“Oyín Wiwe Daho Hugan Jiwheyẹwhe Tọn lọ Die Nugbonugbo”
Nicholas Cusa tọn wẹ zan hogbe enẹlẹ to hodidọ gbangba tọn de mẹ, he e dọ to owhe 1430.a Dawe de wẹ e yin he nọ tindo ojlo to nususu mẹ. Di apajlẹ, e plọn Glẹkigbe, Heblugbe, tamẹnuplọnmẹ, sinsẹ̀n-nuplọnmẹ, nulinlẹn po sunwhlẹvu pinplọn po. To owhe 22 mẹvi yinyin mẹ, e lẹzun wesetọ daho to osẹ́n Ṣọṣi Katoliki Lomu tọn mẹ. To 1448, e yin dide taidi yẹwhenọ daho de.
To nudi owhe 550 die wayi, Nicholas Cusa tọn do owhé mẹgopinpọn yọnhonọ lẹ tọn de ai to Kues, he yin yinyọnẹn todin taidi Bernkastel-Kues, yèdọ tòpẹvi de he tin to nudi kilomẹtlu 130 do hùwaji Bonn tọn to Allemagne. Wesẹdotẹn Cusa tọn he bẹ alọnuwe-hihia he hugan 310 hẹn sọ tin to owhé enẹ dopolọ gbè todin. Dopo to alọnuwe-hihia lọ lẹ mẹ wẹ Codex Cusanus 220 he mẹ hodidọ gbangba tọn he yin didọ to Cusa to 1430 lọ sọgan yin mimọ te. To hodidọ enẹ he hosọ etọn yin In principio erat verbum (To Whẹwhẹwhenu Wẹ Ohó lọ Ko Tin) mẹ, Nicholas Cusa tọn yí hogbe Latin tọn lọ Iehoua zan nado dlẹnalọdo Jehovah.b Weda 56tọ bẹ hogbe he bọdego ehelẹ hẹn gando oyín Jiwheyẹwhe tọn go dọmọ: “Yinkọ he Jiwheyẹwhe lọsu do na ede wẹ. Tetlaglamu lọ wẹ, yèdọ oyín he bẹ wekun enẹ hẹn. . . . Oyín wiwe daho hugan Jiwheyẹwhe tọn lọ die nugbonugbo.” Nuhe Nicholas Cusa tọn dọ tin to kọndopọ mẹ hẹ nugbo lọ dọ oyín Jiwheyẹwhe tọn sọawuhia to kandai dowhenu Owe-wiwe Heblu tọn lẹ mẹ.—Eks. 6:3.
Codex he ko tin sọn bẹjẹeji owhe kanweko 15tọ tọn ehe wẹ dohó hugan to kandai he mẹ Tetlaglamu lọ yin lilẹdo “Iehoua” te lẹ mẹ. Kandai ehe dekunnu yinukọn dogọ dọ hogbe he jlo na taidi “Jehovah” lẹ wẹ nọ saba yin yiyizan to owe lẹ mẹ na oyín Jiwheyẹwhe tọn to owhe kanweko lẹ gblamẹ.
[Nudọnamẹ odò tọn lẹ]
a Nicholas Cusa tọn sọ nọ yin yiylọdọ Nikolaus Cryfts (Krebs), Nicolaus Cusanus podọ Nikolaus von Kues. Tòpẹvi Allemagne tọn he mẹ e yin jiji te wẹ nọ yin Kues.
b Hodidọ gbangba tọn lọ nọgodona Atọ̀n-to-Dopomẹ.
[Yẹdide to weda 16]
Wesẹdotẹn Cusa tọn