẹ lẹ tọn sọgan depò dile yé to whinwhẹ́n, yé sọgan gbọṣi dolilo mẹ to gbigbọ-liho gbọn Ohó Jiwheyẹwhe tọn, Biblu pinplọn to gbesisọ mẹ dali. (Psalm 1:1-3; Jẹlemia 17:7, 8) Na hogbe vivi po apajlẹ dagbe yetọn lẹ po wutu, mẹhomẹ nugbonọ lẹ yin asisa tulinamẹ tọn daho de na mẹdevo lẹ bosọ nọ to sinsẹ́n detọ́n to whemẹwhemẹ. (Titu 2:2-5; Heblu lẹ 13:15, 16) Taidi odétin palmier dattier, mẹhomẹ lẹ sọgan to sinsẹ́n detọ́n to yọnhowhe yetọn mẹ.