1. Be Jiwheyẹwhe Wẹ Mí Na Dowhẹ Ya?

Nuhewutu Mí Dona Yọ́n Gblọndo Lọ

Mẹsusu wẹ ma nọ jlo na sẹ̀n Jiwheyẹwhe, na yé nọ dọ dọ uwọ wẹ zọ́n bọ mí to yaji.

Lẹnnupọndo Ehe Ji

Sinsẹ̀n susu wẹ nọ plọnmẹ dọ Jiwheyẹwhe wẹ zọ́n bọ mí to yaji. Di apajlẹ, delẹ to yé mẹ nọ dọ dọ:

• Eyin otọ̀ gbàmẹ kavi owhé mẹde tọn jizò, be Jiwheyẹwhe wẹ to yasana mẹlọ.

• Mawu wẹ na, Mawu wẹ sọ yí; to whenue yọpọvu de kú.

• Jiwheyẹwhe nọ nọgodona awhànfunfun, bọ ehe nọ hẹn awufiẹsa susu wá.

Amọ́, lalodo wẹ sinsẹ̀ngán enẹlẹ te dokọna Jiwheyẹwhe. Podọ nuhe wà yé te nọ vẹna ẹn.

Nuhe Biblu Dọ

E ma yin Jiwheyẹwhe wẹ zọ́n bọ mí to yaji.

Biblu dohia dọ nudagbe kẹdẹ wẹ Jiwheyẹwhe nọ wà. Di apajlẹ, e dọ dọ:

“Aliho [Jiwheyẹwhe] tọn lẹpo wẹ nọ do whẹdida dodo hia. . . . Dodonọ podọ nugbonọ wẹ ewọ.”—DEUTELONOMI 32:4.

“E dẹn do Jiwheyẹwhe nugbo lọ nado yinuwa po kanyinylan po, yèdọ Ganhunupotọ lọ nado waylan!”—JOBU 34:10.

“Ganhunupotọ lọ ma nọ gada whẹdida.”—JOBU 34:12.

Homẹ Jiwheyẹwhe tọn ma nọ hùn do sinsẹ̀n he nọ dolalo dokọna ẹn lẹ go.

E ma nọ kẹalọyi sinsẹ̀n he nọ plọnmẹ dọ uwọ wẹ zọ́n bọ mí to yaji lẹ gọna sinsẹ̀n he nọ doalọ to awhàn po danuwiwa po mẹ lẹ.

“Yẹwhegán lẹ to dọdai lalo tọn dọ to oyín ṣie mẹ [enẹ wẹ Jiwheyẹwhe tọn]. Yẹn ma do yé hlan kavi degbena yé kavi dọhona yé gba. Numimọ lalo tọn . . . po yẹdoklọmẹ ahun yetọn titi mẹ tọn lẹ po wẹ nuhe yé to dọdai etọn dọ hlan mì lẹ.”—JELEMIA 14:14.

Jesu jẹagọdo yẹnuwiwa sinsẹ̀n tọn.

“E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ Ahọluduta olọn tọn mẹ gba, adavo ewọ he to ojlo Otọ́ ṣie he tin to olọn mẹ tọn wà kẹdẹ. Mẹsusu wẹ na dọna mi to azán enẹ gbè dọ: ‘Oklunọ, Oklunọ, be míwlẹ ma ko dọ dọdai to oyín towe mẹ bo ko yàn aovi lẹ jẹgbonu to oyín towe mẹ bo ko sọ wà azọ́n huhlọnnọ susu lẹ to oyín towe mẹ ya?’ Whenẹnu wẹ yẹn na dọna yé dọ: ‘Yẹn ma yọ́n mì gbede! Mì tọ́n sọn dè e, mì mẹhe nọ wazọ́n sẹ́nhẹngba tọn lẹ!’”—MATIU 7:21-23.