Jehovah to Mí Plọn Nado Pegan Na Azọ́n Ehe — WESẸDOTẸN INTẸNẸT JI TỌN Watchtower Tọn

Jehovah to Mí Plọn Nado Pegan Na Azọ́n Ehe

1. Eyin Jehovah deazọ́n de na gbẹtọ lẹ, etẹwẹ e sọ nọ wà?

¹ Eyin Jehovah deazọ́n de na gbẹtọ lẹ, e sọ nọ na yé nuhe sin hudo yé tindo nado hẹn ẹn di. Di apajlẹ, to whenue Jehovah dọna Noa nado gbá aki de, yèdọ nuhe Noa ma ko wà pọ́n gbede, E sọ dọ lehe e na wà ẹ gbọn na ẹn. (Gẹn. 6:14-16) To whenue Mose he yin lẹngbọhọtọ whiwhẹnọ de yin azọ́ndena nado dọnsẹpọ mẹho Islaeli tọn lẹ po Falo po, Jehovah hẹn ẹn deji dọmọ: “Yẹn nasọ tin po onù towe po, bo plọn we nuhe hiẹ na dọ.” (Eks. 4:12) Mọdopolọ to egbehe, Jehovah nọ dọ lehe mí na hẹn azọ́n yẹwhehodidọ tọn mítọn di do na mí. E to mí plọn nado pegan na azọ́n ehe gbọn Wehọmẹ Lizọnyizọn Yẹwhehọluduta tọn po Opli Sinsẹ̀nzọn tọn po gblamẹ. Nawẹ mí sọgan mọaleyi sọn azọ́nplọnmẹ ehe mẹ gbọn?

2. Nawẹ mí sọgan mọaleyi sọn Wehọmẹ Lizọnyizọn Yẹwhehọluduta tọn mẹ gbọn?

² Wehọmẹ Lizọnyizọn Yẹwhehọluduta Tọn: Nọ gbadopọnna tito-to-whinnu osẹ dopodopo tọn whẹpo do yì opli. Enẹgodo, dile wehọmẹvi lẹ to nudọnamẹ ehelẹ zedonukọnnamẹ, a na mọ aliho mẹpinplọn tọn devo lẹ. (Howh. 27:17) Nọ hẹn owe Mọaleyi sọyi opli bo nọ yí i zan taidi nuplọnmẹwe. To whenue nugopọntọ wehọmẹ tọn dlẹnalọdo e to azọ́n wehọmẹvi dopodopo tọn godo, zẹhudo nuagokun he a jlo na yizan lẹ glọ bo basi kandai lẹ do owe lọ mẹ. Ṣigba, aliho dagbe hugan nado mọaleyi sọn wehọ ehe mẹ wẹ nado nọ tindo mahẹ. Be a ko ze yinkọ dai ya? To whenue a mọ azọ́ndenamẹ de yí, wleawu ganji bo yí ayinamẹ he yin nina we do yizan mẹ. To lizọnyizọn lọ mẹ, yí nuhe a plọn lẹ zan.

3. Etẹwẹ na gọalọna mí nado mọaleyi sọn Opli Sinsẹ̀nzọn tọn mẹ?

³ Opli Sinsẹ̀nzọn tọn: Mí na flin ayinamẹ he nọ yin nina to opli ehe whenu lẹ ganji eyin mí nọ hia nudọnamẹ lọ jẹnukọn bo wleawu nado na gblọndo. Eyin gblọndo mítọn ma nọ dite gbau, mẹsusu na penugo nado tindo mahẹ. Na ayidonugo sọwhiwhe tọn wadohia lẹ bo yí nuhe a mọdọ e na gọalọna we nado tindo kọdetọn dagbe to lizọnyizọn towe mẹ lẹ do yizan mẹ. Nọ hẹn vọkan Lizọnyizọn Ahọluduta Tọn Mítọn he bẹ hosọ taun taun he a sọgan yizan to kunnudegbe lẹ hẹn do alọji.

4. Naegbọn mí dona yí nuhe mí nọ plọn to opli lẹ ji zan ganji?

⁴ Taidi azọ́n he yin didena Noa po Mose po, azọ́ndenamẹ mítọn nado lá wẹndagbe lọ na mẹhe tin to aigba ji lẹpo ma bọawu. (Mat. 24:14) Mí sọgan tindo kọdetọn dagbe eyin mí nọ ganjẹ Jehovah, yèdọ Nuplọnmẹtọ Daho mítọn go, bo nọ yí nuhe e plọn mí nado pegan lẹ zan ganji.—Isa. 30:20.