Hẹn Mẹwhinwhàn Towe Sinyẹn Deji
“Dopo to onú titengbe hugan he nọ zọ́n bọ azọ̀-nùtọ lẹ nọ penugo nado jo aṣa enẹ do lẹ mẹ wẹ nado yí gbemima do tẹdo afọdide he mọwiwà nọ biọ lẹ go.”—Owe lọ “Stop Smoking Now!”
DO GLIDO, eyin a jlo na jo azọ̀-nùnù do, e whè gbau a dona wleawuna mẹwhinwhàn nujọnu tọn nado wamọ. Nawẹ a sọgan hẹn mẹwhinwhàn towe sinyẹn deji gbọn? Jẹnukọn whẹ́, lẹnnupọndo ale susu he e na hẹnwa na we lẹ ji.
A ma na nọ hẹn akuẹ gú ba. Aṣa lọ nado nọ nù siga pali dopo to gbèdopo gán zọ́n bọ a na nọ zan dọla amẹlika tọn fọtọ́n susu to whẹmẹwhẹmẹ. “N’ma gán yise pọ́n dọ n’ko và akuẹ susu sọmọ do taba mẹ.” Gyanu, sọn Népal.
A na do ayajẹ dogọ to gbẹ̀mẹ. Yọnnu de he nọ yin Regina bo wá sọn Afrique du Sud dọmọ: “Gbẹzan ṣie jẹ yinyọ́n ji, whenue n’doalọtena azọ̀-nùnù, podọ e sọ fọ́n bo to tepọn deji.” To whenue mẹlẹ doalọtena azọ̀-nùnù, nugopipe yetọn nado nọ yọ́n otọ́n podọ nado sewán nọ pọnte taun dogọ, podọ yé nọ saba do huhlọn bọ awusọhia yetọn sọ nọ dọnmẹdogo.
A gán do agbasalilo dagbe. ”Sunnu po yọnnu po he jo azọ̀-nùnù do lẹpo wẹ nọ wá tindo agbasalilo dagbe to ojlẹ kleun de poun godo, mahopọnna owhe yetọn.”—Centre américain d’épidémiologie.
A na nọ dejido dewe go dogọ. “N’doalọtena azọ̀-nùnù na n’ma jlo dọ taba ni nọ deanana mi wutu. Ojlo ṣie wẹ nado deanana agbasa ṣie.” Henning, sọn Danemark.
E na hẹn ale wá na whẹndo po họntọn towe lẹ po. Azọ̀-nùnù . . . nọ hẹnnugble to mẹhe lẹdo we lẹ go. . . Dodinnanu lẹ dohia dọ siga sin azọ̀ nọ hù gbẹtọ fọtọ́n susu to whemẹwhemẹ na kansẹẹ afuje tọn po ahunzọ̀n po wutu.—Société américaine du cancer.
A na hẹn homẹhun Mẹdatọ towe. ”Mẹyiwanna lẹ emi . . . mì gbọ mí ni klọ́ míde wé sọn hẹnflu agbasalan tọn . . . lẹpo mẹ.” (2 Kọlintinu lẹ 7:1) ‘Agbasa mìtọn ni yin wiwe, bo yin alọkẹyi na Jiwheyẹwhe.’—Lomunu lẹ 12:1.
Yọnnu de he nọ yin Sylvia bo wá sọn Espagne dọmọ: “N’bayi nudide nado doalọtena azọ̀-nùnù tlolo he n’plọn dọ Jiwheyẹwhe gbẹwanna nuhe nọ hẹn agbasa flu lẹ.”
To paa mẹ, gbemima kẹdẹ ma ko pé. Mí gán biọ alọgọ mẹdevo lẹ tọn ga, taidi alọgọ whẹndo podọ họntọn mítọn lẹ tọn. Nawẹ yé gán gọalọna mí gbọn?