Wekanhlanmẹ de sọn Hagbẹ Anademẹtọ Dè

Devizọnwatọ Whégbè Tọn Hatọ Vivẹ́ lẹ Emi:

Lehe homẹ mítọn hùn nado kanwehlan mì to bẹjẹeji owhe ayidego tọn ehe tọn do sọ! Sẹpọ vivọnu 2014 tọn, e na basi owhe kanweko plipli sọn whenue Ahọlu yiwanna mítọn Jesu Klisti jẹ gandu ji to kẹntọ etọn lẹ ṣẹnṣẹn.—Ps. 110:1, 2.

To bẹjẹeji owhe sinsẹ̀nzọn tọn ehe tọn, to opli whemẹwhemẹ tọn Watch Tower Bible and Tract Society of Pennsylvania tọn whenu, Wedegbẹ́ Lẹdogbedevomẹ Biblu Aihọn Yọyọ tọn lọ de lẹdogbedevomẹ yọyọ Biblu tọn he yin vivọjlado de tọ́n to Glẹnsigbe mẹ, yèdọ lẹdogbedevomẹ Biblu tọn dagbe hugan lọ he tin-to-aimẹ na gbẹtọvi lẹ. Jehovah yí visunnu etọn titi he e yí gbigbọ do de lẹ zan nado wleawuna Lẹdogbedevomẹ Aihọn Yọyọ Tọn he sọgbe ehe. (Lom. 8:15, 16) Whẹwhinwhẹ́n ehe kẹdẹ dohia dọ lẹdogbedevomẹ vonọtaun de wẹ Biblu ehe yin, kavi e ma yin mọ wẹ?

Na owhe susu lẹ, Wedegbẹ́ Wekinkan tọn Hagbẹ Anademẹtọ lọ tọn ko yí lẹdogbedevomẹ Biblu tọn bibasi do dó yanwle etọn tintan. To egbehe, Lẹdogbedevomẹ Aihọn Yọyọ Tọn lọ blebu kavi apadewhe etọn tin-to-aimẹ to ogbè 121 mẹ. Mí to tulina mì nado dohia Jehovah dọ mì yọ́n pinpẹn Biblu he mì tindo ehe tọn taun. Mì nọ hia ẹ bosọ nọ lẹnayihamẹpọn deji egbesọegbesọ. Gbọnmọ dali, mì na dọnsẹpọ Dowatọ etọn pẹkipẹki, yèdọ Jehovah Jiwheyẹwhe.—Jak. 4:8.

Eyin mí sè whlepọn he mẹmẹsunnu po mẹmẹyọnnu vivẹ́ mítọn lẹ po to pipehẹ, e nọ yinuwado mí ji taun. E họnwun dọ whlepọn enẹlẹ sọgan nọ hẹn ẹn vẹawuna yé to whedelẹnu nado nọ jaya hẹ mẹmẹsunnu yetọn lẹ. Di apajlẹ to agọe, whẹndo de biọ nuhahun sinsinyẹn mẹ to Asie to whenue onọ̀ lọ bẹ azọ̀n asaku-awàku tọn to ajiji mẹ. Na doto lẹ ma mọnukunnujẹ azọ̀n he jẹ onọ̀ lọ te mẹ taun wutu, yé ma penugo nado gbọazọ̀nna ẹn. Ninọmẹ lọ blawu taun! Enẹ biọ dọ asu lọ ni nọ penukundo asi etọn go to okle po ozán po. Visunnu yetọn po viyọnnu yetọn awe lẹ po to apajlẹ dagbe zedai taidi Klistiani lẹ gbọn godonọnamẹ owanyinọ didohia mẹjitọ yetọn lẹ dali. Whẹndo apajlẹ dagbenọ ehe gọna mìmẹpo he ko diahi hẹ whlepọn voovo lẹ po kọdetọn dagbe po lẹ sọgan duvivi ayajẹ he akọndidona whlepọn yise tọn mìtọn lẹ nọ hẹnwa tọn. (Jak. 1:2-4) Jehovah na jide mẹyiamisisadode etọn lẹ po lẹngbọ devo lẹ po dọ mí na yin ayajẹnọ eyin mí zindonukọn nado to akọndona whlepọn lẹ, na mí na mọ ogbẹ̀ madopodo!—Jak. 1:12.

To owhe he wayi mẹ, gbẹtọ 19 241 252 wẹ wá Oflin. Lehe e yin tulinamẹnu do sọ nado mọdọ mẹsusu gbògbéna Jehovah po Jesu Klisti po gbọn opli titengbe hugan he omẹ Jiwheyẹwhe tọn lẹ basi to owhe lọ mẹ wiwá dali! To ojlẹ Oflin tọn lọ mẹ, pipà susu wẹ yì na Jehovah, na wẹnlatọ livi susu lẹ wẹ basi gbehosọnalitọ alọgọtọ tọn to mars po avril po mẹ. Lehe enẹ dotuhomẹnamẹ do sọ! Podọ, be homẹ mìtọn ma hùn nado yọnẹn dọ mẹhe basi gbehosọnalitọ alọgọtọ tọn to dlapọn nugopọntọ lẹdo tọn whenu lẹ sọgan duvivi opli he e nọ basi hẹ gbehosọnalitọ whepoponu tọn lẹ tọn blebu, eyin dlapọn lọ ma tlẹ jẹ do osun mars kavi avril tọn mẹ ya? Mẹhe whèwhín to gbigbọ-liho lẹ nọ yí nukun nujọnu tọn do pọ́n mahẹ tintindo to lizọnyizọn lọ po tito agun tọn lẹ po mẹ. Alọnu mítọn hinhẹn ján to lizọnyizọn lọ mẹ nọ gọalọna mí nado hẹn tenọgligo masẹafọ, bo penugo nado glọnalina vivẹnudido Lẹgba tọn lẹ nado dekanpona yise mítọn bo de mí sọn alewezun lọ mẹ.—1 Kọl. 15:58.

Tulinamẹnu daho wẹ e yin nado mọdọ to owhe sinsẹ̀nzọn tọn he wayi mẹ, gbẹtọ 277 344 wẹ basi dohia klandowiwe yetọn tọn gbọn baptẹm osin tọn dali bo to zọnlinzin todin to aliho ogbẹ̀ tọn lọ ji to pọmẹ hẹ mẹmẹsunnu yetọn lẹ lẹdo aihọn pé! (Mat. 7:13, 14) Mẹyọyọ ehelẹ tindo nuhudo godonọnamẹ mítọn tọn nado sọgan yin “hinhẹn lodo to yise mẹ.” (Kọl. 2:7) Mì zindonukọn nado to tulina ode awetọ nado nọ doakọnnanu kakajẹ opodo. (Mat. 24:13) Mì “nọ dọho homẹmiọnnamẹ tọn na alindọn he jẹflumẹ lẹ, . . . gọalọna madogánnọ lẹ, bo nọ sinyẹnlin hẹ mẹlẹpo.” (1 Tẹs. 5:14) To popolẹpo mẹ, mì gbọ dopodopo mítọn ni “nọ hodẹ̀ to whepoponu,” dọmọ: “Na ahọluduta towe ni wá.”—1 Tẹs. 5:17; Mat. 6:10.

Mì deji dọ mí yiwanna dopodopo mìtọn podọ na mì mẹhe yiwanna Jehovah lẹpo!

Mẹmẹsunnu mìtọn lẹ,

Hagbẹ Anademẹtọ Kunnudetọ Jehovah tọn lẹ tọn