Mẹsusu Jlo Na Yọ́n Nugbo lọ Gando Jesu Go

“Diblayin mẹlẹpo wẹ tindo pọndohlan yetọn titi lẹ gando mẹhe [Jesu] yin go. Mahopọnna obá he mẹ mí tindo yise kavi ma tindo yise jẹ, mímẹpo wẹ nọ kanse míde dọ, ‘Mẹnu wẹ dawe ehe yin?’”—WEKANTỌ STAN GUTHRIE

GBẸTỌ lẹ nọ dín tlintlindo gando Jesu go. Owe he dọho gandego lẹ nọ disa taun. Mọjanwẹ sinima he nọ do e hia lẹ ko gbayipe do niyẹn. Etomọṣo, mẹsusu gbẹ́ tindo kanbiọ lẹ gando Jesu go. Gbẹtọ lẹ tindo linlẹn voovo lẹ gando mẹhe Jesu yin na taun tọn go.

To owhe delẹ die wayi, linlinwe-kantọ awe basi oylọna gbẹtọ lẹ nado na gblọndo kanbiọ lọ “Mẹnu wẹ Jesu yin?” tọn to Internet ji. Gblọndo he yé mọyi delẹ die:

● “Labi (mẹplọntọ) de wẹ ewọ yin, mẹhe ze apajlẹ mẹtọnhopọn tọn dai na mí to gbẹzan etọn mẹ.”

● “Gbẹtọ míwlẹ nkọ he zan gbẹzan vonọtaun de wẹ ewọ yin.”

● “Kunnudenu depope ma tin dọ Jesu nọgbẹ̀ pọ́n.”

● “Jesu yin Visunnu Jiwheyẹwhe tọn he yin jiji bo kú bosọ yin finfọnsọnku nado whlẹn mí sọn ylando mítọn lẹ si. E tin to ogbẹ̀ to egbehe, podọ Ewọ na gbẹsọ wá aigba ji.”

● “N’yise dọ Jesu Klisti kẹdẹ wẹ yin visunnu Jiwheyẹwhe tọn he yin gbẹtọ bosọ yin omẹ gbigbọnọ to ojlẹ dopolọ mẹ.”

● “Yọpọvu lẹ janwẹ sọgan yí otàn Jesu tọn lẹ sè.”

E họnwun dọ pọndohlan voovo mọnkọtọn lẹpo ma sọgan sọgbe. Be asisa nudọnamẹ dejidego tọn de tin he sọgan na gblọndo he sọgbe na kanbiọ mítọn lẹ gando Jesu go ya? Mẹhe nọ zín linlinnamẹwe ehe jẹgbonu lẹ yise dọ Biblu yin Ohó Jiwheyẹwhe tọn podọ ewọ kẹdẹ wẹ sọgan dọ nugbo lẹpo na mí gando Jesu go.a—2 Timoti 3:16.

To hosọ he bọdego mẹ, mí na dọhodo gblọndo Biblu tọn na delẹ to kanbiọ he nọ saba yin kinkanse gando Jesu go lẹ mẹ ji. Ewọ lọsu wẹ dọ dọ whlẹngán yọnbasi na “mẹdepope he do yise hia to [emi] mẹ.” (Johanu 3:16) Mí basi oylọna we nado gbadopọnna kanbiọ lọ lẹ bo basi dide nado plọn nususu dogọ gando Jesu go po lehe a sọgan do yise hia to ewọ mẹ do po.

[Nudọnamẹ odò tọn]