Homẹdagbe Didohia Nọ De Sinsẹ́n Dagbe Tọ́n

TO WHENUE George po Manon po he yin Kunnudetọ lẹ to Pays-Bas dọnsẹpọ nawe mẹhomẹ de nado lá wẹndagbe Ahọluduta lọ tọn na ẹn, nawe lọ ma yí yé ganji. Yé wá sè dọ whla awe wẹ asu kú do nawe lọ bọ visunnu etọn dopo sọ kú. Gbọnvona enẹ, nawe lọ sọ nọ jẹ húdu-húdu sinsinyẹn. Dile nawe lọ tlẹ tẹnpọn nado duto ede ji to hodọdopọ lọ whenu, e gbẹ́ to adidu.

Etomọṣo, George dọna Manon dọ e na yọ́n dọ yé ni hẹn vounvoun whanpẹnọ lẹ yì na nawe lọ, na e taidi dọ e tin edeṣo bo nọ mọ apọ̀. To whenue yé hẹn vounvoun lọ lẹ yì na Rie, e paṣa ẹ taun. Ṣigba, na alọnu etọn ján wutu, yé basi tito do azán devo ji. To whenue George po Manon po lẹkọyi, yé ma mọ Rie to whégbè. Yé sọ lẹkọyi to ojlẹ devo lẹ mẹ, ganṣo yé ma mọ ẹn. Yé tlẹ wá lẹndọ e to hinhọ̀nna yé.

Ṣigba to gbèdopo, George wá mọ Rie to whégbè. Nawe lọ vẹvẹ bo basi zẹẹmẹ dọ dotowhé wẹ emi te to whenue yé wá ba emi pò. “Amọ́, mì ma sọgan lẹn nuhe n’wà to whenue mì wá dè e godo,” wẹ e dọ. E yidogọ dọmọ: “N’jẹ Biblu hia ji!” Yé tindo hodọdopọ dagbe de bọ plọnmẹ Biblu de bẹjẹeji.

Biblu pinplọn gọalọna Rie nado lẹzun gbẹtọ ayajẹnọ de he nọ do homẹdagbe hia. Dile etlẹ yindọ manọna glọn Rie do whégbè, ewọ nọ dọho gando nuhe plọn e te lẹ go na mẹdepope he wá dla ẹ pọ́n. Manọna etọn zọ́n bọ e ma nọ saba penugo nado yì opli agun tọn lẹ, etomọṣo homẹ etọn nọ hùn taun to whenue mẹmẹsunnu po mẹmẹyọnnu lẹ po wá dla ẹ pọ́n. To gbeegbe Rie tindo owhe 82, e yì plidopọ lẹdo tọn de bo yí baptẹm nado basi dohia klandowiwe etọn tọn hlan Jiwheyẹwhe.

Rie kú to osun kleun delẹ godo, podọ hogbe milomilo he e kandai delẹ yin mimọ. To kandai lọ mẹ, e basi zẹẹmẹ awufiẹsa he ṣokẹdẹninọ nọ hẹnwa to yọnhowhe mẹ tọn bo zinnudo nujọnu-yinyin homẹdagbe didohia tọn ji. Manon dọmọ: “Kandai hogbe milomilo tọn enẹ hihia yinuwado ji e taun, podọ homẹ ṣie sọ hùn dọ Jehovah gọalọna mí nado do homẹdagbe hia ẹ.”

Na nugbo tọn, apajlẹ he Jehovah zedai nọ whàn mí nado do owanyi po homẹdagbe mọnkọtọn po hia. (Efe. 5:1, 2) Eyin mí “nọ do mídelẹ hia taidi lizọnyizọnwatọ Jiwheyẹwhe tọn lẹ . . . gbọn homẹdagbe dali,” lizọnyizọn mítọn na de sinsẹ́n dagbe tọ́n.—2 Kọl. 6:4, 6.