Todowhinnu Hosọ lẹ Tọn

3 Yé Ze Yede Jo sọn Ojlo mẹ Wá—To Océanie

OSẸ HE BẸSỌN 29 FÉVRIER 2016–6 MARS 2016

7 Mì Magbe Nado “Zindonukọn to Owanyi Mẹmẹsunnu Tọn Mìtọn Mẹ”!

Etẹwẹ yin hosọ owhe 2016 tọn? Etẹwẹ mí dona nọ flin to whenue mí na nọ to hosọ lọ pọ́n to owhe ehe gblamẹ? Hosọ ehe na do lehe mí sọgan mọaleyi hugan sọn hosọ owhe tọn mítọn mẹ do hia.

OSẸ HE BẸSỌN 7-13 MARS 2016

12 Dike “Nunina Vọnu Mayọnjlẹ” Jiwheyẹwhe Tọn Ni Nọ Whàn We

Jehovah na mí nuhe apọsteli Paulu ylọ dọ “nunina vọnu mayọnjlẹ” Jiwheyẹwhe tọn. (2 Kọl. 9:15) Etẹwẹ nunina enẹ yin? Nawẹ e dona whàn mí nado hodo afọdòmẹ Klisti Jesu tọn, yiwanna mẹmẹsunnu mítọn lẹ, bo nọ jona mẹdevo lẹ sọn ahun mẹ wá gbọn? Mí na mọ gblọndo kanbiọ ehelẹ tọn bo na gbadopọnna onú tangan delẹ he mí sọgan wà to ojlẹ Oflin tọn mẹ.

OSẸ HE BẸSỌN 14-20 MARS 2016

17 Gbigbọ lọ Nọ Dekunnu hẹ Gbigbọ Mítọn

OSẸ HE BẸSỌN 21-27 MARS 2016

22 “Míwlẹ Na Yì hẹ Mì”

Hosọ awe ehelẹ na basi zẹẹmẹ lehe mẹde nọ wagbọn do nọ yọnẹn dọ emi mọ oylọ olọn mẹ tọn yí do tọn podọ nuhe e zẹẹmẹdo na mẹlọ nado yin dopo to mẹyiamisisadode lẹ mẹ. Humọ, mí na gbadopọnna nukun he mẹyiamisisadode lẹ dona nọ yí do pọ́n yede podọ lehe mí dona yinuwa do to whenue sọha mẹhe nọ dù akla bo nọ nù ovẹn to Oflin whenu lẹdo aihọn pé lẹ tọn jideji.

OSẸ HE BẸSỌN 28 MARS 2016–3 AVRIL 2016

28 Azọ́nwiwa Dopọ hẹ Jiwheyẹwhe—Nọ Hẹn Ayajẹ Wá

Sọn bẹjẹeji gbọ́n, Jehovah nọ basi oylọna mẹdevo lẹ nado wazọ́n dopọ hẹ ẹ nado hẹn lẹndai etọn di. Lẹndai etọn wẹ yindọ wẹndagbe lọ ni yin lilá lẹdo aihọn pé, podọ e basi oylọna mí nado tindo mahẹ to azọ́n ehe mẹ. Hosọ ehe gbadopọnna dona he mí nọ mọyi lẹ dile mí to azọ́nwa dopọ hẹ Jiwheyẹwhe.