Linlin Kunnudegbe Tọn Lẹ

To République centrafricaine, gbẹtọ 16 350 wẹ wá Oflin he yin bibasi to avril he wayi, yèdọ agayiyi ayidego tọn de. Enẹ dohia dọ gbẹtọ 3 614 wẹ jẹ e ji yijlẹdo owhe he wayi go. To Tchad lọsu, gbẹtọ 4 582 wẹ wá hùnwhẹ Oflin tọn, yèdọ sọha he nkọ otò lọ ma ko tindo pọ́n. Na nuhe dù Whèyihọ-Waji Aflika tọn, wẹnlatọ 132 he to Guinée-Bissau lẹ deanana plọnmẹ Biblu 549 to mars 2015. Ehe dohia dọ wẹnlatọ dopo deanana plọnmẹ Biblu 4 linlán. Mẹmẹsunnu po mẹmẹyọnnu po 58 wẹ basi gbehosọnalitọ. To osun dopolọ mẹ, Mali po Sénégal po tindo agayiyi daho hugan to owe, alọnuwe apòmẹ tọn, po linlinnamẹwe lẹ po didogbonu mẹ. Yé sọ tindo agayiyi yọyọ lẹ to gọyìpọn po plọnmẹ Biblu lẹ po mẹ. Pinpẹn-nutọn-yinyọnẹn nankọ die mẹmẹsunnu mítọn lẹ dohia na awuwledainanu ofligọ lọ tọn to ojlẹ Oflin tọn mẹ! —2 Kọl. 5:14.