Wekanhlanmẹ de sọn Hagbẹ Anademẹtọ Dè

Kunnudetọ Jehovah Tọn Hatọ Vivẹ́ lẹ Emi:

Homẹ mítọn hùn taun nado kanwehlan mì devizọnwatọ nugbonọ Jehovah tọn vivẹ́ lẹ, he hugan livi ṣinawe todin. Eyin mì dukosọ hẹ yisenọ hatọ de to otò devo mẹ, mì nọ tindo numọtolanmẹ vonọtaun de na ode awetọ to afọdopolọji. (Joh. 13:34, 35) Matin ayihaawe, dile a to Annuaire owhe ehe tọn hia, kandai yise po nugbonọ-yinyin mẹmẹsunnu mítọn lẹ tọn to otò voovo lẹ mẹ po na flin we kanṣiṣa vonọtaun he kọ̀n mí dopọ enẹ.

Linlin voovo he mí sè lẹdo aihọn pé dohia dọ suhugan mìtọn nọ yí nukun nujọnu tọn do pọ́n tito sinsẹ̀n-bibasi whẹndo tọn mìtọn. Mì mẹhe tindo ovi flinflin lẹ nọ yí aliho he fọnjlodotenamẹ susu zan nado dọ̀n ayidonugo ovi mìtọn lẹ tọn. (Efe. 6:4) Kanṣiṣa asu po asi po lẹ tọn nọ lodo dogọ dile yé to nuplọn dopọ. (Efe. 5:28-33) Na nugbo tọn, nupinplọn sisosiso mọnkọtọn to Ohó Jiwheyẹwhe tọn mẹ nọ hẹn ale wá na mẹdopodopo gọna whẹndo lẹ.—Jọṣ. 1:8, 9.

Mì mẹhe hẹn nutindo po mẹyiwanna mìtọn lẹ po bu to nugbajẹmẹji jọwamọ tọn agọe tọn lẹ whenu, onú mìtọn biọ lanmẹ na mí taun. Mí sọ yí dotẹnmẹ hundote ehe zan nado dọnudo mẹhe desọn ojlo mẹ nado nọgodona tito alọgọ kọgbọ tọn lẹ to ojlẹ nugbajẹmẹji tọn mọnkọtọn lẹ mẹ lẹpo. (Owalọ 11:28-30; Gal. 6:9, 10) Humọ, to agun dopodopo mẹ, delẹ to mì mẹ nọ doayi nuhudo agbasa tọn mẹmẹsunnu mítọn lẹ tọn go bo nọ desọn ojlo mẹ nado gọalọ. Taidi Dọlka hohowhenu tọn, mì sù to ‘azọ́n dagbe lẹ po nunina lẹblanu tọn lẹ po mẹ.’ (Owalọ 9:36) Mì deji dọ Jehovah nọ doayi nuyiwa mìtọn ehe go bo nasọ suahọ mì susugege.—Mat. 6:3, 4.

To otò delẹ mẹ, mẹhe nọ yí ‘osẹ́ndoai do ṣika’ lẹ nọ hò jlọjẹ mìtọn lẹ yí. (Ps. 94:20-22) Na mì yọnẹn dọ Jesu ko dọ dọ mì na yin homẹkẹndo wutu, mì nọ yí adọgbigbo do doakọnnanu bo nọ ganjẹ Jehovah go taidi fibẹtado mìtọn. (Joh. 15:19, 20) Mì kudeji dọ mí nọ hodẹ̀ do ota mì mẹyiwanna mítọn lẹ tọn mẹ to gbesisọ mẹ dile mì zindonukọn nado “yiavùnlọ to mẹlẹpo nukọn he to nukanbiọ mì gando whẹwhinwhẹ́n todido he tin to mì mẹ lọ tọn go.”—1 Pita 3:13-15.

