Jẹ Dogbó lọ Kọ̀n—Duto Nuhahun Whenu Matindo Tọn Ji
1. Naegbọn mẹdelẹ nọ whleawu nado ze plọnmẹ Biblu donukọnnamẹ?
1 Mẹdelẹ nọ whleawu nado ze plọnmẹ Biblu donukọnnamẹ na alọnu yetọn ján wutu. Nado penukundo Biblu plọntọ de go nọ biọ whenu. E nọ biọ whenu nado wleawuna oplọn lọ, nado deanana ẹn, podọ nado gọalọna nuplọntọ lọ na e nido duto aliglọnnamẹnu etọn titi lẹ ji. Apọsteli Paulu dọ dọ emi na alindọn emitọn mẹhe tin to Tẹsalonika lẹ nado sọgan gọalọna yé na yé ni do wá yọ́n Jehovah. (1 Tẹs. 2:7, 8) Eyin alọnu mítọn tlẹ ján taun, nawẹ mí sọgan penugo nado deanana plọnmẹ Biblu de gbọn?
2. Nawẹ owanyi mítọn na Jehovah dona yinuwado lehe mí nọ yí whenu mítọn zan do ji gbọn?
2 Sinsẹ̀n-Bibasi Mítọn Nọ Biọ Whenu: Whenu he mí nọ yizan na sinsẹ̀n-bibasi mítọn ma whè. Di apajlẹ, mí nọ saba yí whenu zan na opli lẹ, lizọnyizọn lọ, Biblu hihia po dẹ̀hiho po. Alọwlemẹ he sin alọnu tlẹ ján de nọ yí ayajẹ do de whenu dovo na alọwlemẹ hatọ etọn. Mọdopolọ, lehe homẹ mítọn nọ hùn nado “fli” ojlẹ na sinsẹ̀n-bibasi mítọn, na mí yiwanna Jehovah wutu do sọ! (Efe. 5:15-17; 1 Joh. 5:3) Sọgbe hẹ nuhe Jesu dọ, azọ́n mẹhẹnzun devi tọn yin adà titengbe sinsẹ̀n-bibasi mítọn tọn de. (Mat. 28:19, 20) Nulinlẹnpọn do ehe ji na gọalọna mí ma nado whleawu nado kẹalọyi azọngban lọ nado deanana plọnmẹ Biblu de.
3. Eyin ninọmẹ lẹ tlẹ glọnalina mí, nawẹ mí sọgan penukundo plọnmẹ Biblu de go gbọn?
3 Ṣigba, etẹwẹ mí sọgan wà eyin agbasazọ́n, azọ̀n jẹmagbọ kavi lẹblanulọkẹyi yẹwhehọluduta tọn mítọn lẹ ma nọ na mí whenu? Wẹnlatọ he dona tọ́nwhẹ̀n sọn ojlẹ de mẹ jẹ devo mẹ delẹ nọ yí alokan kavi hodọdopọ Internet ji tọn zan nado deanana plọnmẹ Biblu yetọn. Mẹhe azọ̀n jẹmagbọ nọ glọnalina delẹ ko basi tito bọ nuplọntọ yetọn lẹ nọ wá owhé yetọn gbè na oplọn lọ. Mẹdevo lẹ nọ basi tito bọ wẹnlatọ dejidego de nọ deanana oplọn lọ do otẹn yetọn mẹ to whenue alọnu yetọn ján.
4. Dona tẹlẹ wẹ anadidena plọnmẹ Biblu de nọ hẹnwa?
4 Paulu mọ ayajẹ susu to whenu po huhlọn etọn po yiyizan nado plọn nugbo mẹdevo lẹ mẹ. (Owalọ 20:35) To whenue e lẹnnupọndo sinsẹ́n he azọ́n he e wà to Tẹsalonika detọ́n lẹ ji, e yin whinwhàn nado dopẹna Jehovah. (1 Tẹs. 1:2) Ayajẹ po pekọ he mí nọ tindo to lizọnyizọn lọ mẹ po sọgan jideji eyin mí ma nọ dike nuhahun whenu matindo tọn ni glọnalina mí ma nado deanana plọnmẹ Biblu lẹ.