Kanbiọ lẹ sọn Wehiatọ lẹ Dè

Whetẹnu wẹ e sọgan biọ dọ mẹde ni vọ́ baptẹm yí?

To ninọmẹ delẹ mẹ, mẹhe ko yí baptẹm de sọgan lẹndọ baptẹm he emi yí dai ma sọgbe bo mọdọ emi dona vọ́ baptẹm yí. Di apajlẹ, mẹde sọgan to nude wà to nuglọ kavi to mahẹ tindo to walọ delẹ mẹ to whenue e jlo na yí baptẹm bọ e yindọ e ko yí baptẹm dai wẹ, e sọgan yin didesẹ sọn agun mẹ. Be mí sọgan dọ dọ e basi klandowiwe na Jiwheyẹwhe to ninọmẹ mọnkọtọn lẹ mẹ ya? Kiki eyin omẹ mọnkọtọn ko doalọtena walọ etọn he ma sọgbe hẹ Owe-wiwe wẹ mí sọgan dọ dọ klandowiwe etọn na Jehovah sọgbe. Enẹwutu, eyin mẹde yí baptẹm to ninọmẹ ylankan mọnkọtọn mẹ, e sọgan lẹnnupọn vlavo eyin e na vọ́ baptẹm yí kavi lala.

Etẹwẹ dogbọn mẹhe ma yí ylando do do aṣa to whenue e jlo na yí baptẹm ṣigba bo waylando to baptẹm etọn godo bọ e biọ dọ ni pannukọn wedegbẹ́ whẹdida tọn dali? Mí ni dọ dọ e wá sọalọakọ́n todin dọ emi ma mọnukunnujẹ nuhe wà emi te mẹ ganji to whenue emi jlo na yí baptẹm bo dọ dọ baptẹm emitọn ma sọgbe paali. To whenuena mẹho lẹ sinai hẹ ylanwatọ de, yé ma dona fọ́n ayihaawe dote gando baptẹm etọn go bo kanse e eyin e lẹndọ klandowiwe po baptẹm etọn po sọgbe. To popolẹpo mẹ, e sè hodidọ he sinai do Biblu ji gando nujọnu-yinyin baptẹm tọn go. E saa yigbena kanbiọ klandowiwe po baptẹm po tọn lẹ po ogbè he tátá po. Enẹgodo, e yì diọ avọ̀ bo yin yinylọndo osin mẹ. To whelọnu lo, e sọgbe hẹ lẹnpọn dagbe nado dọ dọ ewọ mọnukunnujẹ nujọnu-yinyin nuhe wà e te tọn mẹ ganji. Enẹwutu, mẹho lẹ na penukundo whẹho etọn go taidi mẹhe yí baptẹm.

Eyin mẹlọ fọ́n ayihaawe dote dọ baptẹm emitọn ma sọgbe, mẹho lẹ sọgan dọna ẹn nado yì pọ́n Atọ̀họ̀-Nuhihọ́ lọ Tọn [Glẹnsigbe] 1^er mars 1960, weda 159 po 160 po, gọna 15 février 1964, weda 123 jẹ 126, kavi fie whẹho baptẹm vivọ́ yí tọn yin hodọdeji te devo lẹ. Whẹho mẹdetiti tọn wẹ e yin vlavo eyin mẹde na vọ́ baptẹm yí to ninọmẹ delẹ mẹ (taidi eyin mẹlọ ma tindo nukunnumọjẹnumẹ Biblu tọn ganji to whenuena e yí baptẹm).

Etẹlẹ wẹ Klistiani lẹ dona hẹn do ayiha mẹ gando adọtẹn mimá zan go?

Mẹlẹpo wẹ tindo nuhudo adọtẹn tọn. Ṣigba to egbehe, mẹsusu ma tindo owhé yetọn titi. Ninọmẹ mẹde tọn to akuẹzinzan-liho, whẹho agbasalilo tọn lẹ, kavi nudevo lẹ sọgan hẹn ẹn zun dandan na hẹnnumẹ lẹ, gọna hagbẹ whẹndo tọn delẹ nado nọpọ́. To otò delẹ mẹ, hẹnnumẹ lẹ nọ finyọ́n yedelẹ do họ̀nu dopo mẹ sọmọ bọ nuglọ de ma nọ tin na aṣli mẹdetiti tọn.

E ma yin azọngban titobasinanu Jehovah tọn nado wleawuna nunọwhinnusẹ́n gblẹlẹ na agun lẹpo lẹdo aihọn pé gando adọtẹn mimá zan go gba. Klistiani lẹ yin tulina nado nọ hẹn nunọwhinnusẹ́n Owe-wiwe tọn lẹ do ayiha mẹ nado yọnẹn eyin homẹ Jiwheyẹwhe tọn hùn do lehe yé nọ má adọtẹn zan hẹ mẹdevo lẹ do go kavi lala. Etẹwẹ yin delẹ to nunọwhinnusẹ́n ehelẹ mẹ?

