Anadidena Plọnmẹ Biblu Kọdetọn Dagbenọ Lẹ

1. Azọngban tẹwẹ wẹnlatọ he nọ deanana plọnmẹ Biblu lẹ tindo?

¹ Mẹdepope ma sọgan sẹ̀n Jehovah Jiwheyẹwhe, adavo Ewọ “dọ̀n ẹn.” (Joh. 6:44) Etomọṣo, wẹnlatọ he nọ deanana plọnmẹ Biblu lẹ dona hẹn azọngban yetọn di, enẹ wẹ nado gọalọna mẹhe yé to nuplọn hẹ lẹ nado dọnsẹpọ Otọ́ olọn mẹ tọn yetọn. (Jak. 4:8) Ehe nọ biọ awuwiwle. Nado hia hukan dopodopo bo kàn kanbiọ he to owe lọ mẹ sè poun ma ko pé nado gọalọna nuplọntọ mítọn lẹ na yé nido mọnukunnujẹ owẹ̀n lọ mẹ bo yinukọn to gbigbọ-liho.

2. Etẹwẹ wẹnlatọ lẹ dona wà nado deanana plọnmẹ Biblu kọdetọn dagbenọ lẹ?

² Nado deanana plọnmẹ Biblu kọdetọn dagbenọ lẹ, wẹnlatọ lẹ dona gọalọna nuplọntọ yetọn lẹ nado (1) mọnukunnujẹ nuhe Biblu plọnmẹ lẹ mẹ, (2) kẹalọyi nuhe Biblu plọnmẹ lẹ, bosọ (3) yí nuhe Biblu plọnmẹ lẹ do yizan mẹ. (Joh. 3:16; 17:3; Jak. 2:26) Osun susu sọgan juwayi whẹpo nuplọntọ de nido jẹ yanwle voovo ehelẹ kọ̀n. Ṣigba, dile nuplọntọ lọ na to yanwle voovo ehelẹ kọ̀n jẹ, mọ wẹ e na to awuwlena haṣinṣan dagbe de hẹ Jehovah do bo na wá klan ede do wiwe na ẹn.

3. Naegbọn mẹplọntọ kọdetọn dagbenọ lẹ nọ kàn kanbiọ sè nado yọ́n nuhe nuplọntọ lọ lẹn?

³ Etẹwẹ Nuplọntọ lọ Lẹn?: Nado yọnẹn eyin nuplọntọ lọ to nukunnumọjẹ nuhe plọn e te lẹ mẹ bosọ kẹalọyi nuplọnmẹ lọ lẹ, ma nọ dọho zẹjlẹgo blo. Kakatimọ, nọ na tuli nuplọntọ lọ nado dọ nuhe e lẹn. (Jak. 1:19) Be e mọnukunnujẹ nuhe Biblu dọ do hosọ he mì to dogbapọnna lọ ji mẹ ya? Be e sọgan basi zẹẹmẹ hosọ lọ tọn to hogbe etọn titi lẹ mẹ ya? Etẹwẹ e lẹn gando nuhe plọn e te lẹ go? Be e yise dọ nuplọnmẹ Biblu tọn lẹ sọgbe hẹ lẹnpọn dagbe ya? (1 Tẹs. 2:13) Be e mọnukunnujẹemẹ dọ nuhe emi to pinplọn lẹ dona yinuwado aliho he mẹ emi nọ zan gbẹzan emitọn te ji ya? (Kọl. 3:10) Nado mọ gblọndo kanbiọ enẹlẹ tọn, mí dona nọ yí zinzin do kàn kanbiọ sè nuplọntọ lọ nado yọ́n linlẹn etọn, podọ to enẹgodo mí dona dotoaina ẹn.—Mat. 16:13-16.

4. Eyin e vẹawuna nuplọntọ de nado mọnukunnujẹ nuhe e to pinplọn mẹ kavi nado yí nuhe plọn e te to Biblu mẹ do yizan mẹ, etẹwẹ mí dona wà?

⁴ To paa mẹ, pọndohlan po aṣa ylankan lẹ po nọ tindo huhlọn do gbẹtọ lẹ ji sọmọ bọ e nọ biọ whenu to yé si nado jodo. (2 Kọl. 10:5) Ṣigba, etẹwẹ mí dona wà eyin nuplọntọ mítọn ma kẹalọyi nuhe plọn e te kavi ma nọ yí i do yizan mẹ? Mí dona fahomẹ bo jo whenu he pé do na nuplọntọ lọ na Ohó Jiwheyẹwhe tọn po gbigbọ wiwe etọn po nido yinuwado ahun nuplọntọ lọ tọn ji. (1 Kọl. 3:6, 7; Heb. 4:12) Eyin e vẹawuna nuplọntọ lọ nado mọnukunnujẹ nuhe e to pinplọn mẹ kavi nado yí nuplọnmẹ Biblu tọn de do yizan mẹ, e nọ saba yọ́n hugan nado yì hosọ devo ji kakati nado to kọgbidina nuplọntọ lọ. Eyin mí zindonukọn nado to homẹfa po owanyi po dohia nuplọntọ lọ dile mí to Biblu plọn hẹ ẹ, e sọgan wá yin whinwhàn nado basi vọjlado he jẹ lẹ.