Wekanhlanmẹ de sọn Hagbẹ Anademẹtọ Dè
Kunnudetọ Jehovah Tọn Hatọ Vivẹ́ lẹ Emi:
Mẹmẹsunnu po Mẹmẹyọnnu Vivẹ́ lẹ po Emi:
Otọ́ mítọn olọn mẹ tọn, Jehovah, wẹ yin apajlẹ dagbe hugan na nuhe dù owanyi didohia. Abajọ Biblu do dọ dọ, “Jiwheyẹwhe wẹ owanyi.” (1 Joh. 4:8) Mahopọnna dọ Jehovah wẹ yin Ganhunupotọ lọ, Biblu ma dọ pọ́n gbede dọ, “Jiwheyẹwhe wẹ huhlọn.” Owanyi wẹ yin dodonu tintan he ji gandudu etọn sinai do. Lehe jẹhẹnu ehe nọ whàn mí nado dọnsẹpọ ewọ do sọ!
Homẹhunnu de wẹ e yin dọ Jehovah ma nọ hẹn mí gánnugánnu nado sẹ̀n ẹn gba. Ewọ ma yin aṣẹglanglan-panamẹtọ. E jlo dọ mí ni sẹ̀n emi na mí yiwanna ẹn sọn ahun mẹ wá wutu. To whenue mí wàmọ, mí nọ dohia dọ mí kẹalọyi gandudu etọn, na mí kudeji dọ gandutọ dodonọ podọ owanyinọ de wẹ ewọ yin. Kunnudenu ehelẹ tọn ko họnwun sọn bẹjẹeji whenuho gbẹtọvi tọn gbọ́n.
Jehovah ma hẹn Adam po Evi po gánnugánnu nado setonuna ẹn gba, kakatimọ, e na yé dotẹnmẹ nado basi nudide yetọn titi. Eyin yé ko yiwanna Jehovah nugbonugbo bo yọ́n pinpẹn nuhe ewọ ko wà na yé tọn wẹ, yé na ko nọavùnte sọta vivẹnudido Satani tọn nado hẹn yé ṣiatẹ.
To nukọn mẹ, Mose dọ to hodidọ godo tọn etọn mẹ na akọta Islaeli tọn dọmọ: “Pọ́n, yẹn ko ze to egbehe do nukọn towe ogbẹ̀ po dagbe po, podọ okú po oylan po.” (Deut. 30:15) Akọta lọ tindo mẹdekannujẹ nado de aliho gbẹninọ tọn he e jlo na hodo. Mọdopolọ, Jọṣua dọna Islaelivi lẹ dọmọ: ‘Eyin e sọawuhia di oylan hlan mì nado sẹ̀n Jehovah, mì bo de to azán he gbè mẹhe mì na nọ sẹ̀n.’ Akọta lọ gblọnna Jọṣua dọmọ: “Jiwheyẹwhe dike blo bọ míwlẹ na do gbẹ́ [Jehovah] dai.” (Jọṣ. 24:15, 16) Numọtolanmẹ dopolọ wẹ mílọsu nọ tindo to egbehe. Na mí yiwanna Jehovah wutu, mí ma na “dike” gbede bo gbẹ́ ẹ dai.
Taidi Klistiani nugbo lẹ, mí yọ́n nuhe mẹdekannujẹ nudide bibasi tọn bẹhẹn. Mahopọnna dọ mẹho agun tọn lẹ tindo aṣẹ nado nọ na ayinamẹ podọ nado tlẹ nọ domẹplọnlọmẹgo, yé ma nọ tẹnpọn nado dugán do mẹdevo lẹ ji kavi deanana gbẹzan po yise yetọn po gba. Apọsteli Paulu wlan dọmọ: “E ma yindọ mí duklunọ do yise mìtọn ji wẹ gba, ṣigba azọ́nwatọ hatọ mìtọn lẹ wẹ mí yin na ayajẹ mìtọn, na gbọn yise mìtọn dali wẹ mì do to ote.”—2 Kọl. 1:24.
Ayajẹnu wẹ e nọ yin nado wà nude na mí tindo ojlo nado wà nulọ, kakati nido yin dọ yè hẹn mí gánnugánnu nado wà ẹ. Jehovah nọ jlo dọ owanyi ni whàn mí nado wà nuhe sọgbe. Paulu do nujọnu-yinyin nugbo enẹ tọn hia to whenue e wlan to gbọdo glọ dọmọ: “Eyin yẹn yí nutindo ṣie lẹpo do na núdùdù mẹdevo lẹ, podọ eyin yẹn yí agbasa ṣie namẹ, na yẹn nido doawagun, ṣigba bo ma tindo owanyi, ale depope ma tin to e mẹ na mi.”—1 Kọl. 13:3.
Lehe e nọ hẹn ayajẹ po pipà daho po wà na Jehovah do sọ nado mọdọ livi susu mẹmẹsunnu po mẹmẹyọnnu mítọn lẹ po tọn to sinsẹ̀n ẹn na yé yiwanna ẹn po ahun yetọn lẹpo po wutu!
Taidi kọdetọn de, Jehovah tindo owanyi sisosiso na devizọnwatọ etọn lẹpo, kakajẹ mì yọpọvu po jọja aflanmẹ lẹpo po ji, he nọ dohia dọ mì yiwanna Jehovah kakati nido yin aihọn lọ po ojlo mẹdetiti tọn he e nọ zedonukọnna mì lẹ po. Mì deji dọ owanyi he mílọsu tindo na mì siso taun.—Luku 12:42, 43.
To owhe he wayi mẹ, owanyi he mì mẹmẹsunnu, mẹmẹyọnnu po jọja lẹ po tindo na Jehovah whàn mì nado yí gànhiho 1 748 697 447 zan nado lá wẹndagbe lọ. Gbọn owanyi dali, wẹnlatọ 7 782 346 wẹ tindo mahẹ to lizọnyizọn lọ mẹ lẹdo aihọn pé. Homẹ mítọn hùn dọ mẹyọyọ 268 777, ehe bẹ jọja susu lẹ hẹn, wẹ basi dohia klandowiwe yetọn na Jehovah tọn gbọn baptẹm osin tọn dali. Ehe dohia dọ to madozẹnzẹn mẹ, gbẹtọ 5 168 wẹ yí baptẹm to sẹfifo dopodopo. Lehe enẹ hẹn homẹ mítọn hùn do sọ!
To ojlẹ opodo tọn ehe mẹ, omẹ Jiwheyẹwhe tọn lẹ dona doakọnna nuhahun susu lẹ, avùnnukundiọsọmẹnu lẹ, homẹkẹn, manọna, podọ mẹdelẹ dona diahi hẹ mẹhowhe. Ṣigba gbemima mítọn wẹ ma nado “joagọyigodo” kavi “gbọjọ” gbede. Mí yiwanna mìmẹpo taun.—Heb. 10:39; 2 Kọl. 4:16.
Mẹmẹsunnu mìtọn lẹ,
Hagbẹ Anademẹtọ Kunnudetọ Jehovah tọn lẹ tọn