Azọ́njiawu Nudida Tọn lẹ Nọ De Gigo Jiwheyẹwhe Tọn Hia — WESẸDOTẸN INTẸNẸT JI TỌN Watchtower Tọn

Azọ́njiawu Nudida Tọn lẹ Nọ De Gigo Jiwheyẹwhe Tọn Hia

Mẹsusu nọ mọ awuvivi to nudida lẹ pinpọn mẹ. Ṣigba, omẹ vude poun wẹ mọnukunnujẹemẹ dọ nudida lẹ sọgan plọn mí nususu gando linlẹn po numọtolanmẹ Mẹdatọ Daho mítọn tọn lẹ po go. (Lom. 1:20) To hohowhenu, Davidi plọnnu gando Jehovah go gbọn Ohó gbọdo Etọn gblamẹ. Ṣigba, nudevo he sọ gọalọna Davidi nado dọnsẹpọ Jiwheyẹwhe wẹ ‘nulinlẹnpọndo’ nudida lẹ ji. (Ps. 8:3, 4) Video lọ he hosọ etọn yin Les merveilles de la création révèlent la gloire de Dieu (Azọ́njiawu Nudida Tọn lẹ Nọ De Gigo Jiwheyẹwhe Tọn Hia) na gọalọna mí, ovi mítọn lẹ po plọnmẹ Biblu mítọn lẹ po nado yí sọwhiwhe do lẹnnupọndo nudida Jehovah tọn delẹ ji, nado doayi jẹhẹnu Mẹdatọ Daho mítọn tọn lẹ go bo yọ́n omẹ nankọ he Ewọ yin. Mọwiwa na gọalọna mí nado dọnsẹpọ ẹ dogọ. To video lọ pinpọn godo, pọ́n eyin a sọgan na gblọndo na kanbiọ he bọdego ehelẹ.

(1) Nawẹ gbigblo po titojininọ wẹkẹ yinukundomọ lọ tọn po hẹn pinpẹn-nutọn-yinyọnẹn towe na Jehovah sinyẹn deji gbọn? (Isa. 40:26) (2) Eyin mí yí sọwhiwhe do pọ́n osin, etẹwẹ mí sọgan plọn gando Jiwheyẹwhe go? (Osọ. 14:7) (3) Nawẹ gbigblo aigba tọn po fie e te do owhè po do nuyọnẹn Jehovah tọn hia gbọn? (4) Etẹwẹ yin lẹndai osun tọn? (Ps. 89:37) (5) Nawẹ Jehovah dá gbẹtọ lẹ gbọn na yé nido sọgan duvivi ogbẹ̀ tọn? (6) Etẹwẹ ADN yin? (Ps. 139:16) (7) Etẹwẹ gbẹtọvi lẹ yí do gbọnvo na nudida Jehovah tọn he tin to aigba ji lẹpo? (Gẹn. 1:26) (8) Etẹwẹ hiẹ to jejeji nado duvivi etọn to aihọn yọyọ lọ mẹ?

Adà Devo Lẹ: (9) Fie wẹ sinmẹ voovo lẹ wá sọn? (10) Nawẹ atin lẹ nọ dọ̀n osin sọn adọ̀ yetọn mẹ kaka yì aga atin lọ tọn gbọn? (11) Etẹwẹ osin nọ wà to agbasa mítọn mẹ? (12) Na apajlẹ kanṣiṣa pẹkipẹki he tin to nutogbẹ̀ lẹ ṣẹnṣẹn tọn. (13) Nawẹ nudida lẹ plọn nado nọpọ́ hẹ nudida devo lẹ gbọn? (14) Etẹwẹ nọ yin “angle d’or,” podọ nawẹ e sọawuhia do to nudida lẹ mẹ?

‘Mì Pọ́n Alọnuzọ́n Jehovah Tọn lẹ Tlintlin’: Jesu dotuhomẹna mí nado “pọ́n ohẹ̀ agahomẹ tọn lẹ tlintlin” podọ nado “plọnnu sọn vounvoun danji tọn lẹ dè.” (Mat. 6:26, 28) Mọwiwà sọgan hẹn yise mítọn lodo, gọalọna mí nado dejido Mẹdatọ lọ go, podọ nado wleawuna pinpẹn-nutọn-yinyọnẹn na nuyọnẹn, huhlọn mẹwhlẹngán tọn po owanyi Jehovah tọn po. Kakati nado nọ na ayidonugo alọnuzọ́n gbẹtọ tọn lẹ zẹjlẹgo, mì gbọ mí ni nọ dín whenu bo nọ dovivẹnu nado pọ́n azọ́njiawu nudida Jehovah tọn lẹ tọn bosọ lẹnnupọndo nuhe yé plọn mí gando Jiwheyẹwhe mítọn go lẹ ji.—Ps. 19:1.