Kanbiọ titengbe he mí dona kanse míde lẹ wẹ yindọ: Nawẹ adọtẹn mimá zan hẹ mẹdevo lẹ na yinuwado mí ji podọ do gbigbọnọ-yinyin mítọn ji gbọn? Gbẹtọ alọpa tẹlẹ wẹ mí jlo na má adọtẹn hẹ? Be yé nọ sẹ̀n Jehovah ya? Be yé nọ nọgbẹ̀ sọgbe hẹ nujinọtedo Biblu tọn lẹ ya? Apọsteli Paulu wlan dọmọ: “Yè klọ mì blo. Gbẹdido ylankan lẹ nọ hẹn walọ dagbe lẹ gble.”—1 Kọl. 15:33.

Owe-wiwe basi zẹẹmẹ dọ Jehovah gblewhẹdo galilọ po ayọdide po. (Heb. 13:4) Enẹwutu e họnwun dọ, Jiwheyẹwhe ma kẹalọyi dọ sunnu po yọnnu po he ma yin asu po asi po ni nọ dọ́ họ̀nu dopolọ mẹ. Klistiani de ma na jlo nado nọ fie fẹnnuwiwa yin alọkẹyi te gba.

Humọ, Biblu dotuhomẹna mẹhe jlo na mọ nukundagbe Jiwheyẹwhe tọn lẹpo nado nọ “họ̀nna galilọ.” (1 Kọl. 6:18) Enẹwutu, nuyọnẹnnu wẹ e yin dọ Klistiani lẹ ni dapana adọtẹn mimá zan depope he sọgan hẹn yé nado tindo mahẹ to walọ fẹnnuwiwa tọn mẹ. Di apajlẹ, mí ni dọ dọ Klistiani susu nọ dọ́ owhé dopolọ gbè. Be ninọmẹ mọnkọtọn sọgan ze yé do whlepọn mẹ ya? Eyin e ka jọ bọ omẹ awe he ma yin asu po asi po wá mọ yedeṣo to whégbè na mẹhe pò lẹ ko tọ́n sọn whégbè wutu lo? Mọdopolọ, owùnu wẹ e na yin na sunnu po yọnnu po tlẹnnọ he tindo ojlo owanyi tọn na ode awetọ nado nọ nọ̀ owhé dopolọ gbè. Nuyọnẹnnu wẹ e na yin nado nọ dapana ninọmẹ ehelẹ nkọ.

E masọ sọgbe dọ alọwlemẹ he ko gbẹ́ yede dai lẹ ni nọ nọ̀ owhé dopolọ gbè. Haṣinṣan pẹkipẹki he yé ko tindo dai sọgan hẹn yé nado jai jẹ fẹnnuwiwa mẹ.—Howh. 22:3.

Onú devo he yin nujọnu bọ mí dona hẹn do ayiha mẹ wẹ yin nukun he mẹhe to lẹdo lọ mẹ lẹ na yí do pọ́n nudide he mí basi. Eyin Klistiani de mọdọ aliho he mẹ emi to adọtẹn má zan hẹ mẹdevo lẹ te sọgbe, ṣigba bọ mẹhe to lẹdo lọ mẹ lẹ to homọdọdo ninọmẹ lọ go, e jẹ dọ ni lẹnnupọndo whẹho lọ ji. Mí ma na jlo gbede dọ nuyiwa mítọn ni kọnmasin do oyín Jehovah tọn go. Paulu dọ dọ: “Mì lẹzun ahlidanu na Ju lẹ kavi Glẹkinu lẹ podọ na agun Jiwheyẹwhe tọn blo, yèdọ dile yẹn nọ to homẹ mẹlẹpo tọn hẹn hùn to onú lẹpo mẹ do, bo ma nọ to ale dee titi tọn dín adavo mẹsusu tọn, na yé nido sọgan yin whinwhlẹngán.”—1 Kọl. 10:32, 33.

Nuhahun sinsinyẹn wẹ e yin na mẹhe jlo na hẹn nujinọtedo dodo Jehovah tọn go lẹ nado mọ adọtẹn he sọgbe. Ṣigba, Klistiani lẹ dona “to dodinna nuhe Oklunọ kẹalọyi lẹ zọnmii.” Yé ma dona dike nuhe ma sọgbe depope ni jọ to owhé yetọn gbè. (Efe. 5:5, 10) Ehe biọ dọ Klistiani lẹ ni nọ hodẹ̀ nado biọ anademẹ Jiwheyẹwhe tọn bo wà nuhe go yé pé lẹpo nado basi hihọ́na dagbemẹninọ ode awetọ tọn to agbasa po walọyizan po liho, podọ na oyín dagbe Jehovah tọn.