Linlin Kunnudegbe Tọn Lẹ

To osun novembre tọn mẹ, wẹnlatọ he tin to Niger lẹ tindo agayiyi yọyọ to alọnuwe apòmẹ tọn po alọnuwe lẹ didogbonu po mẹ, ehe sọha etọn yì 2263. Ehe dohia dọ jideji 130 to kanweko ji wẹ yé do hugan linlin osun novembre 2009 he wayi tọn.

To plidopọ agbegbe “Gbọṣi Adà Jehovah Tọn Mẹ” tọn ẹnẹ he yin bibasi to Burkina Faso lẹ whenu, gbẹtọ sọha 2555 wẹ wá. Whla tintan niyẹn bọ sọha mẹhe yì plidopọ agbegbe tọn to otò enẹ mẹ yiaga sọmọ to owhe dopo mẹ, podọ omẹ 29 wẹ yí baptẹm.

To osun janvier tọn he wayi mẹ, Bénin tindo agayiyi yọyọ gbehosọnalitọ whepoponu tọn he sọha etọn yì 1082. Ehe dohia dọ hugan wẹnlatọ 16 to kanweko ji wẹ tindo mahẹ to sinsẹ̀nzọn whenu-gigọ́ tọn mẹ.

Mahopọnna hunyanhunyan he tin to Côte d’Ivoire, Nugopọntọ Pọnla tọn basi opli vonọtaun de hẹ mẹmẹsunnu lẹ to 13 février 2011. Ojlẹ ayajẹ tọn enẹ hùn dotẹnmẹ dotena mẹmẹsunnu 3036 he pli dopọ to nọtẹn daho de to Abidjan nado pà Jehovah to pọmẹ hẹ gbẹtọ 3405 he pli dopọ to nọtẹn voovo atọ́n devo lẹ nado sèhó gbọn alokan yiyizan dali, ehe lẹndopọ yetọn yin 6441.