Alokan Kavi Nuyizan Mọnkọ Lẹ Gán Bẹpla Lehe A Nọ Plọnnu Do
Gbẹtọ lẹ nọ fọ́n bo nọ to nuyọyọ lẹ plọn. Eyin e ma yin na wehọmẹ, e na yin na azọ́n kavi na nudevo lẹ wutu. Alokan kavi nuyizan mọnkọtọn he sù taun to ojlẹ mítọn mẹ lẹ zọ́n bọ mí gán mọ nususu plọn eyin mí tlẹ to aisinsin to whégbè.
Amọ́, susu mẹhe nọ to ofẹ̀n whè do nuyizan mọnkọ lẹ mẹ tọn wẹ dọ dọ . . .
emi ma gán nọ ze ayiha do nuhe hia emi te ji.
emi ma gán nọ ze ayiha do onú dopo ji.
emi nọ yawu mọ apọ̀ eyin emi to emide ṣo.
NUHE A DONA YỌNẸN
WEHIHIA
Mẹhe nọ gbọ do Intẹnẹt ji lẹ ma nọ whesọ bo nọ hia hosọ de yì-ta, enẹwutu yé nọ yìnnukun gbọn e ji nado yọ́n nuhe e bẹhẹn.
Nugbo wẹ dọ to whedelẹnu, mí gán nọ yìnnukun gbọn nude ji eyin mí to gblọndo kanbiọ de tọn dín poun. Amọ́, mọwiwà ma gán zọ́n bọ mí na mọnukunnujẹ hosọ de mẹ ganji.
LẸNNUPỌNDO EHE JI: Be e nọ bọawuna we nado hia nuhe dite lẹ ya? Nawẹ agbọ́ji yìyì do hianu gán gọalọna we nado nọ mọ nude plọn gbọn?—HOWHINWHẸN LẸ 18:15.
AYIHA ZIZEDO FIDOPO
Mẹdelẹ dọ dọ nuyizan enẹlẹ nọ zọ́n bọ emi gán wà nususu dopọ. Emi gán to nukan hlan họntọn lẹ bosọ to nuplọn. Amọ́, e nọ vẹawu dọ yé ni nọ wazọ́n mimẹ́ eyin yé to nususu wà dopọ, titengbe eyin nulọ lẹpo biọ ayiha zizedo fidopo.
E nọ biọ dọ mí ni wazọ́n do míde go nado ze ayiha do fidopo, amọ́ e nọ wà dagbe na mí. Jọja de he nọ yin Grace dọ dọ: “A ma na nọ yawu ṣì nulẹ bayi bo ma nasọ nọ mọ apọ̀ sọmọ. N’mọdọ e pọnte nado nọ ze ayiha do onú dopo ji kakati nado bayi nususu dopọ.”
LẸNNUPỌNDO EHE JI: Be alokan po nuyizan mọnkọ lẹ po nọ zọ́n bọ e nọ vẹawuna we nado ze ayiha do fidopo bo flin nuhe a plọn lẹ ya? —HOWHINWHẸN LẸ 17:24.
ṢOKẸDẸNINỌ
Mẹdelẹ ma nọ voawu eyin yelẹ kẹdẹ to fide bọ filọ to tóo. Enẹwutu, yé nọ gbọ bo nọ jẹ ofẹ̀n whè do alokan kavi nuyizan mọnkọ lẹ mẹ ji. Nawe de he nọ yin Olivia dọ dọ “N’ma gán gọ̀n ofẹ̀n ma whè do alokan kavi tablẹti mẹ kavi gọ̀n tele ma tá eyin n’to whii na nukunwhiwhe 15.”
Amọ́, whenue mílẹ ṣo to fide, dotẹnmẹ dagbe de wẹ e nọ yin nado lẹnnupọn. Nulinlẹnpọn ka nọ gọalọ nado plọnnu, vlavo mí yin jọja kavi mẹho.
LẸNNUPỌNDO EHE JI: Whenue a to dewe ṣo, be a nọ yí ojlẹ lọ zan nado lẹnnupọn ya?—1 TIMOTI 4:15.
NUHE A GÁN WÀ
LEHE A NỌ YÍ ALOKAN ZAN DO
Nawẹ a gán yí alokan kavi nuyizan mọnkọ lẹ zan do plọnnu gbọn? Nawẹ yé gán hẹn ẹn vẹawuna we nado ze ayiha do fidopo bo plọnnu gbọn?
AYINAMẸ BIBLU TỌN: “Whlá nuyọnẹn yọ́n-na-yizan po nugopipe nulẹnpọn tọn po.”—HOWHINWHẸN LẸ 3:21.