Hẹn Lizọnyizọn Towe Pọnte Dogọ—Azọ́npinplọn Biblu Plọntọ Towe Nado Wleawuna Aṣa Nupinplọn Tọn Dagbe

Nuhewutu E Do Yin Nujọnu: Na Biblu plọntọ lẹ nido penugo bo jẹ whinwhẹ́n gbigbọmẹ tọn kọ̀n, nupinplọn yetọn ma dona nọte do nuplọnmẹ dodonu tọn Ohó Jiwheyẹwhe tọn lẹ kẹdẹ ji. (Heb. 5:12–6:1) Nupinplọn nọ biọ vivẹnudido. Whenue mí to nuplọn, mí dona nọ yí onú yọyọ he mí to pinplọn lẹ jlẹdo nuhe mí ko yọnẹn dai lẹ go bo mọ lehe yé yọ́n-na-yizan do. (Howh. 2:1-6) Eyin nuplọntọ lẹ nọ dovivẹnu nado basi dodinnanu mẹdetiti tọn, enẹ na hẹn yé penugo nado nọ yí owe mítọn lẹ zan nado na gblọndo na kanbiọ he sinai do Biblu ji lẹ. Vivẹnu vẹkuvẹku he yé do nado yí nuhe yé plọn lẹ do yizan mẹ na hẹn yé penugo nado duto whlepọn he yé na pehẹ taidi Klistiani lẹ ji.—Luku 6:47, 48.

Lehe Mí Sọgan Wàmọ Do:

Dohia nuplọntọ towe hezeheze dọ nujọnu wẹ e yin nado nọ dín alọgọ Jiwheyẹwhe tọn to odẹ̀ mẹ jẹnukọnna nupinplọn dopodopo.—Joh. 14:26; 1 Kọl. 2:10.
Na tuli nuplọntọ towe to bẹjẹeji nado nọ wleawuna oplọn etọn. Do owe towe hia ẹ, bo plọn ẹn lehe e sọgan nọ zẹhudo glọ na hogbe tangan lẹ kavi dohiagona yé do.
Dọna nuplọntọ towe dọ ni nọ na gblọndo to hogbe etọn titi lẹ mẹ. A dike nupinplọn lọ lẹzun tito kanbiọ po gblọndo po tọn mọmọ tọn de poun, bọ nuplọntọ lọ na nọ hia gblọndo lẹ sọn owe lọ mẹ tlọlọ blo.
Na tuli nuplọntọ towe nado nọ hia adà de sọn Ohó Jiwheyẹwhe tọn mẹ egbesọegbesọ. Do tito-to-whinnu Biblu hihia tọn he tin to jw.org ji lọ hia ẹ. Tito ehe do aliho yọ́n-na-yizan he mẹ e sọgan wàmọ te hia. Awuwiwlena aṣa lọ nado nọ hia Biblu egbesọegbesọ nọ biọ gbemima, ṣigba ale tin to e mẹ.—Ps. 1:2, 3.
Dohia nuplọntọ towe lehe e sọgan yí Watchtower Library kavi WESẸDOTẸN INTẸNẸT JI TỌN Watchtower tọn zan nado mọ gblọndo na kanbiọ sinai do Biblu ji lẹ do. Ohia delẹ nọ yin yiyizan nado dlẹnalọdo owe he mí nọ yizan to opli mítọn lẹ ji. Gọalọna ẹn nado yọ́n owe he ohia lọ lẹ nọ dlẹnalọdo.

Tẹ́n Ehe Pọ́n to Osun lọ Mẹ:

To whenue mì ko gbadopọnna hukan he to hóvila kavi weta de glọ lẹ godo, nọ biọ to plọnmẹ Biblu towe si nado basi bladopọ nuhe e ṣẹṣẹ plọn lẹ tọn to hogbe kleun delẹ mẹ. Eyin a ma nọ plọnnu hẹ mẹde, basi bladopọ adà Biblu tọn de tọn kavi hukan he tin to Atọ̀họ̀-Nuhihọ́ lọ Tọn mẹ de tọn to hogbe kleun delẹ mẹ nado sọgan hẹn nukunnumọjẹnumẹ towe pọnte dogọ gando nuhe a hia go.