Livi susu mìtọn nọ gbọṣi wiweji to walọyizan-liho egbesọegbesọ mahopọnna dọ Satani nọ kàn ayiha gigẹdẹ lẹ nado hẹn fẹnnuwiwa gbayipe. Mì mẹhe to mọwà lẹ jẹna pipà taun. To whenue nujinọtedo walọ dagbe aihọn tọn fọ́n bo to doyi, mìwlẹ to “huhlọn mọyi sọn Oklunọ dè podọ sọn hlọnhlọn huhlọn etọn tọn mẹ.” (Efe. 6:10) Mì ko “ze gbaja Jiwheyẹwhe tọn blebu do” podọ ehe nọ gọalọna mì nado nọavùnte sọta “ayiha wintinwintin Lẹgba tọn lẹ.” (Efe. 6:11, 12) Mì ma wọn blo dọ Jehovah nọ yí mì zan nado na gblọndo he tátá Satani, mẹhe to vivlẹ ẹ.—Howh. 27:11.

Homẹ mítọn hùn nado sè dọ gbẹtọ 19374737 wẹ wá Oflin okú Oklunọ mítọn tọn tẹnmẹ to owhe he wayi. Sọha lọ sù sọmọ na suhugan mìtọn wẹ yigbe nado basi gbehosọnalitọ alọgọtọ tọn to avril 2011. Ehe hẹn ẹn yọnbasi na livi susu gbẹtọ lẹ tọn to aigba ji nado sè ogbè Kunnudetọ nugbonọ Jehovah tọn he to pipà ẹ to pọmẹ lẹ tọn. (Lom. 10:18) Vlavo hiẹ yin dopo to omẹ 2657377 he basi gbehosọnalitọ alọgọtọ tọn to osun enẹ mẹ lẹ mẹ kavi hiẹ dovivẹnu nado gbloada na sinsẹ̀nzọn towe to aliho de mẹ, mìmẹpo wẹ hẹn ahun mítọn gọ́ na ayajẹ, na gbigbọ mẹdezejo tọn mìtọn po zohunhun he mì tindo na azọ́n lọ po.—Ps. 110:3; Kọl. 3:23.

To owhe he wayi, mẹyọyọ 263131 wẹ yí baptẹm taidi dohia klandowiwe yetọn tọn na Jehovah. Mí dopẹna Jehovah na ehe, podọ mí dọnudo mìmẹpo na mì kọnawudopọ hẹ mí to oylọ-bibasina mẹdevo lẹ mẹ dọ: “‘Wá!’ Podọ gbọ mẹdepope he to sisè ni dọmọ: ‘Wá!’ Podọ gbọ mẹdepope he nugbla to hùhù ni wá; gbọ mẹdepope he jlo ni yí osin ogbẹ̀ tọn vọnu.” (Osọ. 22:17) To plidopọ agbegbe 2011 tọn mítọn lẹ ji, mí gbadopọnna adà voovo Ahọluduta Jiwheyẹwhe tọn he ko yin didoai to olọn mẹ tọn lẹ. Enẹwutu, odẹ̀ mítọn todin hugan gbede pọ́n wẹ yindọ, ‘Ahọluduta Jiwheyẹwhe tọn ni wá!’ Hogbe jidenamẹ Jesu tọn lẹ dọ “yẹn ja to niyaniya mẹ” nọ dozolanmẹna mí sọmọ bọ mí yí ahun lẹpo do kọngbedopọ hẹ apọsteli Johanu dọmọ: “Niṣẹ! Wá, Oklunọ Jesu.”—Osọ. 22:20.

Mẹmẹsunnu po mẹmẹyọnnu vivẹ́ lẹ po emi, dile mì to tenọpọn nujijọ ayidego tọn enẹ, mì jaale bo deji dọ mí yiwanna dopodopo mìtọn na mì nọ do owanyi he mì tindo na Jehovah hia “to walọ po nugbo po mẹ”!—1 Joh. 3:18.

Mẹmẹsunnu mìtọn lẹ,

Hagbẹ Anademẹtọ Kunnudetọ Jehovah tọn lẹ tọn