Be A Ko Tindo Numọtolanmẹ Ṣokẹdẹninọ Tọn Kavi Dibu Pọ́n Ya?

MẸSUSU wẹ nọ tindo numọtolanmẹ ṣokẹdẹninọ tọn to egbehe; yé nọ mọdọ mẹdepope ma to emitọn hòpọn. Mẹhomẹ lẹ wẹ nọ saba tindo numọtolanmẹ ehe. Ṣigba to egbehe, susu yọpọvu lẹ tọn wẹ nọ tindo numọtolanmẹ ṣokẹdẹninọ tọn bosọ nọ dibu etlẹ yin susu mẹhe nọ sẹ̀n Jiwheyẹwhe lẹ tọn ga. Be a yọ́n nuhewutu wẹ ya?—a

Whẹwhinwhẹ́n susu wẹ na ko zọ́n. Dike mí ni dọhodo apajlẹ dawe he nọgbẹ̀ to ojlẹ dindẹn die wayi de tọn ji—enẹ wẹ nudi owhe fọtọ́n jẹnukọnna jiji Jesu tọn. Elija wẹ e nọ yin. E nọgbẹ̀ to whenue akọta Islaeli tọn doalọtena Jiwheyẹwhe nugbo lọ, yèdọ Jehovah sinsẹ̀n. Suhugan yetọn wẹ jẹ sinsẹ̀n-basi hlan yẹwhe lalo, Baali ji. Elija dọmọ: “Yẹn ṣokẹdẹ yè pò dai.” Ṣigba be a lẹndọ Elija kẹdẹ wẹ gbẹ́ pò to Jehovah sẹ̀n to whenẹnu nugbonugbo ya?—

Dile etlẹ yindọ Elija ma yọnẹn, gbẹtọ susu devo lẹ gbẹ́ pò to Jiwheyẹwhe nugbo lọ sẹ̀n to Islaeli. Ṣigba, yé họnbẹ na yé to obu di wutu. Be a yọ́n nuhewutu wẹ ya?—

Ahabi, yèdọ ahọlu Islaeli tọn ma yin sinsẹ̀n-basitọ Jehovah tọn; asi kanylantọ etọn, Jezebẹli sin yẹwhe lalo he nọ yin Baali wẹ e nọ sẹ̀n. Enẹwutu Ahabi po asi etọn po to mẹhe nọ sẹ̀n Jehovah lẹ dín nukunawe nado hù yé, titengbe Elija. Nuhewutu Elija họnyi niyẹn. E basi nudi kilomẹtlu 483 nado họnyi danfafa Holẹbi tọn ji, fie sọ nọ yin yiylọdọ Sinai to Biblu mẹ. Finẹ wẹ Jehovah na Gbedide Ao lẹ po Osẹ́n devo lẹ po omẹ etọn lẹ te, owhe kanweko susu jẹnukọnna ojlẹ Elija tọn. Elija họnbẹ do aigbaslo de mẹ to Holẹbi, fie mẹde ma na mọ ẹn te. Be hiẹ lẹndọ Elija na ko dibu ya?—

Biblu dohia dọ to ojlẹ de mẹ wayi, Jehovah yí Elija zan nado wà azọ́njiawu delẹ. To nujijọ de whenu, Jehovah sè odẹ̀ Elija tọn gbọn miyọ́n yiyizan nado fiọ avọ́sinsan de dali. To ninọmẹ enẹ mẹ, Jehovah dohia dọ Emi wẹ Jiwheyẹwhe nugbo lọ, e ma yin Baali gba. Whenue Elija to aigbaslo lọ mẹ, Jehovah dọhona ẹn.

“Etẹ hiẹ to wiwà tofi?” wẹ Jehovah kanse e. To whenẹnu wẹ Elija dọ dọ ‘Yẹn ṣokẹdẹ wẹ yè pò dai sọn mẹhe to sinsẹ̀n we lẹ mẹ.’ Taidi kọdetọn de, Jehovah jla pọndohlan Elija tọn do dọmọ, ‘Gbẹtọ fọtọ́n ṣinawe gbẹ́ pò he to sinsẹ̀n mi.’ Jehovah dọna Elija nado lẹkọ na Emi gbẹ́ tindo azọ́n susu nado zọ́n ẹn.

Etẹwẹ a lẹndọ mí sọgan plọn sọn apajlẹ Elija tọn mẹ?— Mẹhe nọ sẹ̀n Jehovah lẹ lọsu tlẹ nọ dibu to whedelẹnu. Enẹwutu, vlavo mí yin jọja wẹo kavi mẹho, mímẹpo wẹ dona nọ lẹhlan Jehovah na e nido gọalọna mí. Biblu dopagbe dọmọ: “OKLUNỌ ma dẹn do yé he to awhádo ylọ ẹ lẹ dè gba.”

Nudevo he mí sọgan plọn die: Mẹmẹsunnu po mẹmẹyọnnu he yiwanna Jehovah bosọ yiwanna mí lẹ po ma dẹ́n to fide. Biblu dọmọ: “Onú dopolọ lẹ to yajiji-liho wẹ to yinyin hinhẹnwa pipli mẹmẹsunnu [mítọn] lẹ tọn pete ji to aihọn mẹ.” Na taun tọn, be homẹ ma hùn we nado yọnẹn dọ mí ma tin míde ṣo ya?—