Jipa Whanpẹnọ

PỌ́N lehe aigba te do tofi! Pọ́n lehe nulẹpo yọnwhanpẹ do! Pọ́n ogbé lẹ po atin lẹ po, vounvoun lẹ po kanlin lẹ po. Be a sọgan do ajinnakú po kinnikinni lẹ po hia ya?

Mẹnu wẹ dá jipa whanpẹnọ ehe? Jiwheyẹwhe wẹ. Gbọ mí ni pọ́n lehe Jiwheyẹwhe wleawu aigba tọn na mí do.

Jẹnukọn whẹ́, Jiwheyẹwhe hẹn ogbé lẹ nado wú bo ṣinyọ́n aigba ji. E sọ dá atin pẹvipẹvi, zùnkan po atin daho wunmẹwunmẹ lẹ po. Ehelẹ nọ hẹn aigba yọnwhanpẹ. Ṣigba, yé sọ nọ wà nususu humọ. Susu yetọn sọ nọ na mí núdùdù he vivi taun lẹ.

Enẹgodo, Jiwheyẹwhe dá whèvi lẹ nado nọ lìn to osin mẹ po ohẹ̀ lẹ po nado nọ zlọn to agahomẹ. E dá avún, asé po osọ́ lẹ po; kanlin daho lẹ po pẹvi lẹ po. Kanlin tẹlẹ wẹ nọ nọ̀ lẹdo towe mẹ? Be e ma jẹ dọ homẹ mítọn ni hùn dọ Jiwheyẹwhe dá onú ehe lẹpo na mí ya?

To godo mẹ, Jiwheyẹwhe jla fide do to aigba ji bọ e gbọnvo taun na fie pò lẹpo. E ylọ filọ dọ jipa Edẹni tọn. Filọ yọ́n taun. Nuhe tin to finẹ lẹpo wẹ yọnwhanpẹ. Podọ Jiwheyẹwhe jlo dọ aigba blebu ni lẹzun jipa whanpẹnọ ehe nkọ.

Todin, sọ pọ́n yẹdide jipa ehe tọn whladopo dogọ. Be a yọ́n nuhe Jiwheyẹwhe mọdọ e ma tin to finẹ ya? Gbọ mí ni dindona.