‘Yẹwheho Wẹndagbe Tọn Ehe Na Yin Didọ’!
1. Nawẹ mí wagbọn do yọnẹn dọ nudepope ma sọgan doalọtena azọ́n yẹwhehodidọ tọn?
1 Nudepope ma tin he sọgan glọnalina Jehovah ma nado hẹn ojlo etọn di. (Isa. 14:24) Dile etlẹ taidi dọ Whẹdatọ Gideoni po sunnu 300 etọn lẹ po ma na penugo nado gbawhàn awhànfuntọ 135000 Midianinu lẹ tọn, Jehovah dọna ẹn dọmọ: “[Hiẹ na] whlẹn Islaeli sọn alọ Midiani tọn mẹ: yẹn ma ka ko do we hlan?” (Whẹ. 6:14) Azọ́n tẹwẹ Jehovah nọ nọgodona to egbehe? Jesu dọmọ: “Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji.” (Mat. 24:14) Mẹdepope ma sọgan doalọtena azọ́n ehe bọ e ma nado yin wiwadotana!
2. Naegbọn mí sọgan donukun dọ Jehovah na gọalọna dopodopo mítọn tlọlọ to lizọnyizọn lọ mẹ?
2 Jehovah Nọ Gọalọna Dopodopo Mítọn: Dile etlẹ yindọ mí sọgan deji dọ Jehovah na hẹn Kunnudetọ etọn lẹ tindo kọdetọn dagbe taidi pipli de, be mí sọgan donukun dọ Jehovah na gọalọna dopodopo mítọn tlọlọ ya? To ojlẹ nuhudo tọn de mẹ, apọsteli Paulu mọdọ Jehovah gọalọna emi gbọn Ovi etọn Jesu gblamẹ. (2 Tim. 4:17) Mọdopolọ, mí sọgan deji dọ Jehovah na dona vivẹnudido dopodopo mítọn tọn nado wazọ́n etọn dotana.—1 Joh. 5:14.
3. Ninọmẹ tẹlẹ mẹ wẹ Jehovah nọ gọalọna mí te?
3 Be magbọjẹ egbesọ tọn lẹ nọ zọ́n bọ huhlọn vude wẹ nọ pò na we nado yizan to lizọnyizọn lọ mẹ ya? “E to huhlọn na mẹhe nuṣikọna lẹ.” (Isa. 40:29-31) Be hiẹ to pipehẹ homẹkẹn kavi nukundiọsọmẹ wẹ ya? “Ze agbàn towe dlan OKLUNỌ ji, ewọ nasọ hẹn we dote.” (Ps. 55:22) Be hiẹ nọ mọdọ a tindo nuhudo jide tọn to whedelẹnu ya? “Yì, yẹn nasọ tin po onù towe po.” (Eks. 4:11, 12) Be hiẹ tindo nuhahun agbasamalo tọn he nọ dekanpona mahẹ towe to lizọnyizọn lọ mẹ wẹ ya? Jehovah nọ yí nukun nujọnu tọn do pọ́n vivẹnudido ahundopo tọn towe bo sọgan yí i zan, mahopọnna lehe e whè sọ.—1 Kọl. 3:6, 9.
4. Nawẹ jide tintindo to Jehovah mẹ na yinuwado mí ji gbọn?
4 Jehovah ko “dlẹn [alọ etọn] do gbonu, mẹnu wẹ na gọ̀ ẹ do godo?” (Isa. 14:27) Na mí tindo jide dọ Jehovah na dona lizọnyizọn mítọn wutu, mì gbọ mí ni zindonukọn ‘bo yí adọgbigbo do to yẹwhehodọ gbọn huhlọn Jehovah tọn dali.’—Owalọ 14:3.