Azọ́n He Yin Nujọnu Hugan Lọ
1. Avọ́sinsan tẹlẹ wẹ pinpẹn-nutọn-yinyọnẹn sisosiso mítọn na lizọnyizọn lọ na whàn mí nado basi?
1 Naegbọn mí nọ yin tulina whẹwhẹ nado yí whenu, huhlọn po nutindo mítọn lẹ po zan na lizọnyizọn lọ? Na azọ́n devo depope masọ họakuẹ sọ ẹ! Ayihamẹlinlẹnpọn do nuyiwadomẹji sisosiso etọn lẹ ji na nọ yidogọna ojlo mítọn nado tindo mahẹ to azọ́n he ma nasọ wá vọ́ yin wiwà gbede ba ehe mẹ.—Owalọ 20:24.
2. Nawẹ yẹwhehodidọ mítọn nọ gọalọ nado klan oyín daho Jehovah tọn do wiwe gbọn?
2 Nọ Klan Oyín Jehovah Tọn Do Wiwe: Azọ́n yẹwhehodidọ tọn lọ nọ dohia dọ Ahọluduta Jehovah tọn gbọn Klisti Jesu gblamẹ na diọtẹnna gandudu gbẹtọvi tọn lẹpo bosọ hẹn pọngbọ wá na nuhahun gbẹtọvi tọn lẹpo. (Mat. 6:9, 10) Jehovah nọ yin gigopana taidi omẹ dopo akàn lọ he penugo nado whlẹn gbẹtọ lẹ sọn azọ̀n po okú po si. (Isa. 25:8; 33:24) Dile e yindọ oyín etọn wẹ mí tindo to ota, mẹdevo he nọ doayi walọ dagbe po zohunhun mítọn po go lẹ sọgan pagigona ẹn. (1 Pita 2:12) Pekọhẹnwanamẹnu nankọ die e yin na mí nado hẹn oyín Oklunọ Nupojipetọ lọ Jehovah tọn zun yinyọnẹn gbọn aigba lọ blebu ji!—Ps. 83:18.
3. Dona tẹlẹ wẹ mẹhe nọ kẹalọyi owẹ̀n Ahọluduta lọ tọn lẹ nọ mọyi?
3 Nọ Whlẹn Ogbẹ̀ Lẹ: Jehovah “ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) Ṣigba, eyin mẹde ma plọnnu yé, nawẹ gbẹtọ lẹ na wagbọn do yọ́n walọ he Jehovah nọ pọnhlan taidi dehe sọgbe po dehe ma sọgbe po? (Jona 4:11; Lom. 10:13-15) Whenuena gbẹtọ lẹ kẹalọyi wẹndagbe lọ, aliho gbẹninọ tọn yetọn nọ yin hinhẹn pọnte dile yé to walọyizan ylankan lẹ gbẹdai. (Mika 4:1-4) Humọ, yé nọ mọ todido ayajẹ tọn ogbẹ̀ madopodo tọn lọ. Yẹwhehodidọ po mẹpinplọn zohunhun tọn mítọn po nọ whlẹn mí po mẹhe nọ dotoaina mí lẹ po. (1 Tim. 4:16) Adà he tindo yẹyi daho nankọ die mí tindo to azọ́n titengbe hugan ehe lọ mẹ!
4. Naegbọn mí dona yí zohunhun do to mahẹ tindo to azọ́n yẹwhehodidọ Ahọluduta tọn po mẹhẹnzun devi tọn po mẹ?
4 Nukunbibia daho lọ na hẹn vasudo ajiji tọn de wá aihọn mawadodo tọn ehe ji to madẹnmẹ. Mẹhe tin to adà Jehovah tọn mẹ lẹ wẹ na luntọ́n. Enẹwutu, azọ́n yẹwhehodidọ po mẹhẹnzun devi po tọn wẹ yin niyaniya tọn hugan, nujọnu hugan podọ dehe nọ hẹn ale wá hugan he to yìyì to alọnu to egbehe. Mì gbọ mí ni ze e do otẹn tintan mẹ to gbẹzan mítọn mẹ!—Mat. 6:33.