Azọ́n He Nọ Hẹn Ayajẹ Wá Hugan Lọ
1. Azọ́n azọ̀nhẹngbọ gbigbọmẹ tọn tẹwẹ to yìyì to egbehe?
1 Mẹhe yinukundomọ azọ̀nhẹngbọ agbasa-liho tọn he yin bibasi to owhe kanweko tintan whenu lẹ gọ́ na ayajẹ taun. (Luku 5:24-26) To egbehe, mí nọ mọ ayajẹ dile mí to mahẹ tindo to azọ́n azọ̀nhẹngbọ gbigbọmẹ tọn lọ mẹ. (Osọ. 22:1, 2, 17) Homẹhunnu wẹ e nọ yin nado hia numimọ lẹ gando lehe Ohó Jehovah tọn po gbigbọ wiwe etọn po diọ gbẹzan gbẹtọ lẹ tọn do go. Ṣigba, nuhe tlẹ sọ nọ hẹn ale wá hugan wẹ mahẹ tintindo to azọ́n ehe mẹ gbọn anadidena plọnmẹ Biblu gbesisọ tọn de dali.
2. Ayajẹ tẹwẹ mí sọgan tindo dile mí to nugbo lọ plọnmẹ?
2 Nawẹ yinkọ Jiwheyẹwhe tọn nọ yin? Naegbọn ewọ do jotẹnna yajiji? Etẹwẹ Ahọluduta Jiwheyẹwhe tọn na wà na gbẹtọvi lẹ? Homẹ mítọn nọ hùn e ma yin to gblọndo kanbiọ mọnkọtọn lẹ tọn nina mẹ kẹdẹ gba, ṣigba e sọ nọ hùn dile mí mọ bọ Biblu plọntọ de gọ́ na ayajẹ to whenue e to nugbo lọ plọn. (Howh. 15:23; Luku 24:32) Eyin Biblu plọntọ de to nukọnzindo, e sọgan jẹ yinkọ Jiwheyẹwhe tọn yizan ji, basi vọjlado to aṣọ́dido po nusisọ́ etọn po mẹ, doalọtena walọ ylankan lẹ, bo jẹ kunnudena mẹdevo lẹ ji. Eyin ewọ zindonukọn jẹ klandowiwe po baptẹm po kọ̀n, e na lẹzun mẹmẹsunnu po azọ́nwatọ hatọ mítọn po. Dopodopo afọdide ehelẹ tọn yin whẹwhinwhẹ́n de nado jaya.—1 Tẹs. 2:19, 20.
3. Afọdide dagbe tẹlẹ wẹ mí sọgan ze nado bẹ plọnmẹ Biblu de jẹeji?
3 Be Hiẹ Sọgan Tindo Mahẹ to E mẹ Ya? Eyin hiẹ jlo na tindo mahẹ to azọ́n he nọ hẹn ayajẹ wá hugan ehe mẹ, biọ Jehovah dọ ni na we lẹblanulọkẹyi lọ nado deanana plọnmẹ Biblu de, podọ to enẹgodo yinuwa to kọndopọ mẹ hẹ odẹ̀ towe lẹ. (1 Joh. 5:14) Nọ dọyẹwheho to fie gbẹtọ lẹ sọgan yin mimọ te podọ to ojlẹ he mẹ yé sọgan yin mimọ te. Nọ ze plọnmẹ Biblu donukọnnamẹ to whedepopenu he hiẹ tindo dotẹnmẹ hundote lọ. (Yẹwh. 11:6) Eyin hiẹ mọ mẹhe do ojlo hia de bo do okún nugbo lọ tọn, lẹkọyi nado húsinna ẹn.—1 Kọl. 3:6-9.
4. Naegbọn mí dona nọ ze plọnmẹ Biblu donukọnna gbẹtọ lẹ po linlẹn niyaniya-yinyin tọn po?
4 Gbẹtọ susu gbẹ́ pò he huvẹ po nugbla dodowiwa tọn po to hùhù. Mẹnu wẹ na gọalọna yé nado hẹn pekọ wá na nuhudo gbigbọmẹ tọn yetọn gbọn anadidena plọnmẹ Biblu de hẹ yé dali? (Mat. 5:3, 6) Mì gbọ mí ni ze míde jo sọn ojlo mẹ nado gọalọ to azọ́n yẹwhehodidọ po mẹhẹnzun devi po tọn lọ wiwadotana mẹ whẹpo jibẹwawhé lọ nido wá opodo.—Isa. 6:8.