Dagbe po Oylan po: Whẹho de He Mímẹpo Nọ Pannukọn
Eyin a jlo na zingbejizọnlin sọyi fie a ma ko yì pọ́n de, etẹ a na wà?
1. Ze ali he a lẹndọ emi dona gbọn.
2. Hodo mẹdevo lẹ, po linlẹn lọ po dọ yé yọ́n ali lọ.
3. Yí alidohiamẹnu Intẹnẹt ji tọn (GPS) zan, kavi kanhose họntọn dejidego de he yọ́n ali lọ.
Eyin mí de yọnbasi tintan kavi awetọ lọ, mí na jẹ fide janwẹ, amọ́ e gán nọma yin fie mí jlo na yì lọ. Amọ́, eyin mí de yọnbasi atọ̀ntọ lọ, mí gán kudeji dọ mí na jẹ fie mí jei.
Gbẹzan mítọn taidi gbejizọnlin de, ehe mí do todido dọ e gán plan mí yì sọgodo ayajẹnọ de mẹ. Eyin vlavo mí na jẹ dọ́n kavi lala, e na sinai taun do fie mí nọ dín anademẹ te lẹ ji whenue mí jlo na basi nudide lẹ.
Dile etlẹ yindọ suhugan nudide he mí basi lẹ tọn ma na do kọdetọn he dẹn-to-aimẹ sọmọ lẹ do gbẹzan mítọn ji, delẹ gán yinuwado mí ji taun. Yé nọ do nujinọtedo walọ dagbe tọn mítọn lẹ hia—enẹ wẹ pọndohlan mítọn gando dagbe po oylan po go. Nudide mọnkọ lẹ na yinuwado mílọsu po mẹhe mí yiwanna lẹ po ji na ojlẹ dindẹn, vlavo to aliho dagbe kavi ylankan mẹ. Nudide ehelẹ nọ gando whẹho delẹ go taidi:
Zanhẹmẹ po alọwle po
Nugbodidọ, azọ́n po akuẹ po
Lehe mí gán plọn ovi lẹ whẹ́n do
Lehe mí nọ yinuwa hẹ mẹdevo lẹ do
Nawẹ a gán kudeji gbọn dọ nudide he a nọ basi to whẹho ehelẹ mẹ na dekọtọn do sọgodo ayajẹnọ de mẹ na hiẹ po whẹndo towe po?
Kanbiọ he dopodopo mítọn lẹ nọ pannukọn wẹ yindọ: Etẹwẹ na deanana nudide he n’nọ basi to whẹho walọ dagbe tọn mẹ lẹ?
Linlinwe ehe na basi zẹẹmẹ nuhewutu a gán dejido nuhe Biblu nọ dọ do dagbe po oylan po go ji, gọna lehe Biblu gán gọalọna we do.