Lehe A Gán Mọ Gblọndo lọ Do
“Nutata de poun mẹ wẹ ogbẹ̀ lọ gán dá ede sọn, podọ mọ wẹ e yì do.”—Weyọnẹntọ Stephen Hawking po Leonard Mlodinow po to 2010.
“Jiwheyẹwhe dá olọn lẹ po aigba po.”—Jenẹsisi 1:1, Biblu.
Be Jiwheyẹwhe wẹ dá wẹkẹ lọ po nue to e mẹ lẹ po ya kavi yé wá aimẹ domọ poun? Gblọndo voovo wẹ weyọnẹntọ awe he mí dọho yetọn to aga lẹ po wefọ tintan Biblu tọn po na na kanbiọ ehe. Mẹdelẹ kudeji dọ nugbo wẹ weyọnẹntọ lọ lẹ dọ, bọ mẹdevo lẹ kudeji dọ nugbo wẹ Biblu dọ. Mẹsusu devo lẹ ka sọ tin bo do ayihaawe. Ehe ko fọ́n nudindọn dote to mẹhe kàn owe he disa hugan lẹ ṣẹnṣẹn podọ to televiziọn ji.
To wehọmẹ, mẹplọntọ towe lẹ gán ko plọn we dọ mẹde ma dá wẹkẹ lọ po nue to e mẹ lẹ po, dọ yé wá aimẹ na yede wẹ. Be yé ko na we kunnudenu lẹ he dohia dọ Mẹdatọ de ma tin ya? Kavi e gán sọ yindọ a nọ sè bọ sinsẹ̀ngán lẹ nọ dọ dọ Mẹdatọ de tin. Amọ́, be yé ko na we kunnudenu he do enẹ hia lẹ ya? Kavi yé dọna we dọ Mawu tin, dọ a ni saa yí domọ poun bo johodo wẹ ya?
Vlavo a na ko nọ lẹnnupọn bo nọ lẹndọ mẹde ma gán dọ eyin Mẹdatọ de tin kavi e ma tin. Kavi vlavo a nọ kanse dewe dọ: Be e ka biọ dọ n’ma yọ́n nugbo whẹho ehe tọn ya?
To linlinwe ehe mẹ, mí na dọhodo kunnudenu delẹ ji he ko hẹn mẹsusu kudeji dọ Mẹdatọ de tin. Enẹgodo, mí na mọ dagbe he e na wà na mí eyin mí yọ́n lehe ogbẹ̀ wá aimẹ do.