Dọnsẹpọ Jiwheyẹwhe

Be Nude Sọgan Vẹna Jiwheyẹwhe bọ E Na Diọlinlẹn Ya?

WHẸDATỌ 2:11-18

TAIDI gbẹtọvi mapenọ, mímẹpo wẹ nọ diọlinlẹn to whedelẹnu. Di apajlẹ, e sọgan vẹna mí to whenuena mí mọdọ mí ṣì nude wà. Ṣigba Biblu dọ dọ Jehovah lọsu sọgan diọlinlẹn. Ehe sọgan paṣa we bọ hiẹ na dọ dọ, ‘Mẹpipe wẹ Jiwheyẹwhe ma. E ma nọ ṣinuwa nẹ!’ To whelọnu lo, aliho tẹ mẹ wẹ onú nọ vẹna Jiwheyẹwhe bọ e nọ diọlinlẹn te? Gblọndo lọ sọgan gọalọna mí nado mọnukunnujẹ onú titengbe de mẹ: Jehovah tindo numọtolanmẹ, podọ nuyiwa mítọn lẹ nọ yinuwado numọtolanmẹ etọn lẹ ji. Mì gbọ mí ni lẹnnupọndo nuhe tin to Whẹdatọ 2:11-18 mẹ ji.

Owe Biblu tọn he yin Whẹdatọ basi todohukanji ojlẹ hunyanhunyan delẹ tọn to whenuho Islaeli tọn mẹ. Akọta lọ ko wá Kenani todin, yèdọ aigba he Jiwheyẹwhe dopagbe etọn na Ablaham. To owhe kanweko he bọdego lẹ gblamẹ, nuhe Islaelivi lẹ wà po nuhe jọ do yé go po sọgan yin bibladopọ do adà voovo ẹnẹ ji: yé nọ gbẹ́ Jehovah dai, yé nọ yin kọgbidina, yé nọ vẹvẹna Jiwheyẹwhe, podọ ewọ nọ whlẹn yé gán.a

Yé gbẹ́ Jehovah dai. Na Islaelivi lẹ joawuna nuyiwadomẹji Kenaninu lẹ tọn wutu, yé “gbẹ́ OKLUNỌ dai” bo jẹ yẹwhe devo lẹ hodo ji; na taun tọn, yé “to Baali po Aṣitalọti po sẹ̀n.”b Atẹṣiṣi wẹ nuyiwa yetọn enẹ yin. Abajọ yé do “hẹn OKLUNỌ gblehomẹ,” yèdọ Jiwheyẹwhe he tún Islaeli dote sọn Egipti!—Wefọ 11-13; Whẹdatọ 2:1.

Yé yin kọgbidina. Nuhe Islaelivi lẹ wà fọ́n homẹgble dodo Jehovah tọn dote bọ e de hihọ́ etọn sọn akọta he gbẹ́ ẹ dai ehe ji. Enẹwutu, Islaelivi lẹ jai jẹ “alọ kẹntọ yetọn lẹ tọn mẹ,” yèdọ mẹhe wá bo bẹ nutindo yetọn lẹ yì taidi ogblànnu.—Wefọ 14.

Yé vẹvẹna Jiwheyẹwhe. To whenuena Islaelivi lẹ to awufiẹsa sinsinyẹn mẹ, nuhe yé wà wayi lẹ vẹna yé bọ yé dawhá ylọ Jiwheyẹwhe na alọgọ. Ehe wẹ wefọ 18tọ na ko to didohia to whenue e dọ dọ yé to ‘winwẹ̀n gbọn yé he to nukunbiana yé lẹ dali.’ Nuhe Islaelivi lẹ nọ wà to whenẹnu ján niyẹn. (Whẹdatọ 3:9, 15; 4:3; 6:6, 7; 10:10) Nawẹ Jiwheyẹwhe yinuwa gbọn?

Jiwheyẹwhe whlẹn yé gán. Jehovah sè winwẹ̀n Islaelivi lẹ tọn bọ e “blawuna” ẹn. To Heblugbe dowhenu tọn mẹ, hogbe he yin lilẹdo “blawuna” sọgan zẹẹmẹdo nado “diọlinlẹn na mẹde.” Owe alọdlẹndonu tọn de dọmọ: “Na winwẹ̀n yetọn whàn Jehovah wutu, e diọ yasanamẹ etọn do whlẹngán.” To lẹblanu etọn mẹ, Jehovah “ze whẹdatọ lẹ tite,” bọ yé whlẹn omẹ etọn lẹ sọn alọ kẹntọ yetọn lẹ tọn mẹ.—Wefọ 18.

Be a doayi nuhe whàn Jiwheyẹwhe nado diọlinlẹn go ya? Jijọ he omẹ etọn lẹ diọ wẹ zọ́n. Lẹnnupọn vude: Otọ́ owanyinọ de sọgan domẹplọnlọ ovi tolivẹtọ de go, vlavo bo glọnalina ẹn ma nado wà nuhe e yiwanna delẹ. Ṣigba, whenue e mọdọ ovi lọ lẹnvọjọ, otọ́ lọ sọgan basi dide nado doalọtena mẹplọnlọ lọ.

Etẹwẹ kandai ehe plọn mí gando Jehovah go? Dile etlẹ yindọ ylanwiwa sọn ojlo mẹ nọ gblehomẹna ẹn, lẹnvọjọ sọn ahun mẹ wá nọ whàn ẹn nado do lẹblanu hia. Nugbo lọ dọ nuhe mí nọ wà sọgan yinuwado numọtolanmẹ Jiwheyẹwhe tọn ji dona hẹn mí lẹnnupọn. Be e ma jẹ dọ mí ni wà nuhe nọ ‘hẹn homẹ Jehovah tọn hùn’ ya? (Howhinwhẹn lẹ 27:11) Eyin mí wàmọ, e ma na vẹna mí pọ́n gbede.

[Nudọnamẹ odò tọn]