Nuhewutu A Dona Yọnẹn Eyin Mẹdatọ de Tin

Onú titengbe wẹ e yin nado yọnẹn eyin Mẹdatọ de tin kavi e ma tin. Etẹwutu? Eyin a kudeji dọ Jiwheyẹwhe ganhunupotọ de tin nugbo, vlavo a na jlo nado dín kunnudenu he dohia dọ ewọ wẹ dowatọ Biblu tọn. Podọ eyin a dejido Biblu go, be a gán duale etọn to adà ehelẹ mẹ.

A na do ayajẹ dogọ to gbẹ̀mẹ

BIBLU DỌMỌ: ‘Jiwheyẹwhe wà dagbe, bo nọ na mì jikun sọn olọn podọ ojlẹ sinsẹ́n susugege lẹ tọn bosọ nọ yí núdùdù do pekọna mì bo nọ yí ayajẹ do gọ́ ahun mìtọn.’—Owalọ lẹ 14:17.

NUHE E ZẸẸMẸDO: Jiwheyẹwhe wẹ dá nudagbe he a to vivi etọn dù to ogbẹ̀ lọ mẹ lẹpo. A na nọ dopẹ́ dogọ eyin a wá mọnukunnujẹemẹ dọ owanyi he Jiwheyẹwhe do na we wẹ zọ́n bọ ewọ do na we onú enẹlẹ.

A gán mọ ayinamẹ dagbe lẹ nado zan ogbẹ̀ towe

BIBLU DỌMỌ: “Hiẹ na mọnukunnujẹ nuhe dodowiwa, whẹdida dodo po nuhe sọgbe po zẹẹmẹdo mẹ, yèdọ zẹẹmẹ gigọ́ nudagbe lẹpo tọn.”—Howhinwhẹn lẹ 2:9.

NUHE E ZẸẸMẸDO: Jiwheyẹwhe wẹ dá we bo yọ́n nuhe sin hudo a do nado do ayajẹ. Biblu hihia na gọalọna we nado yọ́n lehe a na zan ogbẹ̀ towe do.

A na mọ gblọndo na kanbiọ he nọ duahunmẹna we lẹ

BIBLU DỌMỌ: ‘A na mọ oyọnẹn Jiwheyẹwhe tọn.’—Howhinwhẹn lẹ 2:5.

NUHE E ZẸẸMẸDO: Eyin a mọnukunnujẹemẹ dọ Mẹdatọ de tin nugbo, e na bọawuna we nado mọ gblọndo na kanbiọ titengbe taidi ehelẹ: Naegbọn mí do to ogbẹ̀ lọ mẹ? Naegbọn yajiji do sù sọmọ? Etẹwẹ nọ jọ to okú godo? Gblọndo Biblu tọn lẹ gán gọalọna we susu.

A na nọ pọ́n sọgodo hlan po ayajẹ po

BIBLU DỌMỌ: “‘Yẹn yọ́n nuhe lẹn n’te gando mì go lẹ ganji,’ wẹ Jehovah dọ, ‘yèdọ linlẹn jijọho tọn lẹ bọ e ma yin nugbajẹmẹji tọn lẹ, na mìwlẹ nido tindo sọgodo dagbe de po todido de po.’”—Jelemia 29:11.

NUHE E ZẸẸMẸDO: Jiwheyẹwhe dopà dọ zande din, emi na de kanyinylan, yajiji po okú lọsu po sẹ̀. Jidide do ohó Jiwheyẹwhe tọn enẹlẹ go na gọalọna we nado nọ doakọnna nuhahun gbẹ̀mẹ tọn lẹ.

Ale he yise to Mẹdatọ lọ mẹ hẹnwa na medelẹ

“Lehe Jiwheyẹwhe nọ gọalọna mí to ninọmẹ gbẹ̀mẹ tọn voovo lẹ mẹ do gbẹ́ nọ jiawu na mi. Di apajlẹ, ewọ nọ gọalọna mí nado yọ́n nuhe yin nujọnu to gbẹ̀mẹ lẹ, lehe mí gán nọ didẹ whẹgbè lẹ do, etlẹ yin nuhe mí na wà do yin họntọn etọn lẹ.”—Cyndi, États-Unis.

“Yise he n’do to Mẹdatọ lọ mẹ zọ́n bọ n’do ayajẹ taun to gbẹ̀mẹ. Nuhe n’gán plọn gando Mẹdatọ lọ, nuhe e dá lẹ po Biblu po go ma do dogbó. Ehe zọ́n bọ ayiha ṣie mẹ vò.”—Elise, France.

“Tonusisena nuhe Mẹdatọ lọ dọ to Biblu mẹ lẹ zọ́n bọ n’do ayajẹ dogọ. N’ma nọ to homọdọdonugo mapote ba, n’jọmẹ dogọ bo do ayajẹ taun. N’lẹzun otọ́ dagbe.”—Peter, Pays-Bas.

“Dai, n’ma pò na nude hú núdùdù, amlọn po lehe n’na bayi do bo do jẹ azọ́nmẹ do mẹwhenu po. N’ma do ayajẹ! Amọ́ todin, nukun vò wẹ n’do nọ pọ́n nulẹ, na n’yọnẹn dọ ogbẹ̀ yin onú vivẹ́ he yè dona duvivi etọn bo wlebòna.”—Liz, Estonie.

“Dai, n’nọ hanú taun. Amọ́, n’masọ nọ lẹnnupọn glanglan ba, na n’yọnẹn dọ kanyinylan, nuyiwahẹmẹ agọ̀ po yajiji po ma na nọ aimẹ sọyi.”—Adrien, France.