Plọnnu sọn Ohó Jiwheyẹwhe Tọn Mẹ
Etẹwẹ Na Jọ to Whẹdazangbe?
Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.
1. Etẹwẹ Whẹdazan yin?
Dile e yin didohia do to yẹdide he tin to adusiwhé, mẹsusu nọ lẹndọ to Whẹdazangbe, gbẹtọ liva susu lẹ na yin hinhẹnwa ofìn Jiwheyẹwhe tọn nukọn nado yin whẹdana sọgbe hẹ nuhe yé ko wà wayi lẹ: mẹdelẹ na duvivi ogbẹ̀ tọn to olọn mẹ bọ mẹdevo lẹ na yin yasana to zòmẹ. Ṣigba, Biblu dohia dọ lẹndai Whẹdazan tọn wẹ nado whlẹn gbẹtọ lẹ sọn mawadodo mẹ. (Psalm 96:13) Jiwheyẹwhe ko de Jesu taidi Whẹdatọ he na hẹn dodowiwa gọwá na gbẹtọvi lẹ.—Hia Isaia 11:1-5; Owalọ lẹ 17:31.
2. Nawẹ Whẹdazan na hẹn dodowiwa gọwá gbọn?
To whenue sunnu tintan lọ, Adam, desọn ojlo mẹ bo ṣiatẹ sọta Jiwheyẹwhe, e dọ̀n kúnkan etọn lẹpo do ylando, yajiji po okú po mẹ. (Lomunu lẹ 5:12) Nado jla mawadodo mọnkọtọn do, Jesu na fọ́n omẹ liva susu lẹ sọn okú. Owe Osọhia tọn dohia dọ enẹ na jọ to gandudu owhe fọtọ́n tọn Klisti Jesu tọn whenu.—Hia Osọhia 20:4, 11, 12.
Mẹhe na yin finfọnsọnku lẹ na yin whẹdana sọgbe hẹ nuhe yé na wà to whenue nuhe tin to “owe-hihá” he yin nùdego to Osọhia weta 20 mẹ lẹ mẹ yin didehia, e ma yin sọgbe hẹ nuhe yé ko wà whẹpo do kú lẹ. (Lomunu lẹ 6:7) Apọsteli Paulu dọ dọ mẹhe na yin finfọnsọnku bo na tindo dotẹnmẹ hundote lọ nado plọnnu gando Jiwheyẹwhe go lẹ bẹ “dodonọ lẹ po mawadodonọ lẹ” po hẹn.—Hia Owalọ lẹ 24:15.
3. Etẹwẹ Whẹdazan lọ na wadotana?
Mẹhe ma tlẹ yọ́n Jehovah Jiwheyẹwhe bo sẹ̀n ẹn whẹpo do kú lẹ na tindo dotẹnmẹ hundote lọ nado diọ bo wà dagbe. Eyin yé wàmọ, fọnsọnku yetọn na lẹzun “fọnsọnku ogbẹ̀ tọn.” Ṣigba, delẹ to mẹhe na yin finfọnsọnku lẹ mẹ ma na jlo nado plọn aliho Jehovah tọn lẹ. Fọnsọnku yetọn na lẹzun “fọnsọnku whẹdida tọn.”—Hia Johanu 5:28, 29; Isaia 26:10; 65:20.
To vivọnu Azán Whẹdida tọn he na dẹn na owhe fọtọ́n lọ tọn, Jehovah na hẹn gbẹtọvi tonusetọ lẹ jẹ ninọmẹ pipé tọn he ewọ jlo na yé to dowhenu kọ̀n. (1 Kọlintinu lẹ 15:24-28) Todido jiawu nankọ die ehe yin na tonusetọ lẹpo! To mẹtẹnpọn godo tọn de whenu, Jiwheyẹwhe na tún Satani Lẹgba dote sọn odò mapote he mẹ e na ko yin súsúdo na owhe fọtọ́n lọ mẹ. Satani nasọ tẹnpọn nado gọkọna gbẹtọ lẹ sọn Jehovah dè, ṣigba mẹhe ma hodo Satani lẹ na duvivi ogbẹ̀ tọn to aigba ji kakadoi.—Hia Isaia 25:8; Osọhia 20:7-9.
4. Azán whẹdida tọn devo tẹwẹ na hẹn ale wá na gbẹtọvi lẹ?
Biblu sọ nọ yí hogbe lọ “azán whẹdida tọn” zan nado dlẹnalọdo nujijọ he na hẹn opodo wá na titonu ehe. Azán whẹdida tọn ehe na wá to ajiji mẹ taidi Singigọ azán Noa tọn gbè tọn he và whẹndo ylankan de sudo. Ayajẹnu wẹ e yin dọ vasudo “omẹ jijọ-madi-Jiwheyẹwhe tọn lẹ” tọn he to sisẹpọ po awuyiya po lọ na hẹn ẹn yọnbasi bọ ogbẹ́ gbẹtọvi tọn yọyọ de na yin awuwlena to aigba ji, fihe “dodowiwa na nọ nọ̀.”—Hia 2 Pita 3:6, 7, 13.
Na nudọnamẹ dogọ, pọ́n weda 213-215 owe Etẹwẹ Biblu Plọn MÍ Taun? tọn, he Kunnudetọ Jehovah tọn lẹ zinjẹgbonu.
[Yẹdide to weda 24]
“Whẹdida Godo Tọn,” gbọn gustave doré dali, 1832-1883
[Asisa Nudọnamẹ lẹ Tọn]
Engravings by Doré