Weta 13
Nukun Tẹwẹ Hiẹ Do Nọ Pọn Mẹplọnlọ?
1-4. (a) Etẹwutu mímẹpo nọ tindo didẹhlan nuṣiwa lẹ bibasi? (b) Gbọnvona whèdomẹ oyọnẹn tọn, onu devo tẹwẹ nọ fọn nuṣiwa lẹ dote?
VLAVO hiẹ yọn mẹde—e sọgan yin hagbẹ́ wehọmevi de kavi e tlẹ sọgan yin mẹplọntọ de—he ma nọ yigbe na nuṣiwa de kavi kẹalọyi dọ emi jẹagọ. Etẹwẹ yin numọtolanmẹ towe dogbọn omẹ mọnkọtọn dali? Eyin e wájọ to gbedopo bọ ewọ wá tọlọlọ bo dọmọ, “Jaale; yẹn yọnẹn dọ yẹn jẹagọ,” be linlẹn towe gando e go na diọ yìaga kavi yìdo wẹ ya?
2 Na nugbo tọn, mímẹpo wẹ nọ basi nuṣiwa lẹ, be e ma yin mọwẹ? Depope to mí mẹ ma yin pipe kavi tin matindo nuwayìndo gba. Biblu lọ wẹ dọ enẹ na mí. E dohia dọ, na tolivivẹ mẹjitọ mítọn tintan Adam tọn wutu, mẹlẹpo yin jìjì po ogududu mape tọn de po, yedọ ylando. Biblu basi zẹẹmẹ dọ “ylando gbọn omẹ dopo [Adam] de biọ aihọn mẹ, podọ oku gbọn ylando dali; mọwẹ gbẹtọ lẹpo ku do, na omẹ popo wẹ wàylan wutu.”—Lomunu lẹ 5:12.
3 Nuṣiwa delẹ nọ wá sọn ‘ma yọnẹn’ mẹ poun. Ṣigba e ma yin yemẹpo gba. Nuṣiwa susu lẹ nọ wá na numakiyana wutu. Di dohia, ahisinọ tomẹyitọ de to agahun mẹ sọgan nọ ma tindo ayidonugo to whenue yọnnu mẹgopọntọ lọ to zẹẹmẹ basi na yizan awu ogbẹ̀-whlẹ́n tọn lọ kavi jẹhọnnanu ohún lọ tọn tọn. Eyin, taidi kọdetọn de, ahisinọ tomẹyitọ lọ gboawupo nado basi yizan onu wleawudaina ehelẹ tọn to nujijọ ajiji de mẹ bo hẹn ogbẹ̀ etọn bú, e ma na yin dọ e ma ko yọnẹn poun wutu gba. Ṣigba, ewọ ma kiya nado yọnẹn.
4 Enẹwutu e ma yin oylan lẹpo wẹ sọgan yin kinkandai taidi nuwayìndo de poun gba. Kọgbigbẹnugo sọn ojlo mẹ wá nọ saba zọ́n. Ehe ylan hugan lọ wẹ yindọ, gbẹtọ de sọgan wà nuhe e yọnẹn dọ e ylan—bo na wa to whẹyido ede ji na whẹwhinwhẹn de kavi na devo.
5, 6. (a) Etẹwutu mẹjlọdote do yin alenu na jọja po mẹho po? (b) Etẹwẹ yin nuyanwle mẹplọnlọ tọn lọ? (Howhinwhẹn lẹ 1:1-4)
5 Ehe lẹpo do nuhudo na mẹplọnlọ hia, he nọ biọ mẹjijlọdo ali ji. Mímẹpo tindo nuhudo mẹjijlọdote tọn, vlavo eyin mí yin jọja wẹo kavi mẹho. Na nugbo tọn, eyin mẹplọnlọ de kavi mẹjlọdote de ma ko tin, nukọnyiyi depope ma sọgan tin to ada gbẹninọ gbẹtọ tọn depope mẹ gba. Gbẹtọ lẹ na gbẹ́ po to nuṣiwa dopolọ lẹ wà janwẹ, bo na to linlẹn agọ dopolọ lẹ yise, bo ma na yinukọn gbede to oyọnẹn me kavi to nugopipe mẹ.
6 Ṣigba be hiẹ ko yọnẹn dọ mẹplọnlọ tindo zẹẹmẹ hugan mẹjijlọdote poun ya? E sọ sọgan yin mẹpinplọn he nọ vọ́ omẹ jlado, namẹ huhlọn, kavi hẹnmẹ yọnnuin deji. Mẹplọnlọ nọ yin nina ganji po pọndohlan nado jlọmẹ dote tọn po mẹhẹnpọnte po na sọgodo.
NAEGBỌN E DO SINYẸN NADO KẸALỌYI
7-9. (a) Etẹwutu mẹplọnlọ nọ saba vẹawu nado kẹalọyi? (b) Nawẹ yè sọgan dù to ehe ji gbọn?
