Dọnsẹpọ Jiwheyẹwhe
Ahọsumẹtọ Mẹhe Nọ Sẹ̀n Ẹn Lẹpo Tọn
“A WANU.” Be homẹ ma nọ hùn we nado sè hogbe pinpẹn-nutọn-yinyọnẹn tọn ehe nkọ lẹ to whenue hiẹ wà azọ́n de ganji kavi basi nunina de sọn ahun mẹ wá ya? Mímẹpo wẹ nọ jlo dọ mẹdevo lẹ—titengbe mẹhe mí yiwanna lẹ—ni yọ́n pinpẹn vivẹnudido mítọn lẹ tọn. Hú popolẹpo, mí yiwanna Jehovah, Jiwheyẹwhe mítọn. Ṣigba, be ewọ nọ yọ́n pinpẹn vivẹnu he mí nọ do nado sẹ̀n ẹn lẹ tọn ya? Gbọ mí ni gbadopọnna lehe e yinuwa hẹ Ebẹdi-melẹki, dawe de he ze ogbẹ̀ etọn do owù mẹ nado whlẹn dopo to yẹwhegán Jiwheyẹwhe tọn lẹ mẹ do.—Hia Jelemia 38:7-13 po 39:16-18 po.
Mẹnu wẹ Ebẹdi-melẹki? Matin ayihaawe, ahọluzọnwatọ de wẹ e yin to họ̀nmẹ Ahọlu Zedekia Juda tọn.a Ebẹdi-melẹki nọgbẹ̀ to azán Jelemia tọn gbè, podọ Jelemia wẹ Jiwheyẹwhe dohlan nado yì na avase akọta Juda tọn he ma yin nugbonọ lọ gando vasudo he ja e ji lọ go. Ahọvi he ma nọ sẹ̀n Jiwheyẹwhe lẹ ṣẹnṣẹn wẹ Ebẹdi-melẹki nọ, ṣogan ewọ nọ dibusi Jiwheyẹwhe bosọ nọ na sisi Jelemia taun. Ṣigba, Ebẹdi-melẹki wá pannukọn whlepọn sinsinyẹn de to whenue ahọvi kanylantọ enẹlẹ gbọn mawadodo dali sawhẹ gufinfọn tọn dokọna Jelemia bo ze e dlan odò he gọ́ na ogbọ̀n de mẹ na ewọ ni nọ finẹ kaka bo kú. (Jelemia 38:4-6) Etẹwẹ Ebẹdi-melẹki na wà?
Ebẹdi-melẹki yí jintli po adọgbigbo po do yinuwa bo ma dibuna nuhe ahọvi lẹ sọgan wà. E dọnsẹpọ Zedekia to gbangba bo jẹagọdo lehe yè yinuwa hẹ Jelemia to aliho agọ̀ mẹ do. Vlavo okà watọ lọ lẹ wẹ e to alọdlẹndo to whenue e dọna ahọlu lọ dọmọ: “Omẹ helẹ ko wà oylan . . . hlan Jelemia.” (Jelemia 38:9) Whẹho lọ pà Ebẹdi-melẹki, podọ sọgbe hẹ anademẹ Zedekia tọn, Ebẹdi-melẹki plan sunnu 30 nado yì whlẹn Jelemia gán.
Ebẹdi-melẹki sọ do jẹhẹnu devo hia, yèdọ homẹdagbe. E yí “avọ̀nu hoho [he] yè zedlan lẹ po nukija yinyọ̀n lẹ po, bo zlọn yé dai gbọn okàn lẹ dali . . . hlan Jelemia.” Naegbọn e yí avọ̀nu hoho po nukija lẹ po hlan ẹn? Na Jelemia nido yí yé do awà etọn lẹ glọ bo ma gbleawu dile yé na to dindọn ẹn tọ́n sọn odò he gọ́ na ogbọ̀n lọ mẹ.—Jelemia 38:11-13.
Jehovah doayi nuhe Ebẹdi-melẹki wà go. Be Ewọ yọ́n pinpẹn etọn ya? Gbọn Jelemia gblamẹ, Jiwheyẹwhe hẹn ẹn zun yinyọnẹn na Ebẹdi-melẹki dọ vasudo Juda tọn ko sẹpọ. Jiwheyẹwhe sọ do opà atọ́n na Ebẹdi-melẹki nado na ẹn jide dọ e na mọ whlẹngán. E dọmọ: “Yẹn na whlẹn we . . . Hiẹ ma nasọ yin jijodo alọ omẹ ewlẹ tọn mẹ . . . Yẹn na whlẹn we nugbonugbo . . . Hiẹ ma nasọ jai gbọn ohí lọ dali . . . Ogbẹ̀ towe na tin na nuyànwẹnna de hlan we.” Naegbọn Jehovah dopagbe nado whlẹn ẹn gán? E dọna ẹn dọmọ: “Na hiẹ ko yí tudido towe do yẹn mẹ wutu.” (Jelemia 39:16-18) Jehovah yọnẹn dọ gbọnvona mẹtọnhopọn, jidide po yise he Ebẹdi-melẹki tindo to emi mẹ po wẹ whàn ẹn nado gọalọna Jelemia.
Nuhe otàn enẹ plọn mí họnwun: Jehovah nọ yọ́n pinpẹn nuhe wà mí te nado sẹ̀n ẹn lẹ tọn. Biblu na mí jide dọ ewọ nọ flin etlẹ yin onú pẹvi pete he yise dolido mítọn whàn mí nado wà to sinsẹ̀n-bibasi etọn mẹ. (Malku 12:41-44) Be enẹ ma whàn we nado dọnsẹpọ Jiwheyẹwhe enẹ he nọ yọ́n pinpẹn sinsẹ̀n-bibasi mítọn tọn ya? Eyin mọ wẹ, hiẹ sọgan kudeji dọ ewọ na yinuwa sọgbe hẹ mẹhe Ohó etọn dọ dọ ewọ yin lọ, yèdọ: “Ahọsumẹtọ mẹhe to dindin in vẹkuvẹku lẹ tọn.”—Heblu lẹ 11:6.
[Nudọnamẹ odò tọn]
a Ebẹdi-melẹki yin yiylọdọ “ojọ̀.” (Jelemia 38:7) Hogbe enẹ nọ saba yin yiyizan na sunnu he yè sá, ṣigba e sọ tindo zẹẹmẹ he gbloada bo nọ yin yiyizan na ahọluzọnwatọ họ̀nmẹ tọn lẹ to paa mẹ.