Hẹn Lizọnyizọn Towe Pọnte Dogọ—Dodonu Zizedai Na Gọyìpọn
Nuhewutu E Do Yin Nujọnu: To whenue mí mọ mẹhe do ojlo hia de, mí nọ jlo nado lẹkọyi e dè to whenue e na to whégbè na mí nido sọgan húsinna okún nugbo lọ tọn he mí do. (1 Kọl. 3:6) Ehe nọ biọ dọ whẹpo mí nado tọ́n sọn mẹlọ dè, mí ni yọ́n whenue mí sọgan lẹkọwa bo gbọnmọ dali ze dodonu dai na gọyìpọn de. Humọ, nudagbe wẹ e yin nado fọ́n kanbiọ de dote, ehe ji mí na dọhodo to whenue mí na lẹkọwa. Enẹ na zọ́n bọ whétọ lọ na to nukundo dlapọn mítọn, podọ eyin gblọndo kanbiọ lọ tọn tin to owe he mí ze na ẹn lọ mẹ, e na tindo ojlo nado hia ẹ. Dodonu zizedai na hodọdopọ devo nasọ hẹn ẹn bọawu na mí nado basi gọyìpọn na whétọ lọ, na mí ko de hosọ he ji mí na dọhodo, podọ whétọ lọ lọsu na donukun mí. To whenue mí lẹkọwa, mí sọgan dọna ẹn dọ mí wá nado na gblọndo kanbiọ he mí fọndote wayi lọ tọn podọ enẹgodo mí na zindonukọn.
Lehe Mí Sọgan Wàmọ Do:
• To whenue a to awuwlena nuhe a na dọ to lizọnyizọn whédegbè jẹ whédegbè tọn mẹ, sọ wleawuna kanbiọ de he a na na gblọndo etọn to dlapọn he na bọdego whenu. Kanbiọ lọ sọgan gando hosọ he tin to owe he a dogbonu to gbenẹgbe lọ mẹ de go, kavi e sọgan yin kanbiọ de he gblọndo etọn tin to nuplọnmẹwe mítọn de mẹ, ehe a sọgan zedonukọnna ẹn to whenue a lẹkọwa.
• To whenuea to tadona hodọdopọ hẹ mẹhe do ojlo hia de, dohia ẹ dọ a jlo nado dọho hẹ ẹ to whedevonu, podọ kàn kanbiọ he a wleawuna lọ sè e. To aigba-denamẹ delẹ ji, alọnu gbẹtọ lẹ tọn nọ ján sọmọ bọ yé nọ saba whleawu nado basi tito gọyìpọn tọn de hẹ mẹ. To ninọmẹ mọnkọ lẹ mẹ, a sọgan kanse dọmọ: “Be mì nọ saba nọ whégbè to ogàn ehe nkọ lẹ mẹ wẹ ya? [Jotẹnna gblọndo.] E na jlo mi nado gbọn fi to osẹ he ja nado na gblọndo na kanbiọ ehe. . .[dọ kanbiọ lọ]. Ṣigba, eyin alọnu mìtọn ján gbau to whenue n’lẹkọwa, mì sọgan dọna mi.”
• Eyin a dọna whétọ lọ dọ emi na lẹkọwa to ojlẹ tangan de mẹ, tẹnpọn bo wá to ojlẹ enẹ mẹ. (Mat. 5:37) To vivọnu gọyìpọn lọ tọn, ze dodonu dai na dlapọn he na bọdego.
Tẹ́n Ehe Pọ́n to Osun lọ Mẹ:
• To whenue a to awuwlena nuzedonukọnnamẹ towe, sọ wleawuna kanbiọ de he a na na gblọndo etọn to whedevonu. Dọhodo kanbiọ lọ ji hẹ wẹnlatọ he a to azọ́nwa hẹ lẹ.