Be Ovi Towe lẹ Ko Wleawufo Ya?
1. Naegbọn wehọmẹvi lẹ dona wleawudai?
1 Wehọmẹ na bẹjẹeji to madẹnmẹ. Ayihaawe ma tin dọ ovi towe lẹ na pehẹ avùnnukundiọsọmẹ po kọgbidinamẹ lẹ po. Yé nasọ tindo dotẹnmẹ hundote yọyọ lẹ nado “dekunnu gando nugbo lọ go.” (Joh. 18:37) Be yé ko wleawufo ya?
2. Etẹwẹ ovi towe lẹ dona yọnẹn nado sọgan wleawudai?
2 Be ovi towe lẹ yọ́n nuhe mahẹ tintindo to nuwiwa he jẹagọdo nuyise yetọn lẹ po hùnwhẹ kosi tọn lẹ po mẹ bẹhẹn ya? Podọ be yé yọ́n nuhewutu mahẹ tintindo to yé mẹ ma do sọgbe ya? Be yé ko wleawudaina kọgbidinamẹ he yé na mọ sọn mẹdevo lẹ dè nado doafọna wepinplọn dahodaho lẹ, do dope, nùahàn sinsinyẹn kavi zan amasin adinọ lẹ ya? Be yé na dọ poun dọ nuwiwa he ma sọgbe de jẹagọdo sinsẹ̀n yetọn wẹ ya, kavi yé yọ́n lehe yé sọgan basi zẹẹmẹ nuyise yetọn lẹ tọn do?—1 Pita 3:15.
3. Nawẹ mẹjitọ lẹ sọgan yí ojlẹ sinsẹ̀n-bibasi whẹndo tọn zan nado gọalọna ovi yetọn lẹ nado wleawudai gbọn?
3 Mì Nọ Yí Ojlẹ Sinsẹ̀n-Bibasi Whẹndo Tọn Zan: Na nugbo tọn, mì sọgan nọ dọhodo nuhahun yọyọ he ovi mìtọn lẹ nọ pehẹ lẹ ji to owhe wehọmẹ tọn lọ gblamẹ eyin nuhudo etọn tin. Eyin mì dovivẹnu vonọtaun nado gbadopọnna nuhahun he yé sọgan pehẹ to wehọmẹ lẹ whẹpo wehọmẹ nido bẹ, ehe na na ovi mìtọn lẹ jidide. Naegbọn mì ma na yí ojlẹ sinsẹ̀n-bibasi whẹndo tọn dopo kavi humọ zan na ehe? Mì sọgan kanhose ovi mìtọn lẹ nado dọ nuhe nọ hẹn ayimajai wá na yé hugan dile yé to nulẹnpọn do wehọmẹ he to na bẹjẹeji lọ ji. Todin he ovi lọ lẹ ko whẹ́n bosọ tindo nukunnumọjẹnumẹ dogọ, mì sọgan vọ́ dogbapọnna whẹho he ji mì ko dọhodo to owhe he wayi lẹ mẹ. (Ps. 119:95) Mì sọgan nọ basi zepọn lẹ ehe mẹ mì na yinuwa te taidi mẹplọntọ, ayinamẹtọ, kavi wehọmẹvi hatọ de. Mì plọn ovi mìtọn lẹ lehe yé na nọ na gblọndo sọn Biblu mẹ do gọna lehe yé na nọ yí azọ́nwanu lẹ taidi Comment raisonner po Kanbiọ He Jọja lẹ Nọ Kanse po zan do.—Pọ́n Atọ̀họ̀-Nuhihọ́ lọ Tọn 15 décembre 2010, weda 3-5.
4. Etẹwẹ mẹjitọ wuntuntunnọ lẹ dona wà?
4 Avùnnukundiọsọmẹnu he jọja Klistiani lẹ dona pehẹ to azán godo tọn ehelẹ mẹ lẹ fọ́n bo to ‘awuvẹ nado pehẹ.’ (2 Tim. 3:1) Mẹjitọ wuntuntunnọ lẹ dona dovivẹnu nado lẹnnupọndo nuhahun he ovi yetọn lẹ na pehẹ lẹ ji jẹnukọn bo gọalọna yé nado duto yé ji. (Howh. 22:3) Mì wà nuhe go mì pé lẹpo bo gọalọna ovi mìtọn lẹ nado wleawudai whẹpo wehọmẹ nido bẹ.