“Dekunnu Mlẹnmlẹn”

1. Apajlẹ dagbe tẹwẹ apọsteli Paulu zedai to lizọnyizọn lọ mẹ?

¹ “Nọ hẹn lizọnyizọn towe di to gigọ́ mẹ.” (2 Tim. 4:5) Matin ayihaawe, po awuvivo po wẹ apọsteli Paulu na ayinamẹ ehe Timoti. To gblagbla owhe 47 po 56 W.M. po tọn mẹ, Paulu dotana gbejizọnlin mẹdehlan tọn atọ̀n. Owe Owalọ lẹ tọn tlẹ dọ whlasusu gando Paulu go dọ ewọ ‘dekunnu mlẹnmlẹn.’ (Owalọ 23:11; 28:23) Nawẹ mílọsu sọgan wàmọ to egbehe gbọn?

2. Nawẹ mí sọgan dekunnu mlẹnmlẹn to whenue mí to yẹwhehodọ sọn whédegbè jẹ whédegbè gbọn?

² Sọn Whédegbè jẹ Whédegbè: To whenue mí to vivẹnudo nado jẹ whétọ he ma ko sè wẹndagbe lọ pọ́n gbede lẹ dè, e sọgan biọ dọ mí ni nọ dla yé pọ́n to ojlẹ voovo mẹ to azán lọ ji. Tatọ́ whẹndo tọn lọ sọgan nọ nọ̀ whégbè to whèjai kavi sẹfifo lẹ. Mí dona dovivẹnu nado nọ dọho hẹ mẹdepope he mí mọ to owhé dopodopo gbè bosọ nọ yì dla mẹhe mí ma nọ mọ to whégbè lẹ pọ́n whẹwhẹ. Etẹwẹ lo, eyin vivẹnudido towe nado mọ mẹde to whégbè ma tindo kọdetọn dagbe? Wekinkan kavi kàntitẹ hlan mẹlọ sọgan de sinsẹ́n dagbe tọ́n.

3. Dotẹnmẹ hundote tẹlẹ wẹ a tindo nado dekunnu to gbangba podọ to aliho mayin aṣa tọn mẹ?

³ To Gbangba Podọ to Aliho Mayin Aṣa Tọn Mẹ: To egbehe, devizọnwatọ Jehovah tọn lẹ nọ hẹn ‘nuyọnẹn nugbo’ lọ yì mẹdepope he jlo na sè dè. To whedelẹnu, yé nọ wàmọ “to alihogbó ji” kavi ‘to nọtẹn gbangba tọn lẹ.’ (Howh. 1:20, 21) Be mí nọ tin to gbesisọ mẹ nado dekunnu to nuwiwa egbesọegbesọ tọn mítọn lẹ mẹ ya? Be yè sọgan dọ gando mí go dọ mí nọ ‘hẹn alọnu mítọn ján petepete to ohó lọ didọ mẹ’ ya? (Owalọ 18:5) Eyin mọ wẹ, be mí to azọngban mítọn nado “dekunnu mlẹnmlẹn” hẹndi niyẹn.—Owalọ 10:42; 17:17; 20:20, 21, 24.

4. Nawẹ odẹ̀ po ayihamẹlinlẹnpọn po nọ gọalọna mí nado dekunnu mlẹnmlẹn gbọn?

⁴ Ṣigba to whedelẹnu, na obu, jimadedo mẹdetiti go, winyan kavi awugbopo mọnkọtọn devo lẹ wutu, mí sọgan nọ whleawu nado dekunnu. Ayihaawe ma tin dọ Jehovah mọnukunnujẹ nugopipe mítọn lẹ mẹ. (Ps. 103:14) Enẹwutu, to ninọmẹ mọnkọtọn lẹ mẹ, mí sọgan biọ ẹ to odẹ̀ mẹ nado na mí adọgbigbo he mí nado dọho. (Owalọ 4:29, 31) Humọ, to whenue mí to oplọn mẹdetiti tọn basi bo to ayihamẹlẹnpọndo Ohó Jiwheyẹwhe tọn ji, mí sọgan dovivẹnu nado hẹn pinpẹn-nutọn-yinyọnẹn mítọn na yẹyi daho hugan wẹndagbe lọ tọn siso deji. (Flp. 3:8) Ehe na whàn mí nado nọ lá wẹndagbe lọ po zohunhun po.

5. Nawẹ mí sọgan tindo mahẹ to dọdai Joẹli tọn hinhẹndi mẹ gbọn?

⁵ Yẹwhegán Joẹli dọ dọdai dọ whẹpo azán daho dobu Jehovah tọn na wá, omẹ Jiwheyẹwhe tọn lẹ na ‘zindonukọn’ to yẹwhehodidọ mẹ bo ma na dike nudepope ni glọnalina yé. (Joẹ. 2:2, 7-9) Enẹwutu, mì gbọ mí ni tindo mahẹ gigọ́ to azọ́n kunnudide tọn he ma na yin vivọbasi pọ́n gbede ehe mẹ!