7 Ṣigba eyin mẹplọnlọ yin alenu sọmọ, naegbọn wẹ gbẹtọ susu hugan lẹ nọ mọ dọ e sinyẹn nado kẹalọyi? Na nugbo tọn whẹwhinwhẹn dopolọ he hẹn mí tindo nuhudo mẹplọnlọ tọn to otẹn tintan mẹ lọ wutu janwẹ, yedọ mape mítọn. Mẹplọnlọ sọgan hẹn mí tindo numọtolanmẹ winyan tọn po awubibọ po kavi e sọgan gbleawuna goyiyi mítọn. Ṣigba, doayi apa awetọ whẹho lọ tọn go dile na apọsteli Paulu basi zẹẹmẹ etọn do: “Mẹplọnlọ depope, whenuena e tin to ote, ma sọawuhia nado yin ayajẹnu gba, adavo homẹgblenu: ṣigba to godomẹ, e jó sinsẹ́n gigọ dodo tọn hlan yé he yè zan gbọn e dali lẹ.”—Heblu lẹ 12:11.
8 Whiwhẹ nọ de suhugan adì mẹplọnlọ tọn pò. Ṣigba, gbẹtọ susu lẹ nọ dike na goyiyi po tasinsinyẹn po ni hẹn yé nado nọavunte sọta mẹplọnlọ. Ṣigba whenue vọjlado lọ kavi wọhẹmẹ ze adọ dai ganji, omẹ lọ he gbọn tasinsinyẹn dali do gbẹ́ ẹ dai hẹn ede taidi oklenọ poun to nukun mẹdevo lẹ tọn mẹ. Ohó Jiwheyẹwhe tọn dọmọ: “Oklenọ vlẹ nuyọnẹn po mẹplọnlọ po.”—Howhinwhẹn lẹ 1:7.
9 To vogbingbọn mẹ, mí hia dọ: “Wọhẹ nuyọnẹntọ, e na sọ yiwanna we.” Etẹwutu? Na ewọ yọnẹn dọ gbọn mẹjlọdote gblamẹ “ewọ na sọ sudeji to oplọn mẹ.”—Howhinwhẹn lẹ 9:8, 9.
NAWẸ HIẸ NA YINUWÀ GBỌN?
10-12. (a) Dile e yin didohia do to Howhinwhẹn lẹ 19:20 mẹ, nawẹ mẹplọnlọ sọgan gando ogbẹ̀ mítọn lẹ go do? (b) Etẹwutu Jiwheyẹwhe do nọ do mẹplọnlọ mí go? (Heblu lẹ 12:5, 6) (c) Mẹnu wẹ yin aṣẹna nado na mí mẹplọnlọ?
10 Kanbiọ lẹ wẹ yindọ: Etẹwẹ hiẹ jlo nado wà po ogbẹ̀ towe po? Be hiẹ jlo nado yin dindọnyì poun wẹ ya? Kavi hiẹ tindo ojlo nado wàzọn dai dohlan sọgodo dagbe de? Nukun tẹwẹ hiẹ do pọ́n whẹho ehe? Be hiẹ sọgbe hẹ Ohó Jiwheyẹwhe tọn, he na ayinamẹ dọ: “Tuntoai hlan ayinamẹ, na a ni sọ yí oplọn, na hiẹ nido yọnnuin to podo towe” ya?—Howhinwhẹn lẹ 19:20, NW.
11 Depope he linlẹn towe na yin, whedelẹnu to ogbẹ̀ mẹ hiẹ dona kẹalọyí mẹplọnlọ. Podọ eyin hiẹ hẹn do ayiha mẹ dọ tito-basinanu Jiwheyẹwhe tọn wẹ, hiẹ na mọ ẹn yin ojlonu bo sọ bọawu nado kẹalọyi. Ewọ wleawudaina mẹplọnlọ na ewọ yiwanna mí bo jlo nado gọalọna mí nado pọnte dogọ wutu. Enẹwutu Biblu dọmọ mẹdepope he gbẹwanna mẹplọnlọ na nugbo tọn, to ‘lilẹgodo do oho Jiwheyẹwhe tọn lẹ.’—Psalm 50:17.
12 Mẹplọnlọ gbọn jlọjẹ dali nọ wá sọn asisa aṣẹpipa tọn de mẹ. Mẹnu wẹ hiẹ yise dọ e tin to otẹn dagbe hugan lọ mẹ nado na oplọn gbẹtọ jọja lẹ? Jiwheyẹwhe ko de azọ́n enẹ na mẹjitọ lẹ, na yé yin azọngbannọ na ogbẹ̀ ovi yetọn lẹ tọn wutu. Podọ, to agun Klistiani tọn lọ mẹ, Jiwheyẹwhe ko wleawuna “sunnu mẹho” gbigbọnọ lẹ he “penugo nado na tulimẹ gbọn oplọn he pegan dali podọ nado wọhẹ́ yé mẹhe nọ dọnuyìndo lẹ.”—Titu 1:5-9.
