Jẹhẹnu Titengbe Hugan Mẹplọntọ Dagbe de Tọn
1. Jẹhẹnu titengbe hugan tẹwẹ mẹplọntọ dagbe de dona tindo?
1 Etẹwẹ nọ hẹn mẹde penugo nado yin Biblu plọnmẹtọ dagbe? Be wésise, numimọ he e tindo to nugbo lọ mẹ kavi nugopipe jọwamọ tọn etọn lẹ wẹ ya? Paali. Na nugbo tọn, jẹhẹnu dopolọ he yin hẹndi Osẹ́n lọ tọn, bo nọ dohiagona devi Jesu tọn lẹ bosọ yin dehe yiaga bo dọnmẹdogo hugan to jẹhẹnu tangan Jehovah tọn lẹ mẹ lọ wẹ, yèdọ owanyi. (Joh. 13:35; Gal. 5:14; 1 Joh. 4:8) Mẹplọntọ dagbe nọ do owanyi hia.
2. Naegbọn e do yin nujọnu dọ mí ni nọ do owanyi hia gbẹtọ lẹ?
2 Nọ Do Owanyi Hia Gbẹtọ Lẹ: Jesu, Mẹplọntọ Daho lọ, do owanyi hia gbẹtọ lẹ, podọ enẹ whàn yé nado dotoaina ẹn. (Luku 5:12, 13; Joh. 13:1; 15:13) Eyin ninọmẹ gbẹtọ lẹ tọn nọ duahunmẹna mí, mí na nọ yí dotẹnmẹ hundote lẹpo zan nado dekunnu. Aliglọnnamẹnu lẹ taidi homẹkẹn po ojlo matindo po ma na hẹn mí gbọjọ. Mí na nọ do ojlo nujọnu tọn hia mẹhe mí nọ dọyẹwheho na lẹ bo nasọ nọ diọada sọgbe hẹ ahunmẹdunamẹnu yetọn lẹ. Gbọnvona dọ mí na nọ yí whenu susu zan hẹ nuplọntọ dopodopo, mí nasọ nọ yí whenu susu zan nado wleawu whẹpo do deanana plọnmẹ Biblu dopodopo.
3. Nawẹ owanyi mítọn na nugbo Biblu tọn lẹ na gọalọna mí to lizọnyizọn lọ mẹ gbọn?
3 Yiwanna Nugbo Biblu Tọn Lẹ: Jesu sọ yiwanna nugbo Biblu tọn lẹ bo nọ pọ́n yé hlan taidi adọkunnu. (Mat. 13:52) Eyin mí yiwanna nugbo lọ, mí na nọ dọho po zohunhun po podọ enẹ sọgan whàn todoaitọ mítọn lẹ. Owanyi enẹ na gọalọna mí nado nọ ze ayidonugo do nudọnamẹ họakuẹ he mí nọ zedonukọnnamẹ lẹ ji kakati nido yin do nugomape mítọn lẹ ji, podọ enẹ na zọ́n bọ mí ma na nọ dibu sọmọ to lizọnyizọn lọ mẹ.
4. Nawẹ mí sọgan wleawuna owanyi gbọn?
4 Wleawuna Owanyi: Nawẹ mí sọgan wleawuna owanyi na gbẹtọ lẹ gbọn? Gbọn ayihamẹlinlẹnpọn do owanyi he Jehovah po Visunnu etọn po dohia gọna lehe ninọmẹ gbigbọmẹ tọn mẹhe tin to aigba-denamẹ mítọn ji lẹ tọn blawu do sọ ji dali. (Malku 6:34; 1 Joh. 4:10, 11) Owanyi mítọn na nugbo Biblu tọn lẹ na siso dogọ eyin mí nọ basi oplọn mẹdetiti tọn to gbesisọ mẹ bosọ nọ lẹnayihamẹpọn do nuhe mí nọ plọn lẹ ji. Adà sinsẹ́n gbigbọ tọn de wẹ owanyi. (Gal. 5:22) Enẹwutu, mí sọgan vẹ̀ Jehovah nado na mí gbigbọ wiwe bosọ gọalọna mí nado wleawuna owanyi dogọ. (Luku 11:13; 1 Joh. 5:14) Mahopọnna obá he mẹ mí sewé jẹ, numimọ mítọn to nugbo lọ mẹ kavi nugopipe jọwamọ tọn mítọn lẹ, owanyi didohia wẹ na gọalọna mí nado yin Biblu plọnmẹtọ dagbe.