Plọnnu sọn Ohó Jiwheyẹwhe Tọn Mẹ

Naegbọn Jiwheyẹwhe Jotẹnna Ylanwiwa po Yajiji Po?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Nawẹ ylanwiwa bẹjẹeji gbọn?

Ylanwiwa bẹjẹeji to aigba ji to whenue Satani dolalo tintan lọ. Satani ma yin mẹylankan to whenue Jiwheyẹwhe dá ẹ gba. Angẹli pipé de wẹ e yin, ṣigba e ma “nọte to nugbo mẹ.” (Johanu 8:44) E wleawuna ojlo lọ nado yin sinsẹ̀n-basi hlan, yèdọ jlọjẹ de he Jiwheyẹwhe kẹdẹ jẹna. Satani dolalo na Evi bo diọlinlẹnna ẹn nado setonuna ewọ kakati nido yin na Jiwheyẹwhe. Adam kọnawudopọ hẹ Evi nado vẹtoli. Nudide Adam tọn hẹn yajiji po okú po wá.—Hia Gẹnẹsisi 3:1-6, 17-19.

Satani fọ́n atẹṣiṣi dote sọta nupojipetọ-yinyin Jiwheyẹwhe tọn to whenue e sisẹ́ Evi nado vẹtolina Jiwheyẹwhe. Mẹsusu wẹ ko kọnawudopọ hẹ Satani nado gbẹ́ Jiwheyẹwhe dai taidi Ogán. Gbọnmọ dali, Satani lẹzun “ogán aihọn tọn.”—Hia Johanu 14:30; Osọhia 12:9.

2. Be nudida Jiwheyẹwhe tọn lẹ tindo oblọ wẹ ya?

Gbẹtọ po angẹli lẹ po penugo nado setonuna nubiọtomẹsi Jiwheyẹwhe tọn lẹ ganji. (Deutelonomi 32:5) Ewọ dá mí po mẹdekannujẹ nudide bibasi tọn po nado wà dagbe kavi oylan. Enẹ hùn dotẹnmẹ dotena mí nado do owanyi mítọn hia Jiwheyẹwhe.—Hia Jakọbu 1:13-15; 1 Johanu 5:3.

3. Naegbọn Jiwheyẹwhe jotẹnna yajiji?

Jehovah jotẹnna atẹṣiṣi sọta nupojipetọ-yinyin etọn na ojlẹ de. Etẹwutu? Nado dohia dọ vivẹnudido gbẹtọvi lẹ tọn nado dugán matin godonọnamẹ etọn ma na hẹn ale wá. (Jelemia 10:23) Hugan owhe 6000 todin, kọdetọn lọ ko họnwun. Togán lẹ ma ko penugo nado de awhàn, danuwiwa, whẹdida mawadodo po azọ̀n po sẹ̀.—Hia Yẹwhehodọtọ 7:29; 8:9; Lomunu lẹ 9:17.

Ṣigba, mẹhe kẹalọyi Jiwheyẹwhe taidi Ogán yetọn lẹ nọ mọ ale susu yí. (Isaia 48:17, 18) To madẹnmẹ, Jehovah na sukúndona gandudu gbẹtọvi tọn lẹpo. Mẹhe jlo dọ Jiwheyẹwhe ni dugán do emi ji lẹ kẹdẹ wẹ na nọgbẹ̀ to aigba ji.—Isaia 2:3, 4; 11:9; hia Daniẹli 2:44.

4. Dotẹnmẹ tẹwẹ homẹfa Jiwheyẹwhe tọn hùn dotena mí?

Satani sọalọakọ́n dọ gbẹtọvi depope ma sọgan setonuna Jehovah mlẹnmlẹn gba. Homẹfa Jiwheyẹwhe tọn hùn dotẹnmẹ dotena mímẹpo nado dohia vlavo eyin mí jlo dọ Jiwheyẹwhe ni dugán do mí ji kavi gbẹtọ. Gbẹzan he zan mí te wẹ nọ do mẹhe mí de taidi ogán hia.—Hia Job 1:8-11; Howhinwhẹn lẹ 27:11.

5. Nawẹ mí sọgan de Jiwheyẹwhe taidi Ogán gbọn?

Mí sọgan wàmọ eyin mí dín sinsẹ̀n-bibasi nugbo he sinai do Ohó etọn ji bo doafọna ẹn. (Johanu 4:23) Humọ, mí ma nọ doalọ tonudidọ po awhàn po mẹ, dile Jesu wà do. —Hia Johanu 17:14.

Satani nọ yí huhlọn etọn zan nado nọgodona fẹnnuwiwa po danuwiwa po. Eyin mí gbẹ́ onú enẹlẹ dai, delẹ to họntọn kavi hẹnnumẹ mítọn lẹ mẹ sọgan ṣàn mí ko kavi diọnukunsọ mí. (1 Pita 4:3, 4) Enẹwutu, nudide lọ pò to mílọsu si. Be mí na dogbẹ́ hẹ mẹhe yiwanna Jiwheyẹwhe lẹ ya? Be mí na setonuna osẹ́n etọn lẹ ya? Eyin mí wàmọ, mí na do alọsọakọ́n Satani tọn dọ gbẹtọvi depope ma sọgan setonuna Jiwheyẹwhe hia taidi lalo.—Hia 1 Kọlintinu lẹ 6:9, 10; 15:33.

Nado mọ nudọnamẹ dogọ, pọ́n weta 11tọ owe ehe tọn, Etẹwẹ Biblu Plọn Mí Taun?, he Kunnudetọ Jehovah tọn lẹ zinjẹgbonu.

[Yẹdide to weda 24]

Adam basi nudide ylankan

[Yẹdide to weda 25]

Nudide he mí basi lẹ nọ dohia vlavo eyin mí de Jiwheyẹwhe taidi Ogán mítọn kavi lala