Be Hiẹ Yọnẹn Ya?

Nawẹ ohù kinkọ̀n tẹmpli Sọlọmọni tọn lọ gblo sọ?

Kandai 1 Ahọlu lẹ 7:26 tọn dọ dọ sinhẹnnú kavi ohù lọ nọ hẹn osin “awulẹtọ̀ [kavi bati] fọtọ́n awe,” ehe yẹwhenọ lẹ nọ yizan to whenuena kandai devo he gando sinhẹnnú dopolọ go to 2 Otannugbo lẹ 4:5 mẹ dọ dọ osin “bati fọtọ́n atọ̀n” wẹ e nọ hẹn. Ehe ko hẹn mẹdelẹ nado wá tadona kọ̀n dọ nuṣiwa wekantọ he vọ́ owe Otannugbo lẹ tọn kàn lẹ tọn wẹ zọ́n bọ vogbingbọn enẹ do tin.

Ṣigba, Biblu Traduction du monde nouveau gọalọna mí nado mọnukunnujẹemẹ dọ wefọ awe ehelẹ ma sọta yedelẹ. Sọgbe hẹ lẹdogbedevomẹ enẹ, mí hia to 1 Ahọlu lẹ 7:26 mẹ dọ: “Bati fọtọ́n donu awe wẹ e nọ hẹn.” Ṣigba, 2 Otannugbo lẹ 4:5 dọmọ: “Taidi sinhẹnnú de, e sọgan hẹn bati fọtọ́n donu atọ̀n.” Doayi e go dọ 2 Otannugbo lẹ 4:5 dlẹnalọdo osin he sinhẹnnú tẹmpli lọ tọn na penugo nado hẹn to blebu mẹ, yèdọ osin he e sọgan hẹn, to whenuena 1 Ahọlu lẹ 7:26 do fie osin nọ saba yin kinkọ̀n do e mẹ jẹ hia. To hogbe devo mẹ, osin ma nọ yin kinkọ̀n gọ́ e mẹ gbede. E taidi dọ osin he nọ yin kinkọ̀n do e mẹ to paa mẹ ma nọ zẹ̀ madoawe daa nugopipe etọn tọn go.

Naegbọn gànkuẹ dopo gee wẹ Jesu po Pita po yí do sú takuẹ tẹmpli tọn lọ?

To azán Jesu tọn gbè, sunnu depope he tindo owhe 20 linlán bo yin hagbẹ sinsẹ̀n Ju lẹ tọn dona nọ sú takuẹ whemẹwhemẹ tẹmpli tọn he yin odaa ṣekẹli tọn, yèdọ dlakma awe kavi didrachme dopo. Ehe nọtena azọ́nkuẹ azán awe tọn. To whenuena kanbiọ de fọ́n gando takuẹ ehe súsú go, Jesu dọna Pita dọmọ: “Yì ohù mẹ, bo dlan omlẹn de do otọ̀ mẹ, bo ze whèvi tintan he wá aga; whenuena hiẹ kẹ̀ onù etọn, hiẹ na mọ ṣekẹli de; enẹ hiẹ ni yí na yé na yẹn po hiẹ po tọn.”—Matiu 17:24-27.

Weyọnẹntọ susu lẹndọ gànkuẹ ṣekẹli tọn he yin nùdego tofi lọ wẹ tetradrachme. Gànkuẹ ehe sọzẹn hẹ dlakma ẹnẹ, yèdọ nuhe pé nado sú takuẹ tẹmpli tọn lọ na omẹ awe. Gànkuẹ tetradrachme tọn gbayipe taun bosọ tin-to-aimẹ hugan didrachme tọn lọ. Enẹwutu, wezẹhomẹ The New Bible Dictionary basi zẹẹmẹ dọmọ: “E taidi dọ Juvi awe awe nọ saba kọ̀n yede dopọ nado sú takuẹ Tẹmpli tọn lọ.”

Humọ, mẹdepope he jlo na sú takuẹ mẹdopo gee tọn dona suahọ de na akuẹ-ṣiṣẹ́. Ahọ́ ehe sọgan yì kakajẹ 8 to kanweko ji akuẹ he yin ṣiṣẹ́ lọ tọn. Ṣigba, mẹhe sú takuẹ omẹ awe tọn dopọ ji lẹ ma nọ suahọ akuẹ-ṣiṣẹ́ tọn enẹ. Enẹwutu, etlẹ yin to nudọnamẹ he sọgan taidi nutata ehe mẹ, kandai he yin bibasi gbọn Matiu dali sọgbe hẹ nuhe yin yinyọnẹn gando aṣa he gbayipe to azán Jesu tọn gbè lẹ go.

[Yẹdide to weda 27]

Tetradrachme he yin hinhẹn klo de