13-17. Eyin mí tindo didẹ nado gblehomẹ do mẹplọnlọ go, linlẹn tẹlẹ wẹ mí sọgan flin míde he sọgan gọalọna mí nado jla lẹnpọn mítọn do? (Howhinwhẹn lẹ 4:1, 2; 15:32)
13 Nawẹ hiẹ nọ yinuwa hlan mẹplọnlọ sọn mẹjitọ towe lẹ de gbọn? Ehe nọ hẹn homẹgblena jọja susu lẹ, e whè gbahu na ojlẹ de, yedọ jẹ obademẹ nado họn sọn whégbè lọsu na enẹ wutu. Eyin homẹgble we do ayinamẹ kavi wọhẹ he mẹde na we go, nọte bo kanse dewe dọ: Etẹwutu wẹ yé do yí whenu po vivẹnu po zán nado wamọ? To whẹho susu lẹ mẹ, dile etlẹ yindọ e ma yin polẹpo, hiẹ yọnẹn dọ wọhẹ́ ninamẹ ma nọ yin ojlonu taun de na yé gba. Ye nọ basi i na yé kiya na we talala nado basi vivẹnudido lọ wutu. Enẹ kẹdẹ dona hẹn we lẹnnupọ́n titengbe dogbọn nuhe yé dọ lọ dali.
14 Nugbo, e nọ biọ huhlọn nado pannukọn nuṣiwa mítọn lẹ. Podọ e sọ biọ whiwhẹ nado kẹalọyi mẹplọnlọ, titengbe eyin hiẹ mọtolanmẹ dọ e ma ko jẹ. Ṣigba eyin hiẹ yi i abọẹ bo ma diọnukunsọ ẹ, e yọnbasi dọ hiẹ na duale gbọn dali etọn, podọ ehe na hẹn ninọmẹ lọ bọawu.
15 Flin ga dọ, e yọnbasi dọ yéwu mẹhe to mẹplọnlọ na lẹ ma to tintẹnpọn nado “blawe” bọ hiẹ nado yin aliglọnna to zọnlinzinzin to alihogbo ogbẹ̀ tọn ji gba. Kakati nido yin mọ, vlavo yé to tintẹnpọn nado gọalọna we nado tindo nukọnyiyi. Mẹplọnlọ nuyọnẹn tọn nọ họ́ mẹ sọta nujijọ awugblenamẹ tọn lẹ, hẹn we jẹdewekannu sọn onu he na bla we dote po nuhahun lẹ po mẹ, ehe na to hinhẹn aliho towe sinyẹn lẹ si. Eyin hiẹ kẹalọyi mẹjlọdote, Biblu dopagbe dọ: “Whenuena hiẹ to zọnlinzin aliho towe ma to na ján na otẹn; whenuena hiẹ to wezundo, hiẹ ma na klẹnafọ. Hẹn oplọn go gligli; a jo e do blo: yi i whla; na ewọ wẹ ogbẹ̀ towe.”—Howhinwhẹn lẹ 4:10-13.
16 Nalete, hiẹ ma tindo nuhudo nado nọte na mẹdevo lẹ nado jlọ we do ali ji gba. Hiẹ sọgan zan mẹplọnlọ-dido-mẹ go. Gbọn tintin to nukle dali, hiẹ sọgan yọ́n susu to nuṣiwa towe titi lẹ mẹ bo na de afọdide nado jla yé do.
17 Alemọyi susu lẹ nọ wá sọn yinyin mẹhe nọ kẹalọyi mẹplọnlọ mẹ. Nado yigbena nuṣiwa mẹtọn lẹ to aliho jijlọ de mẹ na na we numọtolanmẹ dagbe hugan de to dewe mẹ. E nọ na huhlọn ahún po ayiha towe po na nuhe jlọ. E nọ jla haṣinṣan towe hẹ́ mẹdevo lẹ do; yé na kẹalọyi we taidi gbẹtọ ayiha doponọ, whiwhẹnọ po jlẹkajinọtọ po, gbọn alọpa fifa de mẹ do gbọnvona susu mẹdevo lẹ tọn to egbehe. To popolẹpo mẹ, e yin dandannu na hinhẹn we wá haṣinṣan dagbe de mẹ hẹ́ Jehovah Jiwheyẹwhe podọ nado hẹn we dote to finẹ. E sọ sọgan hẹn sọgodo he na dẹn to aimẹ he diun de wá na we. Mọwẹ, “nukọnamẹ oplọn tọn lẹ wẹ aliho ogbẹ̀ tọn.”—Howhinwhẹn lẹ 6:23.
[Yẹdide to weda 95]
Whenuena yè to oplọn na we, nawẹ hiẹ nọ yinuwa do?