Be Hiẹ Tindo Gbigbọ Mẹde-Yido-Sanvọ́ Tọn Ya?
1 Pinpẹn-nutọn-yinyọnẹn na nuhe Jesu Klisti gbọn homẹdagbe dali wà na gbẹtọvi lẹ dona whàn mímẹpo nado yí nugopipe, huhlọn, po hlọnhlọn mítọn lẹ po zan to aliho mẹde-yido-sanvọ́ tọn mẹ. Owe-wiwe dọmọ: “[Mì] yí agbasa mìtọn do basi avọ́sinsan he to ogbẹ̀, wiwe, he yin alọkẹyi na Jiwheyẹwhe, yèdọ sinsẹ̀nzọn wiwe.” (Lom. 12:1) Mẹde gbigbejepọn sọn ojlẹ de mẹ jẹ devo mẹ na gọalọna we nado yọnẹn eyin hiẹ to gbigbọ mọnkọtọn dohia to gigọ́ mẹ dile ninọmẹ mẹdetiti tọn towe lẹ na dotẹnmẹ etọn do.
2 To Afọdidona Oyọnẹn Biblu Tọn Mẹ: Be hiẹ ko de whenu dovo na Biblu hihia po oplọn mẹdetiti tọn po to gbesisọ mẹ ya? Be hiẹ tẹdo tito-to-whinnu enẹ go ya? Be aṣa towe wẹ e yin nado nọ wleawu ganji na opli agun tọn lẹ ya? Eyin tatọ́ whẹndo tọn de wẹ hiẹ yin, be hiẹ nọ plọn Biblu hẹ whédo towe to gbesisọ mẹ ya? Onú ehelẹ wiwà sọgan biọ dọ hiẹ ni yí whenu he nọ yin yiyizan na televiziọn pinpọn kavi to ọdinatẹẹ kọ̀n kavi to yanwle devo lẹ godo do sanvọ́. Ṣigba, lehe avọ́sinsan enẹ whè do sọ, to yinyọnẹn mẹ dọ ojlẹ he yin yiyizan nado plọn Ohó Jiwheyẹwhe tọn na gọalọna we nado jẹ ogbẹ̀ madopodo kọ̀n!—Joh. 17:3.
3 To Ovi Towe lẹ Pinplọn Mẹ: Ovu whenu wẹ yin ojlẹ dagbe hugan na jọja lẹ nado jẹ aliho nuyiwa mẹde-yido-sanvọ́ tọn plọn ji. Plọn yé dọ dile ojlẹ de tin na aihundida, ojlẹ de sọ dona tin na azọ́n po nuwiwa yẹwhehọluduta tọn lẹ po ga. (Efe. 6:4) Nọ na yé azọ́n yọ́n-na-yizan delẹ nado wà to lẹdo owhé lọ tọn mẹ. Ze tito-to-whinnu gbesisọ tọn de dai nado nọ tindo mahẹ to lizọnyizọn lọ mẹ hẹ yé. Na huhlọn nuplọnmẹ towe gbọn apajlẹ dagbe towe titi dali.
4 To Nuwiwa Agun Tọn lẹ Mẹ: Agun de nọ yin didona to whenuena mẹhe tin to e mẹ lẹpo basi avọ́sinsan sọn ojlo mẹ wá lẹ nado doafọna nuhe na hẹn ale wá na mẹlẹpo. (Heb. 13:16) Be e yọnbasi na we nado yí whenu zan dogọ to azọ́n yẹwhehodidọ Ahọluduta lọ tọn po mẹhẹnzun devi tọn po mẹ ya? Be hiẹ sọgan ze dewe jo nado gọalọna awutunọ kavi mẹhomẹ lẹ, vlavo nado ze yé wá opli lẹ ya?
5 Jẹnukọnna ogbẹ̀ gbẹtọvi tọn etọn yíyí do sanvọ́, Jesu na ayinamẹ devi etọn lẹ nado ze nukun yetọn lẹ do dagbenu Ahọluduta lọ tọn lẹ ji, bo ze nuhe pò to gbẹzan mẹ lẹpo do otẹn awetọ mẹ. (Mat. 6:33) Afọdidona gbigbọ mẹde-yido-sanvọ́ tọn mọnkọtọn na hẹn ayajẹ daho hugan lọ wá na mí dile mí zindonukọn nado to Jehovah sẹ̀n po ayajẹ po.