Jehovah ‘to Agbàn lọ Hẹn Na Mi Egbesọegbesọ’

Maretha du Raan

Dile etlẹ yindọ azọ̀n he n’nọ jẹ sọgan fọ́n to whedepopenu bo tlẹ taidi nuhe yè ma sọgan doakọnna, n’mọdọ Otọ́ owanyinọ olọn mẹ tọn mítọn nọgodona mi to gbẹzan ṣie blebu mẹ. Podọ n’tindo ayajẹ susu nado to Jehovah sẹ̀n taidi gbehosọnalitọ de na nuhe hugan owhe 20.

N’yin jiji to 1956 po plibọ-zọ̀n po. Na nẹgbé-hú ṣie ma sú ganji wutu, okàn de kú to nẹgbé-hú ṣie mẹ, bọ n’ma sọgan zinzọnlin podọ ehe bẹ azọ̀n sinsinyẹn devo lẹ plá mi.

Whẹpo n’do yin jiji, asu po asi po de he yin mẹdehlan Kunnudetọ Jehovah tọn lẹ jẹ Biblu plọn hẹ mẹjitọ ṣie lẹ ji. To whenue n’gbẹ́ pò to ovu, wẹnlatọ kleun de wẹ nọ nọ̀ gbétatò mítọn mẹ to Usakos, Namibie, podọ fie yé te lọ dẹn do mí. Enẹwutu, mí nọ gbadopọnna tito-to-whinnu opli agun tọn lẹ tọn dopọ taidi whẹndo de. To whenue n’tindo owhe ṣinawe, doto lẹ wazọ́n mẹzizẹ tọn de na mi nado deali de do agbasa ṣie go, na ma do sọgan nọ hú adọ́ gbọn finẹ. To whenue n’tindo owhe 14, n’bẹ adíngbe-zọ̀n. N’ma penugo bo fó wehọmẹ, na fie wehọmẹ daho he sẹpọ mí hugan te dẹn taun bọ n’sọ nọ tindo nuhudo alọgọ vonọtaun tọn sọn mẹjitọ ṣie lẹ dè wutu.

Etomọṣo, n’magbe nado hẹn haṣinṣan he n’ tindo hẹ Jehovah lodo. To ojlẹ lọ mẹ, owe mítọn lẹ ma ko tin-to-aimẹ to ogbè ṣie mẹ, yèdọ Afrikaans-gbè. Enẹwutu, n’plọn Glẹnsigbe hihia nado sọgan plọn susu to owe mítọn lẹ mẹ. N’lẹzun wẹnlatọ Ahọluduta lọ tọn bo yí baptẹm to whenue n’tindo owhe 19. To owhe ẹnẹ he bọdego lẹ gblamẹ, whlasusu wẹ n’jẹazọ̀n bosọ mọ awufiẹsa to numọtolanmẹ-liho. Humọ, na kanṣiṣa sinsinyẹn tin to akọ̀ he mẹ n’wá sọn wutu, obu gbẹtọ tọn glọnalina mi ma nado tindo mahẹ zohunhun tọn to lizọnyizọn lọ mẹ.

To whenue n’tindo owhe 20 linlán, mí sẹtẹn sọn Namibie yì Afrique du Sud, podọ ojlẹ enẹ mẹ wẹ n’kọnawudopọ hẹ agun de whla tintan. Lehe enẹ yin ayajẹ na mi do sọ! Etomọṣo, mẹzizẹ devo gbẹ́ sọ to tepọn mi—enẹ wẹ nado deali de do agbasa ṣie go biọ adọ̀vi ṣie mẹ na ma do sọgan nọ doafọai gbọn finẹ.

To ojlẹ delẹ godo, nugopọntọ lẹdo tọn de na hodidọ de gando gbehosọnalitọ bibasi go. Hodidọ etọn yinuwado ji e taun. N’yọnẹn dọ n’ma tindo agbasalilo, ṣigba n’ko mọ lehe Jehovah gọalọna mi to nuhahun susu lẹ mẹ do. Enẹwutu, n’doalọwemẹ nado lẹzun gbehosọnalitọ whepoponu tọn. Amọ́, na nuhahun agbasalilo tọn ṣie lẹ wutu, mẹho lẹ whleawu nado kẹalọyi alọdowemẹ ṣie.

Mahopọnna enẹ, n’magbe nado wà nuhe go n’pé lẹpo to lizọnyizọn lọ mẹ. Onọ̀ ṣie po mẹdevo lẹ po gọalọna mi bọ n’penugo nado na gànmẹ gbehosọnalitọ whepoponu tọn na osun ṣidopo. Enẹ do gbemima ṣie nado yin gbehosọnalitọ hia bosọ yin kunnudenu lọ dọ agbasamalo ṣie ma yin aliglọnnamẹnu de. N’vọ́ doalọwemẹ whladopo dogọ, podọ mẹho lẹ wá kẹalọyi alọdowemẹ ṣie. To 1^er septembre 1988, n’yin alọkẹyi taidi gbehosọnalitọ whepoponu tọn.

Taidi gbehosọnalitọ de, n’tindo numimọ godonọnamẹ Jehovah tọn to whepoponu. Nugbo lọ pinplọn mẹdevo lẹ kakati nado ze ayiha ṣie lẹpo do azọ̀n ṣie ji ko gọalọna mi to numọtolanmẹ-liho podọ to gbigbọ-liho. N’tindo ayajẹ susu to whenue n’gọalọna mẹsusu lẹ nado klan gbẹzan yetọn do wiwe bo yí baptẹm.

Azọ̀n ṣie gbẹ́ nọ dotukla mi. Ṣigba, Jehovah ‘to agbàn lọ hẹn na mi egbesọegbesọ.’ (Ps. 68:19) Gbọnvona dọ ewọ nọ gọalọna mi nado doakọnna ninọmẹ ṣie, ewọ sọ hẹn ayajẹ wá na mi to gbẹzan ṣie mẹ!